Ifyo Mwingacita pa Kuti Muleibukisha Amalembo

Bushe calimukoselapo ukwibukisha ilembo ilyo mwatemwa sana? Nalimo lilembo ilimusansamusha, nelyo ililenga mwilatontonkanya pa fyabipa, nangu ilyo mwingafwaya ukwebako umuntu ifyo lilanda. (Amalu. 119:​11, 111) Natulandeko pali fimo ifyo mwingacita pa kuti muleibukisha amalembo.

• Mulebomfya JW Library. Kuti mwapanga icipande mu JW Library ico mwingalembapo ukuti “Amalembo ayo Natemwa Sana.” Muli ici cine cipande e mo mufwile ukulasungila Amalembo ayo mulefwaya ukulaibukisha.

• Mulebika ilembo apo mwingalalimona. Lembeni ilembo mulefwaya ukulaibukisha pe pepala no kulibika apo mwingalalimona lyonse. Bamo babika mupepi na mira; bambi pali friji. Bambi nabo balakopa ilyo ilembo e lyo babika ico cikope pali kompyuta nelyo pa foni pa kuti nga baisula fye kompyuta nelyo foni e cikope bakulamona.

• Mulelemba ilembo pali kardi. Lembeni ilembo ku lubali lumo ulwa kardi, e lyo mulembe amashiwi ayaba pali ilyo ilembo ku lubali lumbi ulwa kardi. Lyena nga mwalolesha ku lubali ulo mwalembako ilembo, esheni ukwibukisha amashiwi ayaba pali ilyo ilembo nelyo nga mwabelenga amashiwi, esheni ukwibukisha ilembo apo ayo amashiwi yaba.