Ifya Kubomfya Amavidio Ayalanda pe Sambililo lya Baibolo

Twalikwata amavidio 4 ayalanda pe sambililo lya Baibolo ayo tubomfya pa kubila imbila nsuma. Cinshi bapangila aya mavidio?

• 

  Mulandu Nshi Mulingiile Ukusambilila Baibolo? Ico bapangile iyi vidio kwafwa abantu ukutemwa Baibolo te mulandu ne fyo basuminamo. Ilakoselesha abaletamba ukufwaya amasuko mu Baibolo ku mepusho yacindama sana, kabili yalilandako na panono pa masuko ayasangwa mu Baibolo. Ilalondolola ne fyo bengacita nga balefwaya ukutendeka ukusambilila Baibolo.

• 

  Mulandu Nshi Mulingiile Ukusambilila Baibolo? (iyo baipifya) iyi vidio imo ine ne iyi tulandilepo pa muulu nomba yena bali-ipifya, kabili kuti yabomba bwino ku ncende uko abantu baba abapamfiwa sana.

• 

  Bushe Isambililo lya Baibolo Liba Shani? Ico bapangile iyi vidio kulenga abantu balafwaisha ukusambilila Baibolo. Kabili ilasuka na mepusho ayo nalimo abantu bengafwaya ukwishiba pa fyo isambililo lya Baibolo liba, ukubikako fye ne fyo umuntu engacita nga alefwaya ukutendeka ukusambilila Baibolo.

• 

  Mwaiseni kwi Sambililo Lyenu Ilya Baibolo, ico bapangile iyi vidio kutambisha abasambi ba Baibolo. Nangu ca kuti vidio yaba pe bula 2 ilya citabo citila Kuti Mwaba ne Nsansa Umuyayaya! kuti mwatambisha umusambi na lintu mulelanshanya muli broshuwa itila Kuti Mwaba ne Nsansa Umuyayaya! Iyi vidio ilalondolola ifyaba mu citabo e lyo ne fyo umusambi afwile ukwenekela ilyo alesambilila.

Nangu ca kuti cila vidio yalikwata ico baipangile, kuti twatambisha nelyo ukutumina umuntu vidio i-ili yonse pali aya ilyo twamona ukuti nacilinga. Tulekoselesha bakasabankanya ukwishiba bwino aya mavidio no kulayabomfya bwino ilyo balebila imbila nsuma.