Amepusho Ukufuma ku Babelenga
Bushe ni mwi Yesu aloseshe ilyo atile: “Mwitila naisa ku kuleta umutende”?
Yesu alesambilisha abantu ukuba aba mutende. Lelo bushiku bumo aebele abatumwa bakwe ukuti: “Mwitila naisa ku kuleta umutende pe sonde; nshaisa ku kuleta umutende, kano ulupanga. Pantu naisa ku kulekanya umuntu na wishi, no mwana mwanakashi na nyina, no mukashana waupwa na nafyala.” (Mat. 10:34, 35) Bushe ni mwi Yesu aloseshe ilyo alandile aya mashiwi?
Ilyo Yesu alandile aya mashiwi, talefwaya ukulekanya indupwa, lelo alishibe ukuti ifyo alesambilisha kuti fyalenga mu ndupwa shimo baleka ukumfwana. Kanshi abantu abafwaya ukuba abasambi ba kwa Kristu no kubatishiwa, bafwile ukwishiba ukuti limo balupwa lwabo te kuti batemwe nga bapingulapo ukucita ifi. Nga ca kuti abena mwabo nelyo balupwa balebakaanya, kuti cabakosela ukutwalilila ukulakonka ifyo Kristu alesambilisha.
Baibolo ikoselesha Abena Kristu “ukuba aba mutende ku bantu bonse.” (Rom. 12:18) Lelo ifyo Yesu asambilishe mu ndupwa shimo kuti fyaba kwati “lupanga.” Ici cilacitika nga ca kuti umo mu lupwa asumina fyo Yesu asambilisha e lyo bambi bakaana ukusambilila nelyo bakaana ifyo Yesu asambilisha. Ifi nga fyacitika, aba mu lupwa baba “balwani” ba muntu uulesambilila icine.—Mat. 10:36.
Abasambi ba kwa Kristu abekala na balupwa abashibombela Yehova limo balakwata amafya ayalenga cibakosele ukupingulapo nampo nga kutemwa Yehova na Yesu nelyo balupwa lwabo. Ku ca kumwenako, balupwa lwabo abashibombela Yehova kuti babapatikisha ukuti nabo balesefya amaholide ayaba mu kupepa kwa bufi. Nga caba ifi, bafwile ukupingulapo uo bafwile ukulenga alasekelela. Yesu atile: “Uwatemwa wishi nelyo nyina ukucila ine, talingile ukuba umusambi wandi.” (Mat. 10:37) Kwena, Yesu talelanda ukuti pa kuti umuntu abe umusambi wakwe tafwile ukutemwa abafyashi bakwe. Lelo alesambilisha abasambi bakwe ifyo bafwile ukwishiba ukuti e fyacindama sana. Nga ca kuti balupwa lwesu abashipepa baletukaanya ukupepa Yehova, tatuleka ukubatemwa lelo twalishiba ukuti Lesa e o tufwile ukutemwa sana ukucila balupwa.
Ca cine ukuti balupwa lwesu nga baletukaanya tulomfwa sana ububi. Na lyo line, Yesu aebele abasambi bakwe ukulaibukisha aya mashiwi ya kuti: “Onse uushisenda icimuti cakwe ica bucushi no kunkonka, talingile ukuba umusambi wandi.” (Mat. 10:38) Kanshi kuti twatila Abena Kristu nga balebakaanya kuli balupwa lwabo, bamona ukuti bucushi ubo bafwile ukushipikisha pantu basambi ba kwa Kristu. Na kabili balacetekela ukuti imibele yabo iisuma iyo bakwata kuti yalenga balupwa lwabo abashipepa ukuleka ukubakaanya no kutendeka ukusambilila Baibolo.—1 Pet. 3:1, 2.