Ukushibula Amenso ku Mbila Nsuma

“UMUULU taucepako ukuba uwa kafiifi pa mulandu fye wa kuti impofu taiumona,” e fisosa ipinda lya ciDanish. Lelo mu bumi bwesu ubwa cila bushiku ubwapamfiwa, bushe tulamona ukuti umuulu waba uwa kafiifi, ukulandila muli iyo nshila? Bushe tumona inshita ya ku ntanshi mu kuba no kucetekela? Bushe mu cituntulu twalisumina imbila nsuma iyo Icebo ca kwa Lesa, Baibolo, cipeela?

Mu cipande citangilileko, twacilanguluka imbali sha bupofu bwa cine cine. Lekeni nomba tubebete umusango wa kumona uyo wacilishapo ukukatama. Usanshamo insansa shesu ishibelelela pamo pene ne filolelo fya nshita ya ku ntanshi iya batemwikwa besu.

Ukwabulo kutwishika, twalolenkana ne “nshita ishayafya.” (2 Timote 3:1) Cinshi cicitika ilyo abantu baleshombokela ukusanga umwa kuliila, ukushipikisha amafya ya butuntulu bwa bumi ne mpika sha lupwa, no kubomba no lufyengo lwa mu bwikashi no kubulwa ukutemwa? Ku ca bulanda, abengi basanga ukuti ukucetekela kwabo mu muntu munabo, ubutotelo, na kamfulumende kulecepelako. Ukwishiba ukuti takuli ukwa kulola, bamo basondwelela ukuti impika shabo tashakatale ashipikululwa mu nshila iituntulu. Mu nyunshipepala ya ku Brazil Jornal da Tarde, Jacob Pinheiro Goldberg alandapo kuti: “Abantu, mu kulolenkana ne cine cine cabamo bukatu, bayumfwa abakalifiwa nga nshi ku filubo ica kuti tabapelulula mu kubamo amano, kabili bashintilila pa fimpa fya kufulunganya.” Nalyo line, nelyo fye lintu ifintu fyalubana, tufwaya ukubomfya ubupingushi busuma, bushe te ifyo?

Elenganya pa kashita ukuti ulefwaila ulupwa lobe iŋanda, kabili te mulandu no mutengo wa iko. Napamo wafwayafwaya kabili watandalila amayanda ayengi mu bwina mupalamano. Nangu ca kuti bakashitisha ba fikuulwa baesha ukulanguluka ukufwaya kobe, iŋanda ukwete mu muntontonkanya tailemoneka. Lelo, apantu ukwikushiwa no busuma bwa lupwa lobe nafibimbwamo, tautompoka, bushe ulatompoka? Nomba bika mu cikope insansa lintu mu kupelako wasanga iŋanda iileikusha ukufwaya kobe.

Kwati fye fintu wingapoosa inshita ukufwaya iŋanda ipya, mulandu nshi te kubebetela Baibolo ku kumona ukupikulula kwa mpika shobe? Nga fintu fye tufwile ukupimununa ifishinka pa kucita ukupingulapo pa lwa ŋanda, e fyo tulekabila ukupelulula bwino pa lwa fintu tubelenga mu Cebo ca kwa Lesa. Kabili icacilanapo ukunonsha ukucila ukusanga iŋanda caba kumona kwesu no kupokelela icine pa lwa kwa Yehova Lesa na Yesu Kristu. Yesu atile: “Uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—Yohane 17:3.

Lelo nga ca kuti ubukombe bwa Baibolo bwaliba ubwaumo mutengo ifyo, mulandu nshi abengi batwalilila ukuba abashibata ku bukombe bwa iko? Umulandu umo, kabili ici kuti casungusha abengi, uli wa kuti “pano isonde ponse palaala mu maka ya Mubifi.” (1 Yohane 5:19) Nge ca kufumamo, Satana Ciwa e “wapofwishe imitima ya bashitetekela, ku kulesho kuca kuli bene ulubuuto lwa mbila nsuma ya bukata bwa kwa Kristu, uuli cipasho ca kwa Lesa.” (2 Abena Korinti 4:4) Nangula ca kuti tumwena ku menso yesu, caba ni bongobongo e wilula ulubuuto ulwingila mu linso. E co, ukupofula na kabili kulondololwa nga “ukukanaba na maka nelyo ukukanafwaya ukwiluka nelyo ukupingula.” Ici citucinkulako insoso yaseeka iya kuti: “Takwaba uuli onse uwapofula ukucila abo bashifwaya ukumona.”

