ICIPANDE CA KUSAMBILILAMO 17
ULWIMBO 99 Aba Bwananyina Bengi
Tatwaba Fweka
“Ndekwafwa.”—ESA. 41:10.
IFYO TWALASAMBILILAPO
Twalasambilila pa nshila 4 isho Yehova atusakamaninamo.
1-2. (a) Cinshi twingalandila ukuti nga natukwata amafya tatuba fweka? (b) Finshi twalasambililapo muli cino cipande?
NGA NATUKWATA amafya ayakalamba, kuti twalaumfwa kwati tuli fye fweka pa kati ka mpanga kabili tatukwete no kwa kulola. Lelo tatwaba fweka. Shifwe wa ku muulu alamona amafya tukwata kabili alilaya ukuti akulatwafwa. Yehova alilaya ababomfi bakwe aba cishinka ukuti ‘akulabafwa.’—Esa. 41:10.
2 Muli cino cipande twalasambilila inshila 4 isho Yehova atwafwilamo (1) ifyo atutungulula, (2) ifyo atupekanishisha ifyo tukabila, (3) ifyo atucingilila, na (4) ifyo atusansamusha. Yehova alitulaya ukuti takatulekeleshe nangu twingakwata amafya ya musango shani. Takatushe! Kanshi tatwaba fweka.
YEHOVA ALATUTUNGULULA
3-4. Bushe Yehova atutungulula shani? (Amalumbo 48:14)
3 Belengeni Amalumbo 48:14. Yehova tatwenekela ukuti tuleitungulula fwe bene. Bushe atungulula shani ababomfi bakwe aba cishinka muno nshiku? Inshila iyo abatungululwilamo, Cebo cakwe Baibo. (Amalu. 119:105) Ukupitila mu Cebo cakwe, Yehova alatwafwa pa kuti tulesalapo ukucita ifisuma na pa kuti tulekwata imibele iisuma ilenga tuleba ne nsansa pali ino nshita kabili tukabe no mweo wa muyayaya ku ntanshi.a Ku ca kumwenako, Yehova alatusambilisha ukuti tatulingile ukulaenda ne cikonko ku mukoshi, tulingile ukuba aba cishinka muli fyonse ifyo tucita, kabili tulingile ukutemwa abantu ne mitima yesu yonse. (Amalu. 37:8; Heb. 13:18; 1 Pet. 1:22) Nga natukwata iyi mibele, kuti twaba abafyashi abasuma, kuti twaba abantu abasuma ku bena mwesu, kabili kuti twaba ifibusa ifisuma.
4 Na kabili mu Baibo, Yehova alitweba pa bantu abakwete amafya ayo tukwata kabili abaleumfwa nge fyo tumfwa. (1 Kor. 10:13; Yako. 5:17) Nga ca kuti tulebelenga aya malyashi kabili tulekonka ifyo tulesambililako, tulanonkelamo mu nshila shibili. Inshila ya kubalilapo, tuleshiba ukuti tatwaba fweka, no kuti te ifwe fweka tukwata amafya. Abantu na bambi balikwetepo amafya kabili balitwalilile ukushipikisha pa mulandu wa kuti Yehova alibafwile. (1 Pet. 5:9) Inshila yalenga bubili, tuleshiba ifya kucita pa kuti tuleshipikisha amafya pa kuti twingatwalilila ukulasekelela.—Rom. 15:4.
5. Ni bani Yehova abomfya pa kututungulula mu musebo uutwala ku mweo wa muyayaya?
5 Yehova kuti abomfya na ba bwananyina pa kututungulula.b Ku ca kumwenako, bakangalila ba muputule balatandalila ifilonganino libili libili pa kuti baletukoselesha. Amalyashi balanda yalakosha icitetekelo cesu kabili yalalenga twatwalilila ukuba abaikatana. (Imil. 15:40–16:5) Baeluda nabo balabombesha pa kwafwa cila kasabankanya pa kuti engatwalilila ukuba cibusa wa kwa Yehova. (1 Pet. 5:2, 3) Abafyashi balasambilisha abana babo pa kuti bengalatemwa Yehova, bengalasala bwino ifya kucita, kabili bengakwata imibele iisuma. (Amapi. 22:6) Bankashi abakalamba nabo balakwata imibele iisuma iyo bankashi abacaice bengatemwa ukukwata, balabapandako amano ayasuma, kabili balabakoselesha sana.—Tito 2:3-5.
