Bushe Kuti Mwasambililako na Fimbi ku fyo Mwabalilepo Ukusambilila mu Baibo?

1. Mwacitile shani ilyo mwasambilile icine pa muku wa kubalilapo?

IFYO twabalilepo ukusambilila mu Baibo fyalilenga twa-aluka. Ku ca kumwenako ilyo twasambilile ukuti ishina lya kwa Lesa ni Yehova, twalitendeke ukuba ifibusa fyakwe. (Esa. 42:8) Ilyo twasambilile ifyo umuntu aba nga afwa, twalilekele ukutontonkanya ukuti balupwa lwesu abafwa balacula. (Luk. Mil. 9:10) Na kabili ilyo twasambilile pa fyo Lesa alaya ukuti lino isonde likaba Paradaise, twalilekele ukusakamana pa fyo ifintu fikaba ku ntanshi. Twalicetekele ukuti tatwakaleikala fye imyaka iinono, e kutila imyaka 70 nelyo 80, lelo tukekala umuyayaya.—Amalu. 37:29; 90:10.

2. Bushe ifyaba muli 2 Petro 1:​12, 13, filanga shani ukuti na Bena Kristu abakalamba mu fya kwa Lesa kuti basambililako fimo ku fyo basambilile kale?

² Tatufwile ukulamona ukuti ifyo twabalilepo ukusambilila mu Baibo tafyacindama. Kalata yalenga bubili iyo umutumwa Petro alembele, alembeele Abena Kristu abali ‘abakosa mu cine.’ (Belengeni 2 Petro 1:​12, 13.) Ilyo abalembeele iyi kalata, mu cilonganino mwali abantu ababipa abalefumya aba bwananyina mu cine. (2 Pet. 2:​1-3) Petro alefwaya ukukosha aba bwananyina pa kuti baicingilile ku fisambilisho fya bufi ifyo aba bantu balesambilisha. E ico alibebukisheko fimo ifyo basambilile kale. Ifyo basambilile kale ifyo abebukisheko fyali no kulenga batwalilila ukuba aba cishinka kuli Yehova.

3. Cinshi Abena Kristu bonse balingile ukulatontonkanishisha sana pa fyo babalilepo ukusambilila mu Baibo? Langilileni.

³ Nangu ca kuti twalibombela Yehova pa myaka iingi, kuti twasambililako ku fyo twabalilepo ukusambilila mu Baibo. Natulangilile: Uwaishiba sana ukwipika e lyo no ulesambilila ifya kwipika, kuti babomfya ifintu fimo fine ifya kubika mu fya kulya ifyo baleipika pa kuti fiwame. Nomba mu kupita kwa nshita, uwaishiba sana ukwipika kuti abomfya ifi fintu ifya kubika mu fya kulya pa kwipika ifya kulya mu nshila imbi pa kuti fiwame sana. Ifi fine e fyo caba na kubabombela Yehova pa myaka iingi e lyo na ba kuti e lyo batendeke ukusambilila Baibo. Ababombela Yehova pa myaka iingi kuti basambililako ifingi ku fyo babalilepo ukusambilila mu Baibo ukucila ifyo aba kuti e lyo batendeke fye ukusambilila Baibo bengasambililako. Cinshi twalandila ifi? Ukutula apo twabatishiwilwe, nalimo ifintu fyalyalukapo mu mikalile yesu nelyo imilimo tubombela Yehova yalyalukapo. Nomba nga twatontonkanya pa fyo twasambilile kale, tulamona ukutila kuti twafibomfya na mu fintu fimbi ukulingana ne fyo ifintu fili. Natumone ifyo abakalamba mu fya kwa Lesa bengasambilila ku masambililo yatatu ayo twabalilepo ukusambilila mu Baibo.

YEHOVA E WABUMBILE IFINTU FYONSE

4. Bushe ifi twaishiba ukuti Yehova e wabumbile ifintu fyonse, fyalenga twaba shani?

⁴ Baibo itila “uwabumbile ifintu fyonse ni Lesa.” (Heb. 3:4) Twalishiba ukuti uwabumbile planeti twikalamo ne fya mweo ifyabamo in Lesa, uwakwata sana amano na maka. Na ifwe e watubumbile, kanshi alitwishiba bwino sana. Na kabili alatusakamana, kabili alishiba ifingatuwamina. Ifi twaishiba ukuti Yehova e wabumbile ifintu fyonse fyalenga twa-aluka mu fintu ifingi, kabili fyalenga twaishiba ico twabela pano isonde.

