‘Ukufwaya kwa kwa Lesa Kucitwe’
1. Bushe umutwe wa kulongana kwaibela ukwa mwaka wa mulimo uwa mu 2012 uletila shani kabili mulandu nshi cicindamine ukuti tulanshanye ili lyashi?
1 Yehova alitubumbile pa mulandu wa kufwaya kwakwe. (Ukus. 4:11) E ico, te kuti tufishepo ukufwaya kwa kwa Lesa nga tatulesambilila no kucita ifyo afwaya. Ici tacayanguka pantu tulingile ukulwishanya ne mibele yesu iya kucita ‘ifyo imibili yesu na matontonkanyo yesu filefwaya’ nelyo ukucita “ukufwaya kwa bantu ba ici calo.” (Efes. 2:3; 1 Pet. 4:3; 2 Pet. 2:10) Akubula Lesa ukutwafwa, kuti tuleba mu busanso bwa ‘kwikatwa abatuntulu kuli [Satana] pa kutila tulecita ukufwaya kwakwe.’ (2 Tim. 2:26) Ukulongana ukwaibela ukwa mwaka wa mulimo uwa mu 2012, kukatwafwa ukukonka icishinka ca butatu ico Yesu alandile mwi pepo lya cilangililo, ilyo atile, “ukufwaya kwenu kucitwe.”—Mat. 6:9, 10.
2. Mepusho nshi ayakasukwa mu kulongana?
2 Ifipusho Ifikasukwa: Ilyo mulekutika kuli programu, mukafwaye ifyasuko kuli ifi fipusho: Cinshi cimbi icacindama ico tufwile ukucita ukulunda pa kumfwa Icebo ca kwa Lesa? Kuti twacita shani pa kutila tuleiluka icaba ukufwaya kwa kwa Lesa? Mulandu nshi tulingile ukuitemenwa ukulashimikila abantu abalekanalekana? Kuti twacita shani pa kuti tube ne mikalile iisuma kabili iya nsansa? Mwe baice, cinshi mwingacita pa kuti Yehova eshibe ukuti mwalimutemwa? Mapaalo nshi twingakwata nga tulecita ukufwaya kwa kwa Lesa? Mulandu nshi cicindamine sana ukuti tulekuula bambi e lyo no kubakoselesha?
3. Kuti mwacita shani pa kuti munonkelemo mu kulongana?
3 Mwikapuswa kuli uku kulongana kabili mukalekutikisha. Kuli uku kulongana kufwile kukaba umwiminishi wa musambo nangu kangalila wenda. Pa kutendeka na pa numa ya kulongana, kuti mwalandako ilyashi nankwe no mwina mwakwe nga ca kuti alyupa. Nga mwabwelelamo ku mwenu, ‘mwikalaba ifyebo mukomfwa,’ lelo mukalepituluka mu kulongana ngo lupwa no kulanshanya ifyo mwingalacita ifyo Lesa afwaya.—Yako. 1:25.
4. Mulandu nshi tulingile ukubikila amano sana ku kucita ukufwaya kwa kwa Lesa?
4 Abantu bonse abakonkelela ifyo bakumbwa, kabili abashifwaya ukulacita ukufwaya kwa kwa Yehova bali no konaulwa nomba line fye. (1 Yoh. 2:17) Kanshi tufwile ukutasha Yehova pa kutupekanishisha ifi fyebo pa nshita yalinga pa kuti fingatwafwa ukubika amano ku kucita ukufwaya kwa kwa Lesa!