6. Finshi tufwile ukucita pa kuti tulenonkelamo mu fyo Yehova atutungulula?
6 Yehova alitupeela fyonse ifyo tukabila pa kuti tulesalapo bwino ifya kucita ifingalenga ifintu fyalatuwamina. Kuti twalanga shani ukuti tulatasha pali ifi atucitila? Baibo pa Amapinda 3:5, 6 itila: “Cetekela Yehova no mutima obe onse, kabili wicetekela amano yobe.” Nga twacita ifi Yehova akatulanga “inshila iyalungama,” e kutila akulatwafwa pa kuti tuletaluka amafya ayengi kabili tulekwata ubumi ubusuma. Tulatasha sana Yehova pali ifi atulanga ukuti alitutemwa, na pa fyo atupandako amano.—Amalu. 32:8.
YEHOVA ALATUPEELA IFYO TUKABILA
7. Ni nshila nshi shimo isho Yehova atupekanishishamo ifyo tukabila? (Abena Filipi 4:19)
7 Belengeni Abena Filipi 4:19. Ukulunda pa fyo Yehova atutungulula, alatwafwa na lintu tulebombesha pa kuti twingalakwata ifya kulya, ifya kufwala, no mwakwikala. (Mat. 6:33; 2 Tes. 3:12) Kwena nangu ca kuti caliba fye bwino ukulasakamana pa fyo twingalakwata ifyo tukabila, Yehova atukoselesha ukuti tatufwile ukulasakamana pali ifi fintu. Mulandu nshi? Pantu Shifwe wa ku muulu takalekeleshe ababomfi bakwe lintu bakwete amafya. (Mat. 6:8; Heb. 13:5) Kuti twamucetekela umupwilapo ukuti akulatupekanishisha ifyo tukalakabila.
8. Finshi Yehova acitiile Davidi?
8 Tontonkanyeni pa fyo Yehova ayafwile Davidi. Mu myaka yonse iyo Davidi alebutuka imfumu Shauli, Yehova alemupekanishisha pamo na baume abo ali nabo fyonse ifyo balekabila pa kuti bapusuke. Ilyo Davidi atontonkenye pa fyo Yehova alemwafwa mu myaka yonse iyi, alembele ati: “Nali umulumendo nomba ninkota, lelo nshatalamonapo uwalungama bamulekelesha kuli Lesa, nelyo abana bakwe balalombelesha ifya kulya.” (Amalu. 37:25) Mufwile na imwe mwali-imwena ifyo Yehova apekanishisha ababomfi bakwe aba cishinka ifyo bakabila.
9. Bushe Yehova apekanishisha shani abantu bakwe ifyo bakabila muno nshiku nga kuli ubusanso ubukalamba? (Moneni ne fikope.)
9 Yehova alapekanishisha ababomfi bakwe ifyo bakabila na lintu bakwata ubusanso ubukalamba. Ku ca kumwenako, ilyo kwali icipoowe mu nshita ya batumwa, Abena Kristu mu fyalo ifyalekanalekana balitumiine aba bwananyina ifyo balekabila. (Imil. 11:27-30; Rom. 15:25, 26) Na muno nshiku mwine, abantu ba kwa Lesa balafwilisha bamunyinefwe na bankashi abalekabila ubwafwilisho. Nga ca kuti kwaba ubusanso ubukalamba, Yehova alapekanishisha ababomfi bakwe ifyo bakabila pamo nga ifya kulya, amenshi, ifya kufwala, ne miti. Aba bwananyina ababomba umulimo wa makuule balawamya amayanda ya ba bwananyina ayonaike na Mayanda ya Bufumu. Aba bwananyina balangufyanya ukuya mu kusansamusha no kukoselesha bamunyinefwe na bankashi aba kuti amayanda yabo nayonaika nelyo nabafwilwa.c
Bushe Yehova atusansamusha shani nga natukwata ubusanso ubukalamba? (Moneni paragrafu 9)e
10-11. Finshi mwasambililako ku lyashi lya ba Borys?