5. Finshi twaishiba ifingalenga twaba abaicefya? (Esaya 45:​9-12)

⁵ Ifi twaishiba ukuti Yehova e wabumbile ifintu fyonse, kuti fyalenga twaba abaicefya. Ku ca kumwenako, pa nshita imo Yobo tabikile amano kuli Yehova kabili alecita ifyalelanga ukuti aleimona ukuti e wali uwalungama. Lelo Yehova alimwibukisheko ukuti ni Kabumba wa Maka Yonse. (Yobo 38:​1-4) Ifi Yehova aibukisheko Yobo fyalengele ailuka ukuti fyonse ifyo Yehova acita fyalilungama. Ifyo kasesema Esaya alembele pa numa filangilila ukuti fwe bantu tatufwile ukulamona ukuti tuli ba mano ukucila Kabumba. Alembele ati: “Bushe iloba kuti lyaipusha nakabumba aliti: ‘Cinshi ulebumba?’”—Belengeni Esaya 45:​9-12.

6. Ni lilali cingawama ukutontonkanya pa fyo Kabumba wesu Yehova akwata amano na maka? (Moneni ne fikope.)

⁶ Umwina Kristu nga alibombela Yehova pa myaka iingi, kuti atampa ukushintilila sana pa mano yakwe ukucila ukulashintilila pali Yehova na pa Cebo cakwe. (Yobo 37:​23, 24) Nomba kuti caba shani nga atontonkanya pa fyo Kabumba akwatisha amano na maka? (Esa. 40:22; 55:​8, 9) Nga ailuka ukuti Yehova e wabumbile ifintu fyonse, kuti aicefya kabili kuti aishiba ukuti ifyo Yehova atontonkanya fyalicila pa fyo ena atontonkanya.

7. Finshi nkashi Rahela acitile pa kuti asumine ifyo icilonganino ca kwa Lesa ca-alwile?

⁷ Nkashi Rahela uwikala ku Slovenia asanga ukuti nga atontonkanya pali Kabumba wakwe, cilamwangukila ukukonka ifyo icilonganino ca kwa Lesa calulako. Alandile ati: “Inshita shimo cilankosela ukukonka ifyo abatungulula batweba. Ku ca kumwenako, na lintu natambile Lipoti Yalenga 8 iye Bumba Litungulula iya mu 2023, nalipapile sana ilyo namwene pa muku wa kubalilapo munyinefwe alelanda ilyashi ninshi ali no mwefu. E ico nalilombele Yehova ukuti angafwe nsumine ifi ifya-alwike.” Nkashi Rahela alilwike ukuti apo Yehova ni Kabumba wa muulu ne sonde, alikwata amaka ya kutungulula bwino icilonganino cakwe. Nga ca kuti camukosela ukusumina ifyalwike, nelyo ukukonka ifyo icilonganino catweba, bushe te kuti ciwame mwatontonkanya sana pa mano na maka ayo Kabumba wesu akwata?—Rom. 11:​33-36.

ICO LESA ALEKELA ABANTU BALECULA

8. Bushe ifi twaishiba icalenga Lesa aleke abantu balecula fyalenga twaba shani?

⁸ Cinshi Lesa alekela abantu balecula? Abantu bamo abashasanga icasuko ca ici cipusho, balifulilwa Lesa nelyo batila takwaba Lesa. (Amapi. 19:3) Lelo imwe mwalisambilila ukuti ulubembu ulo twapyana no kukanapwililika e fyalenga abantu balecula, te Yehova iyo. Na kabili mwalisambilila ukuti ifi Yehova atekanya, fyalilenga abantu abengi nga nshi bamwishiba kabili baishiba ne fyo akacita pa kupwisha amafya umupwilapo. (2 Pet. 3:​9, 15) Ifi mwaishiba fyalenga mwakwata isubilo kabili mwapalama sana kuli ena.

9. Ni lilali maka maka tulingile ukutontonkanya pa calenga Yehova aleke abantu balecula?

⁹ Twalishiba ukuti tufwile ukutekanya ilyo tulelolela Yehova ukuti afumyepo amafya umupwilapo. Lelo nga tuli na mafya, batufyenga, nelyo twafwilwa, nangu nga ca kuti abantu abo twatemwa bakwata amafya ya musango uyu, kuti twalatontonkanya ukuti, ‘Mulandu nshi Yehova alekokwela ukupwisha amafya?’ (Haba. 1:​2, 3) Nga mwalatontonkanya ifi kuti cawama mwatontonkanya sana pa calenga Yehova aleke abalungama balecula.a (Amalu. 34:19) Na kabili tulingile ukutontonkanya sana pa fyo Yehova afwaya ukucita, e kutila ukupwisha amafya umupwilapo.

