Icebo ca kwa Lesa ca Mulimo ku Kusambilisha

1. Bushe umutwe wa kulongana kwa muputule ukwa mwaka wa mulimo uwa 2014 ukalati shani, kabili cipusho nshi cikasukwa pa kulongana?

¹ Yehova ‘Kasambilisha wesu Uwapulamo,’ e waishibisha ukusambilisha mu bubumbo bonse. (Esa. 30:20, 21) Lelo bushe ni nshila nshi Yehova atusambilishishamo? Alitupeela icitabo icacila pa fitabo fyonse, ici citabo ni Baibolo Icebo cakwe icalembelwe ukupitila mu mupashi. Nomba bushe ifyo Yehova atusambilisha fitwafwa shani lwa ku mubili, mu fyo tutontonkanya, mu mutima, na muli bucibusa bwesu na Lesa? Ici cipusho cikasukwa pa kulongana kwa muputule uko tukakwata mu mwaka wa mulimo uwa 2014. Umutwe wa uku kulongana ukalati, “Icebo ca kwa Lesa ca Mulimo ku Kusambilisha,” ukufuma pali 2 Timote 3:16.

2. Bushe ifishinka fikalamba ifya uku kulongana fikaba masuko ku mepusho nshi?

² Mukabike Amano Kuli ifi Fishinka: Ifishinka fikalamba pali uku kulongana fikaba masuko kuli aya mepusho:

• Bushe ifyo Yehova atusambilisha fitwafwa shani mu bumi bwesu? (Esa. 48:17, 18)

• Nga tulefwaya ukwalula imikalile yesu pa kuti tulebombela Yehova mu mulimo wa nshita yonse, cinshi tufwile ukucetekela? (Mal. 3:10)

• Bushe tulingile ukucita shani nga twaumfwa ‘ifisambilisho fimbi fimbi’? (Heb. 13:9)

• Kuti twapashanya shani “imisambilishishe” ya kwa Yesu? (Mat. 7:28, 29)

• Mulandu nshi abasambilisha mu cilonganino balingile ukulaisambilishisha? (Rom. 2:21)

• Mulimo nshi Icebo ca kwa Lesa cakwata? (2 Tim. 3:16)

• Bushe “ukutensha” inko kulekuma shani abantu? (Hag. 2:6, 7)

• Bushe Yehova acetekela ukutila tukacita cinshi? (Efes. 5:1)

• Mulandu nshi tulingile ukubombesesha pa kuti tutwalilile ukusumina mu fyo Yehova atusambilisha? (Luka 13:24)

3. Mulandu nshi cicindamine ukuti tukasangwe kuli uku kulongana no kuyakutikisha?

³ Ilyo umutumwa Paulo ashilalemba amashiwi apafumine umutwe wa kulongana, pa kubala alondolwele muli 2 Timote icipandwa 3 ukuti, inshiku sha kulekelesha shikaba ni nshita ishayafya. Alembele ukuti: “Ababifi kabili incenjeshi bakaya balebipilako fye, bakulalufya kabili bakulalufiwa.” (2 Tim. 3:13) Kanshi nga tatulefwaya ukulufiwa, nacicindama ukuti tuleumfwa ifyo Yehova aletusambilisha no kulafibomfya! E ico, shi natupampamine pa kuya sangwa kuli uku kulongana ukupekanishiwe pa nshita yalinga no kuyakutikisha.