10 Yehova ni kapekape pantu alapekanishisha na bantu abashimubombela ifyo bakabila. Na ifwe bene tulapashanya Yehova kabili tulafwayako inshila isha kulangilamo abashimupepa icikuuku. (Gal. 6:10) Ilingi line nga twacita ifi, abantu balasambililako ifingi pali ifwe na pali Yehova. Natulandeko pa lyashi lya ba Borys bakafundisha mukalamba abekala mu Ukraine. Nangu ca kuti ba Borys te Nte ya kwa Yehova, lyonse baleba ne cikuuku ku bana besukulu ba Nte kabili balecindika ifyo basuminamo. Ilyo ba Borys basalilepo ukufulumuka ku ncende ukwali inkondo pa kuti bengaya ku ncende imbi ukwali umutende, aba bwananyina balibafwile. Pa numa, ba Borys balisangilweko ku kulongana kwa Cibukisho ca mfwa ya kwa Kristu. Ilyo ba Borys batontonkenye pali fyonse ifyo aba bwananyina babacitiile, balandile ati: “Ba Nte balembikako sana amano kabili balinsakamene. Ndatasha sana Inte sha kwa Yehova.”
11 Na ifwe bene kuti twalapashanya Shifwe wa ku muulu uwaba no luse nga ca kuti tulelanga ukuti twalitemwa abantu abalekabila ubwafwilisho, nangu ca kuti tabasumina mu fyo twasuminamo. (Luka 6:31, 36) Tusubila ukuti ifyo tubalanga ukutemwa fikalenga bakafwaye ukuba abasambi ba kwa Kristu. (1 Pet. 2:12) Lelo nampo nga bakasalapo ukuba abasambi ba kwa Kristu nelyo iyo, ifwe tukalaba ne nsansa pantu mwaliba insansa ishingi mu kupeela ukucila mu kupokelela.—Imil. 20:35.
YEHOVA ALATUCINGILILA
12. Ni kuli finshi Yehova alaya ukuti akulacingilila abantu bakwe? (Amalumbo 91:1, 2, 14)
12 Belengeni Amalumbo 91:1, 2, 14. Muno nshiku Yehova alitulaya ukuti akulatucingilila ku fintu ifingalenga bucibusa bwesu na ena bwapwa. Takaleke Satana akalenge abantu bakwe bakaleke ukulamupepa ukulingana ne fyo afwaya. (Yoh. 17:15) Na lintu kukaba “ubucushi bukalamba,” kuti twacetekela ukuti Yehova akafikilisha ifyo atulaya ukuti akulatwafwa pa kuti twingatwalilila ukuba ne citetekelo icakosa, kabili akatupususha.—Ukus. 7:9, 14.
13. Bushe Yehova atucingilila shani umo umo?
13 Bushe Yehova atucingilila shani umo umo? Yehova alitupeela Baibo iilenga twaishiba ifya kulekanya icisuma ne cabipa. (Heb. 5:14) Nga tulekonka amashinte ya mafunde ayaba mu Cebo ca kwa Lesa, tulaicingilila ku fintu ifingalenga bucibusa bwesu na Yehova Lesa bwapwa, na ku fintu ifingalenga twailetelela. (Amalu. 91:4) Na kabili Yehova alatucingilila ukupitila mu cilonganino cakwe. (Esa. 32:1, 2) Bamunyinefwe na bankashi abo twaba nabo mu cilonganino balitemwa Yehova kabili balamumfwila. Nga tuleba nabo ilyo tulelongana, ilyo tulebila imbila nsuma, na lintu tuleangalila pamo, balatukoselesha pa kuti twilacita ifintu ifyabipa.—Amapi. 13:20.
14. (a) Mulandu nshi Yehova alekela twakwata amafya? (b) Finshi Yehova atulaya pa Amalumbo 9:10? (Moneni na futunoti.)