Impofu te kuti imone icili ku ntanshi ya iko, e co kuti yaba mu busanso bwa kuicena. Ubupofu bwa cine cine ubwa bengi te kuti buposhiwe nomba, lelo tapali nangu umo uwakakililwako ku kutwalilila ukuba impofu ya ku mupashi.

Ukucimfya Ubupofu bwa ku Mupashi

Kwati fye fintu imibele ya fya busaka iyabipa inganenuna ukumona, injikalo yabotelela kuti yasangwilako ku bupofu bwa mu mibele. Ukulundapo, Yesu Kristu asokele ulwa fifundisho fyapangwa na bantu ne fishilano. Acilengele ukumfwika ukuti intungulushi sha butotelo ku numa kulya balelufya imikuni yabo: “Ni ntungulushi mpofu; lelo nge mpofu itungulule mpofu, shonse shibili shikawila mu cilindi.”—Mateo 15:14.

Mu cifulo ca kukopekwa ku ntungulushi mpofu, fintu baba aba nsansa abo abashibula amenso yabo ku mbila nsuma pa lwa Bufumu bwa kwa Lesa! Yesu abilishe ukuti: “Ni ku kupingula e co ine naishiile pano isonde, ku kuleka abashimona bamone.” (Yohane 9:39) Ni shani, nangu ni fyo, impofu sha ku mupashi shingesa ku kumona? Cisuma, lekeni tutwalilile ukulanguluka kwesu ukwa bupofu bwa cine cine.

Ukupayanya ukwingi nomba e ko kwaba ku mpofu. Te lyonse cali ifi. Takwali ukutukuta kwine kwine ukwalecitwa ku kwaafwa impofu pa ntanshi Valentin Haüy talaimika isukulu lyaibela ilya mpofu mu 1784. Pa numa, Louis Braille aleteleko ifilembo fya mpofu; acitile fyo ku kwaafwa impofu ukubelenga.

Ni shani pa lwa mpofu sha ku mupashi? Mu myaka ya nomba line ukutukuta kwine kwine kwalicitwa ku kubilisha imbila nsuma nelyo fye ni ku fifulo fyabesha ukutali ifye sonde. (Mateo 24:14) Inte sha kwa Yehova baliba aba buseko ukuleta isubilo ku mpofu sha mampalanya ne sha cine cine.

Umwanakashi umwina Brazil alembele ukuti: “Ndefwaya ukusoso kuti te mulandu no kupelebela kwandi ukwa ku mubili, ndamona—lwa ku mupashi. Mwandi ni Lesa wawamisha! Twaliba aba nsansa ukwishiba ukuti ‘Yehova akafumbatule minwe yakwe no kwikusha conse ica mweo ifyo cilefwaya.’” (Ilumbo 145:16) Kabili Jorge, uwaba impofu ya cine cine, ebukisha ukuti: “Ubumi bwandi kuti bwayakanishiwa mu mbali shibili: pa ntanshi na pa numa ya Nte. . . . Ukupitila muli shene, natendeke ukumona icalo mu kulengama kabili mu kubengeshima. Ndaipakisha ukwampana kusuma na bonse mu cilonganino.” Ilintu ico cili ica kulengo kucankwa, Baibolo ilatupeela ukwebekesha ukwa kuti nomba line tapali nangu umo pe sonde uukabe mpofu—mu cine cine nelyo lwa ku mupashi. Ni shani fintu ico cikaba? Ni shani fintu cikashininkisha ukuba ica cine mu kusaalala kwe sonde ukuti “Yehova ashibula amenso ya mpofu”?—Ilumbo 146:8.

