Ifyo Abantu Balanda pe Pepo
“Nga naumfwa kwati ninduba e lyo napepa kuli Lesa, ng’umfwa kwati nanjikata pa kuboko, e lyo alentungulula.”—E fyalandile ba MARÍA.
“Umwina mwandi afwile pa numa ya kucula ku bulwele bwa kansa pa myaka 13. Nalepepa kuli Lesa cila bushiku, kabili nga napepa, naleumfwa ukuti alekutika, ne ci calelenga ndeumfwako bwino.”—E fyalandile ba RAÚL.
“Ipepo bupe ubusuma ubo Lesa atupeela.”—E fyalandile ba ARNE.
Abantu abengi pamo nga ba María, ba Raúl e lyo na ba Arne, balimona ukuti ipepo bupe ubusuma ubo Lesa atupeela. Bomfwa ukuti ipepo lilabaafwa ukulanda na Lesa, ukumutasha no kulomba ukuti abafwe. Balicetekela ukuti ifyo Baibolo ilanda pe pepo fya cine, itila: “Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.”—1 Yohane 5:14.
Abantu bambi nabo, cilabakosela ukumfwikisha ifyo Baibolo ilanda pe pepo. Ilyo ba Steve balelanda pa fyo baleumfwa pe pepo batile: “Ilyo nali ne myaka 17, abanandi batatu balifwile mu masanso. Umo afwile mu busanso bwa pa musebo, e lyo babili banwenene muli bemba.” Finshi ba Steve bacitile? Batile: “Nalipepele kuli Lesa ukuti anjebe icalengele abanandi babe mu masanso, lelo tangaswike. Ici calengele nalatontonkanya ukuti, ‘Cinshi ningalapepela nga ca kuti amapepo tayasukwa?’” Abantu abengi balileka ukupepa, pantu bamona kwati amapepo yabo tayasukwa.
Kwaliba na fimbi ifilenga abantu baletontonkanya kuti ipepo talyacindama. Bamo batila, Lesa alishiba ifintu fyonse, alishiba ifyo tukabila kabili alishiba na mafya tukwata, kanshi tatulingile ukulamweba ifili fyonse.
Bambi nabo batila Lesa tasuka amapepo yabo pa mulandu ne fyabipa ifyo bacitile kale. Ba Jenny batile: “Ubwafya nakwata bwa kuti ndaipeela sana imilandu pantu nalicita ifyabipa ifingi, ne ci cilenga nalatontonkanya ukuti Lesa te kuti asuke amapepo yandi.”
Bushe imwe mumona shani ipepo? Nga ca kuti na imwe mwalikwata amepusho pe pepo nelyo nga kwaliba fimo ifyo mutwishika, kuti mwasanga amasuko muli Baibolo.a Muli Baibolo e mo mwingasanga amasuko ya cine ku mepusho pamo nga aya:
Bushe Lesa alomfwa amapepo yesu?
Cinshi cilenga Lesa ela-asuka amapepo yamo?
Kuti mwacita shani pa kuti Lesa aleasuka amapepo yenu?
Bushe ipepo kuti lyamwafwa shani?
a Mu Baibolo mwaliba amapepo ya babomfi ba kwa Lesa abengi, ukubikako fye na mapepo ya kwa Yesu Kristu. Mu Malembo ya ciHebere ayo beta no kuti Icipingo ca Kale, mwaliba amapepo ukucila pali 150.