14 Kale Yehova alecingilila abantu bakwe ku fintu fimo ifyali no kulenga babacena nelyo babepaya. Lelo te lyonse alebacingilila. Inshita shimo tulakwata amafya pa mulandu “ne fintu ificitika ukwabula ukwenekela.” (Luk. Mil. 9:11) Na kabili Yehova alilekapo abantu bakwe bamo babacusha nangu fye ukubepaya pa kuti cishibikwe ukuti Satana wa bufi. (Yobo 2:4-6; Mat. 23:34) Ifi fine e fyo acita na muno nshiku. Nangu ca kuti Yehova nalimo te kuti afumyepo amafya ayo tukwete, kuti twamucetekela ukuti takalekeleshe abantu abamutemwa.d—Amalu. 9:10.
YEHOVA ALATUSANSAMUSHA
15. Bushe Yehova atusansamusha shani ukupitila mwi pepo, mu Cebo cakwe, na mu Bena Kristu? (2 Abena Korinti 1:3, 4)
15 Belengeni 2 Abena Korinti 1:3, 4. Inshita shimo tulaloosha, tulasakamikwa, nelyo tulaba no bulanda. Nalimo pali ino nshita namukwata ubwafya ubukalamba ubulelenga muleumfwa kwati mwaba fye mweka. Bushe kwaliba umo uwishibe ifyo muleumfwa? Yehova naishiba. Tapelela fye pa kumfwa ububi pa fyo tulecula, lelo ‘alatusansamusha mu macushi yesu yonse.’ Atusansamusha shani? Nga twapaapaata Yehova, alatupeela “umutende wa kwa Lesa uwacila pa fyo twaishiba.” (Fil. 4:6, 7) Na kabili alatusansamusha nga twabelenga amashiwi yakwe mu Baibo. Muli Baibo Yehova alitweba ifyo atutemwa, alatusambilisha pa kuti tube na mano, kabili alalenga twakwata isubilo. Na kabili nga tulelongana na Bena Kristu banensu tulasansamuka, pantu tulasambilila ifyaba mu Baibo ifitukoselesha.
16. Finshi mwasambililako ku lyashi lya ba Nathan na ba Priscilla?
16 Kuti twamona ifyo Yehova atusansamusha ne fyo atukoselesha ukupitila mu Cebo cakwe ku lyashi lya ba Nathan na ba Priscilla aba ku United States. Inshita imo basalilepo ukuya mu kubila uko abakubila pa Bufumu bacepele. Ba Nathan batile: “Twalicetekele ukuti Yehova ali no kulenga tukabombe bwino.” Nomba ilyo bafikile kulya batendeke ukulalwala kabili tabakwete ne ndalama. Aba abaupana mu kupita kwa nshita balibwelelemo ku ng’anda, lelo balitwalilile ukukwata ubwafya bwa kubulisha indalama. Ba Nathan batile: “Naletontonkanya nati ‘mulandu nshi Yehova ashatupaalile ukulingana ne fyo twale-enekela?’ Natendeke no kutontonkanya nga kwali ifyo nalufyenye.” Lelo mu kupita kwa nshita, ba Nathan na ba Priscilla balilwike ukuti Lesa tabalekeleshe ilyo balekabila ubwafwilisho. Na kabili ba Nathan batile: “Ilyo twalekwata amafya, Baibo yaishileba kwati ni cibusa wesu uwa mano, uwaletukoselesha kabili uwaletutungulula. Pa mulandu wa kuti twabikile amano ku fyo Yehova aletwafwa pa kuti twingashipikisha amafya ayo twalekwata, ukucila ukubika amano ku mafya, twalishininkishe ukuti Yehova ali no kutwalilila ukutwafwa na mu mafya ayo tukakwata ku ntanshi.