10. Finshi filenga ba Anne balesansamuka nangu ca kuti banyinabo balifwa?

¹⁰ Nga twaishiba icine pa calenga tulecula, kuti twalashipikisha amafya. Nkashi Anne uwikala pa cishi ca Mayotte, icaba pali bemba ya Indian Ocean alandile ati: “Ilyo bamayo bafwile, nali no bulanda sana. Lelo lyonse ndaibukishako ukuti Yehova te walenga tulecula. Alafwaisha ukufumyapo fyonse ifilenga tulecula kabili akabuusha na bantu besu abafwa. Nga natontonkanya pali ifi ndomfwako bwino kabili ndasansamuka.”

11. Bushe nga twaishiba ico Yehova alekela abantu balecula kuti twatwalilila shani ukubila imbila nsuma?

¹¹ Nga twaishiba icine pa co Lesa alekela abantu balecula, kuti twalafwaisha ukulabila imbila nsuma. Ilyo Petro alandile ukuti ifi Yehova atekanya kuti fyalenga abantu abalapila baisapusuka, alembele ati: “Imwe mufwile ukulacita ifilanga ukuti muli ba mushilo kabili muli ba cishinka kuli Lesa.” (2 Pet. 3:11) Fimo pa fyo tucita ifilanga ukuti tuli ba cishinka kuli Lesa, kulabila imbila nsuma. Nga filya fine Shifwe atemwa abantu, na ifwe bene e fyo twabatemwa. Tufwaya ukuti bakeseikala mu calo cipya ica kwa Lesa umukaba ubulungami. Yehova alitekanishisha abantu mu cifulo mubilamo imbila nsuma kabili alibapeela ishuko lya kuti bengasalapo ukulamupepa. Ala mwalishuka sana ifi mubombela pamo na Lesa pa kwafwa abantu abengi pa kuti bamwishibe ilyo impela ishilaisa!—1 Kor. 3:9.

TWIKALA MU “NSHIKU SHA KULEKELESHA”

12. Bushe ifi twaishiba ukuti twikala mu “nshiku sha kulekelesha” fyalenga twashininkisha finshi?

¹² Baibo yalilondolola bwino bwino ifyo abantu bali no kuba mu “nshiku sha kulekelesha.” (2 Tim. 3:​1-5) Nga twamona ifyo imibele ya bantu ili muli shino nshiku, tulashininkisha ukuti ifyo Baibo yasobele filefikilishiwa. Nga twamona ifyo imibele ya bantu ileya ilebipilako, tulashininkisha ukuti ifyo Icebo ca kwa Lesa cilanda fya cine.—2 Tim. 3:​13-15.

13. Bushe icilangililo Yesu alandile icaba muli Luka 12:​15-21, kuti calenga twayipusha mepusho nshi?

¹³ Ifi twaishiba ukuti twikala mu nshiku sha kulekelesha filenga tulebomfya bwino inshita yesu. Moneni ifyo twingasambililako pa kubomfya bwino inshita ku cilangililo Yesu alandile icaba muli Luka 12:​15-21. (Belengeni.) Cinshi umukankaala bamwitiile ukuti “we ciwelewele we”? Te pa mulandu wa kuti uyu muntu alikwete sana ifyuma, lelo ni pa mulandu wa fyo uyu muntu abikileko sana amano. Aleitutila ‘ifyuma, lelo ali uushacindama mu menso ya kwa Lesa.’ Filya ulya mukankaala ashalebomfya bwino inshita, cali cilubo icikalamba sana pantu ashele fye ne nshita iinono ninshi afwa. Lesa aebele ulya mwaume ati: “Lelo ubushiku balakwipaya.” Muno nshiku ilyo impela ya cino calo ileya ilepalamina, nalimo kuti twayipusha atuti: ‘Bushe ifyo mpanga ukucita filanga ukuti ndabomfya bwino inshita? Finshi nkoselesha abana bandi ukupanga ukucita? Bushe ndabomfya amaka yandi, inshita yandi ne fyuma fyandi ku kunonkelapo icuma na cimbi nelyo bushe mfibomfya ku kututila ifyuma ku muulu?’

