Inshila Iipya Kabili Iisuma iya Kushimikililamo ku Cintubwingi
1. Finshi bakoselesha ifilonganino ifyakwata ififulo umupita sana abantu ukucita?
1 Ifilonganino ifyakwata ififulo umupita sana abantu kuti fyapekanya ukulashimikilako ku cintubwingi, ukubomfya itebulo nelyo akakusendelapo impapulo akakwata amawilo. Nga ca kuti mwabomfya akakusendelapo impapulo, kasabankanya umo afwile ukushala naiminina nelyo naikala mupepi na pali impapulo. Lelo, nga litebulo mulebomfya bakasabankanya babili e bafwile ukushalapo. Abashele apali impapulo bafwile ukuba aba bucibusa. Nga ca kuti umuntu alolekesha apali impapulo, kasabankanya umo kuti atendeka ukulanshanya nankwe, nalimo kuti alanda fye ukuti, “Bushe mwalishiba ifyo Baibolo yalandapo pali ili lyashi?” Kasabankanya uushili pe tebulo nelyo bakasabankanya babili kuti baya akatalamukila pa kuti baleshimikila abantu ubunte bwa mu lyashi.
2. Landeni icacitike icilelanga ukuti ukushimikila ku cintubwingi ukubomfya iyi nshila kwalicindama.
2 Ukubomfya ishi nshila kwalilenga abantu abengi ukutendeka ukusambilila Baibolo. Umwanakashi umo uwali pa koleji alefwaya ukulemba ilyashi pa Nte sha kwa Yehova, lelo alifililwe ukusanga Ing’anda ya Bufumu. Umulungu wakonkelepo amwene itebulo pa sukulu apo babikile impapulo. Alitendeke ukusambilila Baibolo, pali ino nshita alibatishiwa kabili alashimikilako ukubomfya iyi ine inshila.
3. Bushe bakasabankanya bamo bomfwa shani pa kushimikila ku cintubwingi ukubomfya iyi nshila ipya?
3 Nkashi umo uwatemwa ukubomfya iyi nshila ya kushimikililamo ku cintubwingi atile: “Abantu baleminina apo tubika impapulo no kusendapo magazini iipya. Bamo tabatala abomfwapo pa Nte sha kwa Yehova. Nalimona ukuti ukubomfya iyi nshila kuti kwalenga abantu abengi ukumfwa imbila nsuma.” Nkashi umbi atile: “Iyi nshila iipya iya kushimikililamo isuma pantu abantu abene e besa apo tuli kabili, nangu ca kuti tabalefwaya ukupokako impapulo, balafwaya ukwishiba ifilipo.”
4. Mulandu nshi cacindamina ukulabika impapulo pa cifulo cimo cine na pa nshita imo ine cila mulungu?
4 Calicindama sana ukulabika itebulo nelyo akakusendelapo impapulo pa cifulo cimo cine, pa nshiku shimo shine, kabili pa nshita imo ine cila mulungu. Ici kuti calenga abantu babelesha ukumona apo mubika impapulo kabili mu kuya kwa nshita kuti balaishila fye abene no kulaipusha amepusho nelyo ukubulapo impapulo. Bushe icilonganino cenu calipekanya ukushimikila ku cintubwingi ukubomfya iyi nshila ipya ? Nga calipekanya, nalimo kuti mwabomfyako iyi nshila iipya kabili iisuma iya ‘kubilishishamo konse konse Ubufumu bwa kwa Lesa.’—Luka 9:60.