Muleafwa Abashimona Ukusambilila Pali Yehova
1. Bushe Yesu alangile shani ukuti aleumfwila impofu uluse?
1 Kwashele fye nshiku ishinono ukuti Yesu afwe. Ilyo alefuma mu musumba wa Yeriko, impofu shibili shabilikishe ashiti: “Tubeleleniko uluse, mwe Shikulu!” Nangu ca kuti Yesu aletontonkanya pa macushi aali no kukwata, aliminine no kushiita kabili alishundepe. (Mat. 20:29-34) Kuti twapashanya shani Yesu uwaleumfwila impofu uluse?
2. Kuti twacita shani nga tulefwaya ukushimikila ku muntu uushimona uo twakumanya pa cintubwingi?
2 Mulebafwa: Nga mwakumanya umuntu uushimona, nalimo pa cintubwingi, mwebeni ishina lyenu no kumweba ukuti mulefwaya ukumwafwa. Pa mulandu wa kuti abantu balafwaya ukulaumfwana na bantu ba musango uyu pa kuti bamwenemo fimo kanshi abashimona ilingi line te kuti bamucetekele apo pene fye. Nomba nga mwaba aba bucibusa kabili mwabalanga ukuti na mubabikako amano kuti calenga baleka ukumutiina. Muleibukisha ukuti, ubupofu bwaba apengi kabili ukwishiba ici e kwingamwafwa ukwishiba ubwafwilisho uyo muntu alekabila. Pa numa ya kumwafwa, nalimo kuti mwamweba ukuti mulasambilisha abantu Baibolo. Kuti mwamweba ukuti mulefwaya ukumubelengelako ilembo limo, pamo nga Amalumbo 146:8 nelyo Esaya 35:5, 6. Nga ca kuti alishiba ukubelenga ifilembo fya mpofu (Braille) kuti mwamwipusha nga kuti atemwa ukumupeelako ulupapulo mu filembo fya mpofu ulwingamwafwa ukusambilila na fimbi pali Baibolo. Na kabili kuti mwamukopolwelako ifyebo ifyo bakopa mu mashiwi ifyaba pa jw.org. Nga ca kuti kompyuta yakwe yalikwata programu iyibelenga ifilembo, nalimo kuti atemwa ukukwatako impapulo ishaba pa jw.org pamo ne mpapulo isho mwingakopolola mu RTF (e kutila Rich Text Format).—Moneni akabokoshi kaleti “Ilyo Muleafwa Umuntu Uushimona . . . ”
3. Kuti twacita shani pa kufwaya abashimona ababa mu cifulo tushimikila?
3 Mulefwaya Abashimona: Te lingi tusanga abantu abashimona nga tuleshimikila ku ng’anda ne ng’anda pa mulandu wa kuti abengi tabafwaya ukulanda na bantu abesa pa mwabo abo bashaishiba. Kanshi, tufwile ukubombesha pa kuti ‘tufwaye’ abantu ba musango uyu no kubashimikila. (Mat. 10:11) Bushe ku ncito mubomba nelyo pa sukulu mwaba paliba umuntu uushimona? Mukaitendekeleko ukulanda nankwe. E lyo nga ca kuti mu cifulo mushimikila mwaliba isukulu lya mpofu, kuti mwabatwalilako impapulo shesu ishakwata ifilembo fya mpofu pa kuti bashibike mu laibrare ye sukulu. Bushe mwalishibako umo uwakwata lupwa uushimona? Bushe mu cifulo mushimikila mwaliba utubungwe utwafwa impofu nelyo kwaliba ifikuulwa umo basungila impofu? Mulingile ukulondolwela lupwa wa uushimona, nangu uupokelela abeni pa cikuulwa basungila impofu, nelyo dairekita ukuti Inte sha kwa Yehova balitemwa ukwafwa impofu, kabili bebeni ukutila kuti mwabatwalilako impapulo sha bashimona nelyo isho bakopa mu mashiwi. Babelengeleni ifyo Baibolo yalaya ukuti Lesa ali no kufumyapo ukupofula. Nalimo kuti mwabatambishako na vidio iyaba pa jw.org iyakwata umutwe utila “Without It, I Would Feel Lost,” umwaba umwaume uushimona uwanonkelamo mu kuibelengela Baibolo iyaba mu filembo fya mpofu. Nga mwalondolola ico mwendele, nalimo kuti bamusuminisha ukulanda na bantu abashimona.
4. Finshi tulesambililako ku fyo ba Janet bacitile?
4 Nkashi uushimona uwe shina lya Janet atandalile icikuulwa umwikala abantu abashimona. Atendeke ukulanda no mukashana. Ba Janet bamwebele ukuti, “Yesu alyundepe impofu kabili ifyo acitile filanga ifyo akacitila abantu bonse abashimona.” Babelengele pa Ukusokolola 21:3, 4 kabili ba Janet bamulondolwelele ifyo Ubufumu bwa kwa Lesa bukafikilisha ubu bulayo. Umukashana aikele fye tondolo kabili atile: “Nshabala ng’umfwapo impofu yalanda aya mashiwi. Abantu abengi abamona basumina ukuti abantu baishileba impofu pa mulandu wa fyo abene nelyo ifikolwe fyabo fyacitile.” Ba Janet batumiine uyu umukashana adresi ya pa intaneti apali icitabo ca Ico Baibolo Isambilisha, kabili pali ino nshita balasambilila Baibolo imiku ibili mu mulungu.
5. Nangu ca kuti te kuti tundape impofu nga filya Yesu acitile, mapaalo nshi tukasanga nga ca kuti tulebika amano ku bashimona?
5 Kwena te kuti tundape impofu nga fintu Yesu acitile, lelo kuti twaafwa abantu abo lesa wa bwikashi buno apofwisha amatontonkanyo, ukubikako fye na bashimona ukwishiba icine icaba mu Cebo ca kwa Lesa. (2 Kor. 4:4) Yesu alyundepe abaume babili abali mupepi na Yeriko pantu ‘ali bomfwilile uluse.’ (Mat. 20:34) Na ifwe nga tuleumfwila abashimona uluse, tukalaumfwa bwino ukubafwa ukusambilila pali Yehova, uukafumyapo ubupofu ku ciyayaya.