Ukundapa Kubelelela Kweka Fye—Ubufumu bwa kwa Lesa

Te mulandu no kucenjela mu fya miti miti ukwaingilishiwako, amalwele yafulisha yaletwalilila ukupofwisha, ukulenga ubukali, no kulenge mfwa. Cinshi, lyene, cilekabilwa ku kufita ubulwele bwa nsala, imibele ya busaka iyabipa, no kumanama uko kufumyapo fyonse fibili ukumona no buseko bwa bumi? Ukundapa kwa kwa Yesu ukwa mpofu na bambi cali cipasho ca pa cipimo cinono ica fya nshita ya ku ntanshi. Mu nsansa, umulimo wakwe uwa kusambilisha no kuposha wacitileko icinshingwa amapaalo yali no kutambulwilwa kwi sonde pe samba lya kamfulumende wa Bufumu bwa kwa Lesa.

Ukuposha pa cipimo ca mu kusaalala kwa calo kuli mupepi.a Uyu programu wa kuposha kwa bulesa alangililwa mu kuyemba ku mutumwa Yohane ukuti: “Anangile umulonga wa menshi ya Mweo, ayabengeshima nga krustali, yalefuma mu cipuna ca bufumu ca kwa Lesa ne ca Mwana wa mpaanga, yalepita mu kati ka musebo wa Musumba; ubushilya buno bwa mulonga no bushilya bulya kwali umuti wa Mweo, uutwale fisabo fya misango ikumi na ibili, umweshi uyu umusango wa uko no mweshi uyu umusango wa uko; na ’mabuula ya miti yabela ku kuposhe nko.”—Ukusokolola 22:1, 2.

Inumbwilo ukupala “amenshi ya Mweo” na “umuti wa Mweo” shilangilila ukuti pa numa ya micitile ibifi iya lelo yapwa, ukupayanya kwa kundapa ukwa Bufumu bwa kwa Lesa panono panono kukasumbwila umuntu ku kupwililika. Na kuba, ubunonshi bwe lambo lya cilubula ilya kwa Yesu (ukusanshako ukulekelelwa umupwilapo ukwa membu), capamo no bwishibilo bwa kuti Yesu Kristu na Wishi, bakaleta ubutuntulu bwa bumi ubwapwililika no bumi bwa muyayaya.—Yohane 3:16.

Insansa mu Calo Cipya ica kwa Lesa

Elenganya, lyene, isonde ilyabulamo imisoka, ukukowesha, nelyo ubupiina. Bika mu cikope ulupwa lobe ukwikala capamo mu mutende muli Paradise wabweshiwa. (Esaya 32:17, 18) Mwandi kucankwa cikaba ukumona ukubalabata kwalekanalekana mu kuba no muntontonkanya wapwililika na mano!

“Imibele ya cifyalilwa iya mwenda mushiki yaba kwikala mu fyashingulukako ifyo fyaluka lyonse—ifya musango wa lubuuto, uwa kubalabata. Takwaba icintu ca musango yo pamo nga ifyashingulukako fya kutendusha mu bubumbo,” e fisosa Faber Birren. “Ukubalabata kwaba ni kumo ukwa kulengo buseko ukwalengwa na Lesa ukwa cino calo. Kwaba mibele ya bubumbo, te ya limo limo fye, kabili ubusuma ubwingi ubwa bumi bwashintilila pali kwene.”

Fintu ica bupe ca kumona caba icaumo mutengo! Fintu cikaba ica kulengo buseko lintu amenso ayali ayapofula pa nshita imo—ukupofula kwa cine cine nelyo ukwa ku mupashi—yakamona!

Ee, muli Paradise wabweshiwa uuleisa, ubupofu no bulema bumbi tafyakalenge na kabili ukubulwe nsansa! Takuli nangu umo ukalufiwa na kabili. Apantu ukutemwa kwine kwine kukaanana, bonse bakabuutushiwa lwa ku mupashi. Ico, na fimbi ifyalundwapo, e fitulalilile ku ntanshi, lelo ino ine e nshita ya kuba abasuminishiwa kuli Uyo ukafikilisha ubulayo bwakwe ubwa mu busesemo ubwa kuti: “E lyo yakashibulwa amenso ya mpofu”!—Esaya 35:5.

[Futunoti]

[Icikope pe bula 7]

E lyo yakashibulwa amenso ya mpofu!