14. Bushe ilyashi lya ba Miki lyalanga shani ubusuma bwaba mu kutontonkanya ukuti twikala mu nshiku sha kulekelesha?

¹⁴ Nga twatontonkanya sana pa filanga ukuti twikala mu nshiku sha kulekelesha, kuti tulesala bwino ifya kucita. Ifi fine e fyo nkashi Miki acitile. Alandile ati: “Ilyo napwishishe isukulu nalefwaisha ukuya mu kusambilila pa nama. Na kabili nalipangile ukubombako bupainiya bwa nshita yonse e lyo no kuya uko ababila imbila nsuma bacepa. Bamunyinefwe na bankashi mu cilonganino nali banjebele ukuti ntontonkanyepo sana pa kuti mone nga kuti nakumanisha ukuya mu kusambilila pa nama e lyo no kubomba bupainiya nangu ukuya uko ababila imbila nsuma bacepa. Banjebele ukuti cino calo cili mu kupwa, kabili banjebele no kuti mu calo cipya nkakwata inshita iikalamba iya kusambilila pa nama ishalekanalekana. E ico nasalilepo ukuya mu kusambilila pa fishali no kunsendela inshita iikalamba, kabili ifyali no kulenga naishiba ifya kubomba incito imo. Ifi nasambilile fyalengele naingila incito iyo nalesangilamo indalama sha kubomfya ilyo nalebomba bupainiya. Kabili pa numa nalile ku Ecuador ukwali ukukabila.” Pali ino nshita nkashi Miki no mwina mwakwe babomba umulimo wa kutandalila ifilonganino mu Ecuador mwine.

15. Nga fintu twasambilila ku lyashi lya kwa Yakobo, mulandu nshi tushifwile ukulamwena ukuti tatufwile ukubila imbila nsuma ku bantu abashifwaya ukukutika pali ino nshita? (Moneni ne fikope.)

¹⁵ Tatufwile ukufuupuka nga ca kuti abantu bakaana ukukutika imbila nsuma pa ku muku wa kubalilapo twabila kuli bena. Mulandu nshi? Pantu abantu balaaluka. Natulande pa ca kumwenako ca kwa Yakobo munyina wa kwa Yesu. Yakobo alemona uko Yesu alekula, aba Mesia, kabili alimwene no kuti takwali nangu umo uwacilile Yesu ukusambilisha. Na lyo line, pa myaka iingi tali umusambi wa kwa Yesu. Yakobo aishileba umusambi wa kwa Yesu uwacincila ilyo Yesu abuushiwe!b (Yoh. 7:5; Gal. 2:9) Mwilamona ukuti cili fye bwino nangu tamubilile imbila nsuma kuli balupwa lwenu abashifwaya ukukutika, nelyo ukubwelela ku bantu abashalefwaya ukukutika ilyo mwabilile imbila nsuma kuli bena. Muleibukisha ukuti twikala mu nshiku sha kulekelesha, kanshi tufwile ukwangufyanya ukubila imbila nsuma. Ifyo mwingabeba lelo kuti baisafibukisha ku ntanshi nalimo ninshi no bucushi bukalamba bwalitendeka, kabili kuti bafikonka no kufikonka.c

TWALILILENI UKUTASHA PA FYO YEHOVA ATWIBUKISHAKO

16. Bushe ifyo tusambililako ku fyo Yehova atwibukishako filenga twaba shani? (Moneni na kabokoshi akaleti “Mulefibomfya pa Kusambilisha Abantu Icine.”)

¹⁶ Abo bapekanishisha ifya kulya fya ku mupashi fimo ifyo tupokelela, bantu abashaishiba ifingi pa fyo Baibo isambilisha. Amalyashi ya ku cintubwingi ayabako cila mulungu, ifipande fimo na mavidio ifiba pa jw.org, e lyo na Ulupungu lwa bantu bonse na Loleni!, abo maka maka bapekanishisha ifi, te Nte sha kwa Yehova. Nangu caba ifi, na ifwe bene tulasambililamo fimo muli ishi mpapulo. Ifyo tusambililamo filalenga twatemwa sana Yehova, twatetekela sana Icebo cakwe, kabili filalenga twaishiba bwino ifya kusambilisha abantu icine ca mu Baibo.—Amalu. 19:7.

17. Ni lilali tulingile ukutontonkanya sana pa cine ca mu Baibo ico twabalilepo ukusambilila?

¹⁷ Fwe Nte sha kwa Yehova tulatemwa sana nga ca kuti ifyo twaishibe pe lembo limo bafyalula. Na lyo line tulatasha na pa cine ico twabalilepo ukusambilila icalengele twaba ifibusa na Yehova. Nga ca kuti twalafwaya fye ukukonka ifyo tuletontonkanya ukucila ukukonka ifyo icilonganino ca kwa Lesa ciletweba, tufwile ukuicefya no kwibukisha ukuti uutungulula icilonganino ni Kabumba wa Maka Yonse kabili uwa mano nga nshi. Nga ca kuti tuleshipikisha ubwafya nangu umuntu wesu aleshipikisha ubwafya, tufwile ukuba abatekanya no kutontonkanya sana pa co Lesa alekela abantu balecula. Kabili nga tulesalapo ifya kubomfya inshita yesu ne fintu fimbi ifyo twakwata, tufwile ukwibukisha ukuti twikala mu nshiku sha kulekelesha kabili inshita isheleko inono sana. Natulekonka ifyo Yehova atwibukishako pa kuti filetukosha, filelenga tuleba na mano kabili filelenga tulemubombela ne cishinka.