17. Bushe ba Helga balebasansamusha shani? (Moneni ne cikope.)
17 Bamunyinefwe na bankashi nabo kuti batusansamusha. Kuti batusansamusha shani? Natulande pali ba Helga abekala ku Hungary. Pa myaka iingi balikwete amafya ayalengele balesakamikwa kabili ayalelenga baleumfwa ukuti tabacindeme. Nga batontonkanya pa mafya bakwete balamona ukuti Yehova alebasansamusha ukupitila muli bamunyinefwe na bankashi aba mu cilonganino. Balembele ukuti: “Lyonse Yehova alengafwa nga amona ukuti amaka yandi yalecepa pa mulandu wa ncito nalebomba, pa mulandu wa kutensha umwana wandi uwalwele, na pa mulandu wa mesho yambi. Pa myaka 30 iyapitapo cila bushiku Yehova alansansamusha nga fintu alaya. Alansansamusha ukupitila mu mashiwi ayasuma, ayo aba bwananyina banjeba. Ilingi line, ndapokelela meseji, kardi, nelyo amashiwi aya kunsansamusha pa nshita ndefwaya abakunsansamusha.”
Bushe Yehova kuti asansamusha shani abantu ukupitila muli imwe? (Moneni paragrafu 17)
18. Kuti twacita shani pa kuti tulesansamusha abantu?
18 Tulapashanya Yehova ukupitila mu kusansamusha aba bwananyina. Tumupashanya shani? Tulamupashanya nga tuli abatekanya, ilyo tulekutika ifyo balelanda, nga tuli ne cikuuku ilyo tulelanda nabo kabili nga tulebafwa mu fyo balekabila. (Amapi. 3:27) Tulesha na maka yesu yonse pa kuti tulesansamusha abalecula, ukubikako fye na bashibombela Lesa. Nga ca kuti abantu baleloosha, nabalwala, nelyo nabasakamikwa, tulakutika kuli bena kabili tulabebako amashiwi ya mu Baibo ayengabasansamusha. Nga tulepashanya Yehova “Lesa wa cisansamushi conse,” ninshi tatuleafwa fye Abena Kristu banensu pa kuti bengashipikisha amesho, lelo ifyo tucita kuti fyalenga na bashili Bena Kristu banensu bafwaya ukusambilila pali Yehova.—Mat. 5:16.
YEHOVA ALATWAFWA LYONSE
19. Finshi Yehova atucitila kabili kuti twamupashanya shani?
19 Yehova alasakamana sana bonse abamutemwa. Tatulekelesha nga natukwata amafya. Nga filya fine umufyashi asakamana umwana uo atemwa, e fyo na Yehova asakamana ababomfi bakwe aba cishinka. Alatutungulula, alatupekanishisha ifyo tukabila, alatucingilila, kabili alatusansamusha. Tulapashanya Shifwe wa ku muulu uwatutemwa nga ca kuti tuletungilila abantu abakwete amafya kabili nga tulebakoselesha. Muli cino calo kuti twakwata amafya, kabili kuti twaba no bulanda, lelo kuti twacetekela ukuti Yehova ukulaba na ifwe. Na kuba alitulaya ukuti: “Witiina pantu ndi na iwe.” (Esa. 41:10) Ifi atulaya filenga twashininkisha ukuti cine cine tatwaba fweka.
ULWIMBO 100 Muleafwa Abalekabila Ubwafwilisho
a Moneni icipande citila “Lekeni Ifyo Mulepingula Ukucita Filelanga Ukuti Mulacindika Lesa” mu Ulupungu lwa kwa Kalinda ulwa April 15, 2011.
b Moneni amaparagrafu 11-14 mu cipande citila “Twalilileni Ukukonka Ifyo Yehova Amutungulula” mu Ulupungu lwa kwa Kalinda ulwa February 2024.
c Kuti mwamona ifipande na fimbi pa webusaiti ya jw.org, nga mwalemba amashiwi ya kuti “ukwafwilisha abaponenwe na masanso ayakalamba” palya apa kufwaila ifyebo.
d Moneni icipande citila “Amepusho Ukufuma ku Babelenga” mu Ulupungu lwa kwa Kalinda ulwa February 2017.
e UBULONDOLOSHI BWA CIKOPE: Aba bwananyina mu Malawi, balepokelela ifintu ifyo balekabila kabili bamunyinefwe balebasansamusha pa numa ya kuponenwa no busanso ubukalamba.