Ukuboko kwa kwa Yehova Takwaipipa

1. Bushe Mose alangile shani ukuti alitetekele Yehova ilyo aletungulula abena Israele ukufuma mu Egupti?

IBUUKU lya AbaHebere lyalilanda pa bantu abatetekele Yehova. Umo pali aba ali ni Mose, kabili alitetekele sana Yehova. (Heb. 3:​2-5; 11:​23-25) Mose alilangile ukuti alitetekele Yehova ilyo atungulwile abena Israele ukufuma mu Egupti. Tatiinine imfumu ya Egupti na bashilika ba iko ica kuti afilwa ukutungulula abena Israele. Alitetekele sana Yehova ica kuti alitungululwile abantu ilyo baleabuka Bemba ya Kashika pa kuya mu matololo. (Heb. 11:​27-29) Abena Israele abengi batendeke ukutwishika nga ca kuti Yehova ali no kulabasakamana. Lelo Mose ena atwalilile fye ukucetekela Lesa wakwe. Mose alicitile bwino filya atwalilile ukutetekela Yehova Lesa wakwe pantu Yehova alepeela abena Israele ifya kulya na menshi pa kuti bengapusuka ilyo bali mu matololo umushali ifintu ifingi.a—Ukufu. 15:​22-25; Amalu. 78:​23-25.

2. Cinshi calengele Lesa epushe Mose ati: “Bushe ukuboko kwa kwa Yehova kwalipipa?” (Impendwa 11:​21-23)

² Nangu ca kuti Mose alikwete icitetekelo icakosa, ilyo papitile nalimo umwaka umo ukutula apo Yehova alubwilile abena Israele ukufuma mu Egupti, Mose atampile ukutwishika nga ca kuti Yehova ali no kupeela abantu bakwe inama nga fintu abalaile. Apo abantu abali mu matololo balifulile sana, Mose aletwishika nga ca kuti Yehova ali no kukumanisha ukupeela abantu bonse inama. E ico Yehova aipwishe Mose ati: “Bushe ukuboko kwa kwa Yehova kwalipipa?” (Belengeni Impendwa 11:​21-23.) Pali ici cikomo amashiwi ya kuti, “ukuboko kwa kwa Yehova,” yapilibula umupashi wa kwa Lesa nelyo amaka ayo abomfya. Mu mashiwi yambi, Yehova aleipusha Mose ati, ‘Bushe ulemona ukutila kuti nafilwa ukucita ifyo ndefwaya ukucita?’

3. Bushe kuti twasambililako ku lyashi lya kwa Mose na bena Israele? Londololeni.

³ Bushe mwalitala amutwishikapo nga ca kuti Yehova akalamupeela ifyo mukalakabila nelyo nga ca kuti akalapeela ulupwa lwenu ifyo lukabila? Nampo nga mwalitwishikapo nelyo iyo, lekeni tusambilileko kuli Mose na bena Israele abaletwishika nga ca kuti Yehova ali no kulabapeela ifyo balekabila. Twalasambilila na pa Malembo ayengalenga twashininkisha ukuti ukuboko kwa kwa Yehova takwaipipa.

IFYO TWINGASAMBILILA KULI MOSE NA KU BENA ISRAELE

4. Cinshi nalimo calengele abantu abengi batendeke ukutwishika nga ca kuti Yehova alikwete amaka ya kubapeela ifyo balekabila?

⁴ Cinshi calengele abena Israele abengi batampe ukutwishika nga ca kuti Yehova ali no kulabapeela ifyo balekabila? Pali iyi nshita abena Israele na “abantu abengi nga nshi” abashali abena Israele abo bafumine nabo mu Egupti, ninshi balyendauka mu matololo ilyo baleya ku calo ico Yehova abalaile. (Ukufu. 12:38; Amala. 8:15) Abashali bena Israele kumo na bena Israele balitendelwe ukulya mana. E ico bonse batendeke ukuilishanya. (Impe. 11:​4-6) Batampile ukufuluka ifya kulya ifyo balelya ilyo bali mu Egupti. Pa mulandu wa kuti abantu baleilishanya kuli Mose, amwene kwati e walingile ukubafwaila inama. Nomba taishibe uko ali no kushifumya.—Impe. 11:​13, 14.

5-6. Finshi tulesambilila ku fyo abashali bena Israele balengele abena Israele baleka ukulatasha Yehova pa fyo alebacitila?

