Mule-ebako Abantu Imbila Nsuma ya Kuti Icalo Icisuma Cili Mupepi!

Mu mweshi wa November tukabombesha muli kampeni yaibela umo tukalaeba abantu imbila nsuma ya kuti icalo icisuma cili mupepi. (Amalu. 37:10, 11; Ukus. 21:3-5) Mukatantikile limo ifintu pa kuti mukabombeshe muli iyi kampeni. Nga mulefwaya ukubombako bupainiya bwa kwafwilisha muli uyu mweshi, kuti mwasalapo ukubomba ubwa ma-awala 30 nelyo 50.

Mukapekanye ukubelengelako abantu abengi ilembo ililanda pa calo cipya. Mufwile ukusala ilembo ilyo abantu baba mu cifulo mushimikila bengatemwa. Nga ca kuti abo mwalanshanya nabo pa muku wa kubalapo balanga ukuti balefwaya ukwishibilapo na fimbi, bapeeleni Ulupungu lwa kwa Kalinda ulwa Na. 2 2021. Lyena mufwile ukubwelelako bwangu no kwesha ukutendeka isambililo lya Baibolo ukubomfya broshuwa ya Kuti Mwaba ne Nsansa Umuyayaya! Ala tulasekelela nga nshi nga tulebomba sana umulimo wa kubila “imbila nsuma iya fintu ifisuma”!—Esa. 52:7.

TAMBENI VIDIO YA LWIMBO LWAIBELA ULUTILA ICALO ICIPYA, LYENA ASUKENI AMEPUSHO YAKONKAPO:

• Finshi umukashana umunono acilaelenganya ifikacitika ku ntanshi?

• Finshi mufwaisha ukwisamona fyacitika mu calo cipya?

• Bushe ukutontonkanya sana pe subilo mwakwata kuti kwamwafwa shani ukuipekanya ukwisabombako sana muli kampeni ya mu November?—Luka 6:45