Ifyo Mwingashimikila Ukubomfya Utwakubikapo Impapulo

Ukubomfya aka kubikapo impapulo aka mawilo nelyo itebulo ilyo tuleshimikila kulebomba bwino ukwafwa abantu ababa ne mitima iisuma ukusambilila icine. (Yoh. 6:44) E co baeluda babakoselesesha ukupekanya ukuti icilonganino cabo cilebomfya iyi inshila ku kushimikila ku cintubwingi mu fifulo umupita sana abantu ifyaba mu ncende icilonganino cabo cishimikilamo. Kwena te lyonse tulingile ukupoka ulusa ku balashi pa kubomfya iyi nshila ya kushimikililamo pantu tulafumyapo utwakubikapo impapulo nga twainuka. Nomba ni bani bengabombako uyu mulimo? Ni bakasabankanya abeluka bwangu, abashikatala, kabili abaishiba ukulanshanya bwino na bantu. Twalalanda pali fimo ifyo bakasabankanya balingile ukulacita ne fyo bashilingile ukulacita pa kuti balebomba bwino.

Ifyo Mulingile Ukucita:

Muleba aba bucibusa. Bakasabankanya bamo balamwentula no kuposha abapita nshila. Nga ca kuti umo alolesha apo mubikile impapulo, kuti mwatila, “Mukwai kuti mwabulapo ulupapulo ulo mulefwaya.”
Mufwile ukutalukako panono napo mubikile impapulo. Mu ncende shimo, bakasabankanya basanga ukuti balabomba bwino nga batalukako panono ukufuma apo babikile impapulo. Bambi nabo basanga ukuti abantu balafilwa ukuya apali impapulo nga ca kuti beminine mupepi, e ico balemininako akatalamukila no kulolela mpaka umuntu aya apali mpapulo. Umuntu nga aisa apali mpapulo, lanshanyeniko nankwe, nalimo kuti mwamwipusha ukuti, “Bushe mwalibala amutontonkanyapo pali ici cipusho?”
Mulebomfya sana Baibolo.
Nga ca kuti babulapo ulupapulo tubomfya pa kusambilisha abantu Baibolo, pamo nga icitabo ca Ico Baibolo Isambilisha, balondolweleni ifyo tusambilila na bantu Baibolo. Batambisheniko vidio iitila, Mulandu Nshi Mulingiile Ukusambilila Baibolo?
Pokeni inambala ya foni nelyo adresi ya ng’anda iya muntu uulefwaya ukwishibilapo na fimbi pali Baibolo. Nga ca kuti umuntu tekala mu cifulo mushimikilamo, lembeni formu ya Mukwai Fwayeni Uyu Muntu (S-43), kabili bwangu bwangu peeleni kalemba wa mu cilonganino cenu.