⁵ Abashali bena Israele tabaletasha pali fyonse ifyo Yehova alebacitila, kabili abena Israele batampile ukubakonkelela. Na ifwe bene nga ca kuti tuleba na bantu abashitasha, tukaleka ukulatasha Yehova pa fyo atucitila. Kuti twaleka ukulatasha Yehova nga ca kuti twalafuluka ifintu ifyo twakwete, nelyo nga ca kuti twatendeka ukulafimbila abantu pa mulandu ne fyo bakwata. Lelo tukalaba ne nsansa nga ca kuti natuteka imitima ku fintu ifyo twakwata.

⁶ Abena Israele balingile ukwibukisha ukutila Lesa alibebele ukuti bali no kukwata ifintu ifingi nga bafika mu calo ico abalaile. Ifi abalaile, ali no kufifikilisha mu calo ico abalaile, te lintu bale-endauka mu matololo. Na ifwe bene tatulingile ukulabika amano ku fintu ifyo tushakwata muli cino calo, lelo tufwile ukulabika amano ku fintu ifyo Yehova atulaya mu calo cipya. Na kabili kuti cawama twalatontonkanya sana pa Malembo ayengalenga twacetekela sana Yehova.

7. Cinshi cingalenga twashininkisha ukuti Yehova kuti atwafwa?

⁷ Nomba nalimo kuti mwalatontonkanya pa calengele Lesa epushe Mose ati: “Bushe ukuboko kwa kwa Yehova kwalipipa?” Nalimo Yehova alefwaya Mose eshibe ukuti Lesa alikwata amaka, kabili kuti ayafwa ababomfi bakwe konse uko bengaba. E ico Yehova alikwete amaka ya kupeela abena Israele inama ishingi nangu ca kuti bali mu matololo. Lesa alibomfeshe “ukuboko kwakwe ukwa maka kabili ukwatambalikwa” pa kubalanga ukuti alikwata amaka ya kwafwa abantu bakwe konse uko bengaba. (Amalu. 136:​11, 12) Kanshi nga twakwata ubwafya, tatulingile ukulatwishika nga ca kuti Yehova kuti atwafwa.—Amalu. 138:​6, 7.

8. Kuti twacita shani pa kuti tatucitile ifyo abengi abali mu matololo bacitile? (Moneni ne cikope.)

⁸ Tapakolwele, Yehova alipeele abantu ifyo balekabila; alibapeele inkwale ishingi. Nomba abena Israele tabatashishe Yehova pali ici cipesha amano ico abacitiile. Lelo abengi baishilefunukila inkwale. Akasuba no bushiku balelonganika fye inkwale. Yehova alifuliilwe sana “abafunukile inkwale, kabili alibakandile.” (Impe. 11:​31-34) Finshi twingasambililako kuli ili lyashi? Kuti twasambililako ukuti tatufwile ukuba abafunushi. Nampo nga tuli bakankaala nelyo nga tuli bapiina, tufwile ukulabika amano ku ‘kulonganikila ifyuma ku muulu.’ Kuti twacita ifi nga ca kuti tulecita ifintu ifingalenga bucibusa bwesu na Yehova, na bucibusa bwesu na Yesu bwatwalilila ukuba ubwakosa. (Mat. 6:​19, 20; Luka 16:9) Nga tulecita ifi, kuti twacetekela ukuti Yehova akalatupeela ifyo tukalakabila.

9. Finshi fingalenga twacetekela sana ukuti Lesa akalatwafwa?

⁹ Na muno nshiku mwine, Yehova alatambalika ukuboko kwakwe pa kuti afwe abantu bakwe. Nomba ici tacipilibula ukuti tatwakatale atubulishapo indalama nelyo ifya kulya.b Na lyo line, Yehova takatulekeleshe. Akalatwafwa nangu twingakwata amafya ya musango shani. Kuti twalanga shani ukutila twalicetekela ukuti Yehova akalatupeela ifyo tukalakabila? Natulande pa nshila shibili umo twingalangila ifi; (1) nga tatukwete indalama na (2) nga natusakamikwa nga ca kuti tukalakwata ifyo tukalakabila nga twakota.

NGA TATUKWETE INDALAMA

10. Mafya nshi nalimo twingakwata?

¹⁰ Ilyo impela ya cino calo ilepalama, kuti twaenekela ukuti ifintu fikalakoselako fye. Ifimfulunganya mu mitekele ya calo, inkondo, amasanso ayakalamba nelyo ifikuko kuti fyalenga incito yapwa, ifintu ifyo twakwata fyaonaika nangu kuti fyalenga ing’anda yesu yaonaika. Ifya musango uyu nga fyacitika, nalimo kuti twalatontonkanya pa kufwaya incito imbi mu cifulo twikala mwine nelyo ukukuushisha ulupwa ku cifulo cimbi pa kuti tulefwaila ulupwa lwesu ifyo lukabila. Finshi twingacita pa kuti tusalepo ukucita ifingalanga ukuti twalicetekela Yehova?

