Mulebombela Pamo Ilyo Mulebila Imbila Nsuma mu Fifulo umo Balanda Indimi Ishalekanalekana

Abantu ilingi line balakutika ku mbila ya Bufumu nga ca kuti uulebila iyo imbila alelanda mu lulimi balanda. Nalimo e calengele ukuti pa Pentekoste mu 33 C.E., Yehova alenge “abaYuda, abaume abaletiina Lesa, abafumine mu nko shonse isha mwi samba lya muulu” bakutike ku mbila nsuma ‘mu lulimi lwabo’, nangu ca kuti nalimo balishibe ukulanda indimi pamo nga iciHebere nelyo ciGriki isho pali ilya nshita abantu abengi balelanda. (Imil. 2:5, 8) Na muno nshiku mwine, ifilonganino ifibomfya indimi ishalekanalekana nalimo kuti filebombela mu cifulo ca kubilamo imbila nsuma cimo cine umo balanda indimi ishalekanalekana. Bushe bakasabakanya mu filonganino fya musango uyu, kuti balebombela shani pamo pa kuti babile imbila nsuma ku bantu bonse ukwabula ukubakalifya pa mulandu wa kubwelelabwelela pa mayanda yabo?

• 

  Mulelanshanya (Amapi. 15:22): Bakangalila wa mulimo muli ifi filonganino balingile ukulanshanya ifyo ifilonganino fyonse fikalabombela pamo muli ico cifulo pa kubila imbila nsuma. Nga ca kuti icifulo ca kubilamo imbila nsuma cinono, ifilonganino fibomfya ululimi lumbi kuti nalimo fyafwaya ukuti mulesha amayanda ya bantu abalanda ululimi icilonganino cabo cibomfya. Na lyo line, nga ca kuti ifilonganino te kuti lyonse fileshimikila abantu abalanda ululimi fibomfya abekala mu fifulo ifyabela ukutali sana, kuti cawama baeba ifilonganino ifibombela muli ifyo fifulo ukulaya pa mayanda fye yonse kabili nga basanga umuntu uulefwaya ukusambilila Baibolo kuti baishibisha icilonganino cibomfya ulo ululimi. (od ibu. 93 para. 37) Nangu kuti baeba icilonganino cenu ukuti cilebafwako ukufwaya abantu abalanda ululimi icilonganino cabo cibomfya kabili kuti mwabatumina ama adresi ya abo bantu pa kuti baya bamona. (km 7/12 ibu. 5, akabokoshi) Mufwile ukwishiba ukuti pa ng’anda imo kuti balanda indimi ukucila pali lumo. Mulingile ukushininkisha ukuti ifyebo mulelemba pa bantu fileumfwana na mafunde ya calo.

• 

  Mulebombela Pamo (Efes. 4:16): Mulekonka fyonse ifyo kangalila wenu uwa mulimo amweba. Bushe mulatungulula isambililo lya Baibolo ku muntu uulanda ululimi ulo icilonganino cenu cishibomfya? Kuti alunduluka bwangu nga ca kuti mwaeba ababa mu cilonganino nelyo ibumba ilyaba mupepi ababomfya ululimi alanda ukuti balemutungulula isambililo lya Baibolo.

• 

  Mulepekanya (Amapi. 15:28; 16:1): Nga ca kuti umuntu mwasanga pa ng’anda alanda ululimi mushilanda, muleesha na maka yenu yonse ukulanshanya nankwe. Kuti mwatontonkanishisha libela indimi nalimo abantu mu cifulo mubilamo imbila nsuma balanda. Kabili kuti mwakopolwela libela pa foni nelyo tabuleti yenu Baibolo e lyo na mavidio mu ndimi shimbi. Nga mulefwaya ukusambilila ukuposha mu lulimi lumbi kuti mwabomfya JW Language app.