11. Kuti mwacita shani nga ca kuti tamukwete indalama? (Luka 12:​29-31)

¹¹ Nga namusakamikwa, calicindama sana ukupepa kuli Yehova. (Amapi. 16:3) Mulemulomba ukuti alemupeela amano pa kuti mulesalapo ukucita ifisuma, muleteka umutima, na pa kuti muleke “ukusakamikwa” pa mafya ayo mukwete. (Belengeni Luka 12:​29-31.) Mulemupaapaata ukuti alemwafwa pa kuti muleteka umutima ku fyo mukwete. (1 Tim. 6:​7, 8) Mulefwailishako na mu mpapulo shesu pa kuti mwishibe ifyo mwingacita nga tamukwete indalama. Abengi abakwatapo ubwafya bwa kukanakwata indalama, balinonkelamo mu mavidio ne fipande ifyaba pa webusaiti ya jw.org.

12. Mepusho nshi ayo Umwina Kristu afwile ukuyipusha ilyo alesalapo ifikakuma ulupwa lwakwe?

¹² Bamo balisalapo ukusha ulupwa no kuya mu kubombela ukutali. Lelo baliluka ukuti ifi bacita tafyawama. Ilyo mushilaingila incito, mwilatontonkanya fye pa ndalama mukalafola nga mwaingila, lelo mulebikako sana mano pa kuti mulemona nga ca kuti iyo ncito ikalenga bonse mu lupwa lwenu mukatwalilile ukuba ifibusa fya kwa Yehova. (Luka 14:28) Muleyipusha amuti: ‘Bushe icupo cesu cikaba shani nga ca kuti nasha umwina mwandi eka? Nga naingila iyi ncito, bushe nkalakwata inshita ya kulalongana lyonse, inshita ya kulabila imbila nsuma ne nshita ya kulaba pamo na ba bwananyina?’ Nga ca kuti mwalikwata abana, mulingile ukuyipusha ne ci cipusho icacindama: ‘Nga nayaingila incito ukutali, bushe abana bandi nkalabasalapula kabili nkalabakonkomesha “ukulingana ne fyo Yehova afwaya?” (Efes. 6:4) Ilyo mulesalapo ifya kucita, mwilakonka ifyo balupwa lwenu nelyo ifibusa fyenu abashikonka ifyo Baibo ilanda balemweba, lelo mulekonka ifyo Yehova atontonkanya.c Natulandeko pali ba Tony abekala ku kabanga ka citungu ca Asia. Amakampani ayengi yalibalaile ukubengisha incito mu calo cimbi. Ishi ncito shali no kulenga balefola indalama ishingi sana. Nomba pa numa ya kupepelapo kabili balanshanyapo na bena mwabo, basalilepo ukukanaingila isho ncito. Lyena balanshenye ukuti balingile fye ukucefyako indalama isho balebomfya. Pali ino nshita ba Tony batila: “Nalikwata ishuko ilikalamba ilya kusambilisha abantu icine pali Yehova, kabili abana besu balitemwa sana icine. Bonse mu lupwa twalisambilila ukuti nga tulekonka ifyo Baibo ilanda pali Mateo 6:​33, Yehova akatwalilila ukutusakamana.”

NGA NATUSAKAMIKWA NGA CA KUTI TUKALAKWATA IFYO TUKALAKABILA NGA TWAKOTA

13. Finshi twingacita pali ino nshita pa kuti tulesungako indalama isho tukalabomfya nga twakota?

¹³ Na kabili kuti twalanga ifyo twacetekela Yehova lintu tulepekanya ifyo tukalaikala nga twakota. Baibo itukoselesha ukuti tulingile ukulabombesha pa kuti tulesungako indalama sha kubomfya ku ntanshi. (Amapi. 6:​6-11) Kanshi caliba fye bwino ukulasungako indalama isho tukalabomfya ku ntanshi. Kwena indalama kuti shatwafwa ilyo tulekabila ubwafwilisho. (Luk. Mil. 7:12) Na lyo line, tatufwile ukulabika fye amano ku kufwaya indalama.

14. Mulandu nshi tulingile ukutontokanishisha pa fyo Baibo yalanda pa AbaHebere 13:5 ilyo tulepekanya ifyo tukalaikala ku ntanshi?

¹⁴ Mu lyashi limo ilyo Yesu ashimike, alangilile ukuti umuntu uubika fye amano ku kukwata indalama, lelo “uushacindama mu menso ya kwa Lesa,” muwelewele. (Luka 12:​16-21) Takwaba uwishiba ifikacitika mu bushiku bwa mailo. (Amapi. 23:​4, 5; Yako. 4:​13-15) Fwe basambi ba kwa Kristu tulakwata ubwafya ubo abantu bambi bashikwata. Bwafya nshi tukwata? Yesu alandile ukuti pa kuti tube abasambi bakwe, tufwile ukuitemenwa ‘ukusha fyonse ifyo twakwata.’ (Luka 14:33) Ifi fine e fyo Abena Kristu aba mu nshita ya batumwa abaleikala mu Yudea bacitile. Bali-itemenwe ukusha fyonse ifyo bakwete. (Heb. 10:34) Na muno nshiku mwine aba bwananyina abengi balaitemenwa ukuleka incito pa kuti betungilila akabungwe ka fikansa fya calo. (Ukus. 13:​16, 17) Cinshi calenga baleitemenwa? Ni co balishininkisha ifyo Yehova abalaya ukuti: “Nshakakushe nakalya kabili nshakakulekeleshe nakalya.” (Belengeni AbaHebere 13:5.) E ico tulabombesha pa kuti tukwate indalama sha kubomfya nga twakota, kabili tulacetekela ukuti Yehova akalatwafwa nga ca kuti ifintu ifyo tushile-enekela fyacitika.

15. Bushe abafyashi Abena Kristu bafwile ukulamona shani abana babo? (Moneni ne cikope.)

¹⁵ Mu fyalo fimo, icikalamba ico abaupana bakwatila abana, ni co bafwaya abana bakalebapeela indalama sha kubomfya nga bakota. Nomba Baibo itila abafyashi e balingile ukulapekanishisha abana babo ifyo bakabila. (2 Kor. 12:14) Lelo kwena abafyashi nga bakota, kuti balakabila indalama ne fintu fimbi, kabili abana abengi balaitemenwa ukupeela abafyashi babo ifintu fya musango uyu. (1 Tim. 5:4) Lelo abafyashi abacetekela Yehova balishiba ukuti icilenga bakaleba ne nsansa sana, kusambilisha bwino abana babo ica kuti baba ababomfi ba kwa Yehova, te kukwata abana pa kuti bakalebapeela indalama sha kubomfya.—3 Yoh. 4.

16. Finshi abafyashi bengacita pa kusambilisha abana babo ifyo bakalaisakamana ku ntanshi? (Abena Efese 4:28)

¹⁶ Mwe bafyashi, ilyo mulesambilisha abana benu ifyo bakalaisakamana nga bakula, mulelanga ukuti mwalicetekela Yehova. Ilyo bacili fye abaice, mulebasambilisha ukuti ukubombesha kwacindamina. (Amapi. 29:21; belengeni Abena Efese 4:28.) Na kabili ilyo baleya balekula, mulebafwa pa kuti balebombesha mu fya ku sukulu. Abafyashi Abena Kristu kuti bafwailishako amashinte ya mafunde ya mu Baibo mu mpapulo shesu. Lyena kuti basambilishako abana babo pa fyo bengacita ilyo balesalapo amasambililo ayo balingile ukukwata. Icikalamba ico abafyashi bafwile ukucitila fyonse ifi, kwafwa abana babo pa kuti bakaleisakamana, bakalekwata inshita ya kubila imbila nsuma ne ya kubombako bupainiya.

17. Cinshi twingacetekela?

¹⁷ Ababomfi ba kwa Yehova aba cishinka balicetekela ukuti Yehova kuti abapekanishisha ifyo balekabila kabili akalabapekanishisha. Ilyo impela ya cino calo ilepalama, kuti twaenekela ukuti ifintu ifingalenga twalatwishika nga ca kuti Yehova kuti atusakamana, nafyo fine fikalafulilako. Nomba nangu tukakwate amafya ya musango shani, tukatwalilile ukucetekela ukuti Yehova akabomfya amaka yakwe pa kutupekanishisha ifyo tukalakabila. Kuti twacetekela ukuti ukuboko kwakwe ukwa maka kabili ukwatambalikwa, kukatwalilila ukutwafwa.