Bushe Mwalisambilila Ifya ‘Kuteka Umutima ku fyo Mwakwata’?

1. Bushe umuntu uwateka umutima aba shani, kabili ni mwi ukuteka umutima kushalola?

BUSHE mwaliteka umutima ku fyo mwakwata? Umuntu uwateka umutima ku fyo akwata alasekelela kabili alaba no mutende pantu abika amano ku fyo Lesa amupaala. Takalipa pa mulandu ne fintu ifyo ashakwata. Nomba ukuteka umutima ku fyo twakwata tacipilibula ukuti tulingile ukuilekelesha. Ku ca kumwenako, nga ca kuti Umwina Kristu alefwaya ukubombako imilimo ya kwa Lesa na imbi, ninshi talufyenye. (Rom. 12:1; 1 Tim. 3:1) Na lyo line, taleka ukusekelela nga ca kuti tabamupeele bwangu umulimo uo afwaisha ukubomba.

2. Mulandu nshi ukukanateka imitima ku fyo twakwata kwabipila?

² Nga tatutekele imitima ku fyo twakwata, kuti twailetela amafya ayengi. Abashateka imitima ku fyo bakwata, balabomba ama-awala ayengi pa kuti bakwate ifintu ifyo bashikabila no kukabila. Ku ca bulanda, Abena Kristu bamo balibapo ne ndalama ne fintu fimbi ifyo balekumbwa. Nalimo baletontonkanya abati, ‘kuti nasenda ici,’ ‘mfwile ukukwata ici cintu ili line,’ nelyo ‘nalabulapo indalama, nkabwekeshapo.’ Nomba ubupuupu bwa misango yonse bulakalifya Yehova kabili bulalenga twamuseebanya. (Amapi. 30:9) Aba bwananyina bamo balifuupuka sana pa mulandu wa kuti tababapeela imilimo iyo bafwaisha ukubomba, ne ci calenga baleka ukubombela Yehova. (Gal. 6:9) Cinshi cingalenga Umwina Kristu uwaipeela kuli Yehova acita icintu ca musango uyu? Nalimo icingalenga ca kuti alilekele ukuteka umutima ku fyo akwata.

3. Finshi tusambilila ku mashiwi yaba pa Abena Filipi 4:​11, 12?

³ Bonse fye kuti twasambilila ifya kuteka imitima ku fyo twakwata. Umutumwa Paulo alembele ukuti ‘alisambilile ukuteka umutima ku fyo alekwata inshita yonse.’ (Belengeni Abena Filipi 4:​11, 12.) Paulo alembele aya mashiwi ninshi ali mu cifungo. Nangu ca kuti ali mu cifungo, alitwalilile ukusekelela. Alisambilile ifya kuteka umutima ku fyo akwete. Nga catukosela ukuteka imitima ku fyo twakwata, ifyo Paulo alandile ne fyo ifintu fyali mu mikalile yakwe kuti fyalenga twashininkisha ukuti na ifwe bene kuti twasambilila ifya kuteka imitima ku fyo twakwata. Tatufwile ukulamona ukuti calyanguka ukuteka umutima ku fyo twakwata, lelo tulingile ukusambilila ifya kuteka imitima ku fyo twakwata. Kuti twacita shani pa kuti tusambilile ifya kuteka imitima ku fyo twakwata? Natulande pa fyo twingacita.

MULETASHA

4. Bushe ukulatasha kuti kwalenga shani twalateka imitima ku fyo twakwata? (1 Abena Tesalonika 5:18)

⁴ Umuntu uutasha, alateka umutima na ku fyo akwata. (Belengeni 1 Abena Tesalonika 5:18.) Ku ca kumwenako, nga ca kuti tulatasha pa fyo tukabila ifyo tukumanisha ukukwata, tatwakulasakamana sana pa fintu ifyo tufwaya ukukwata, lelo ifyo tushakwata. Nga tuletasha Yehova pa milimo tumubombela, tukalabika sana amano ku fyo twingacita pa kuti tulebombesha muli iyo ine milimo, ukucila ukulabika fye amano ku kufwaya ukuti batupeele imilimo imbi. E mulandu wine Baibo itukoselesesha ukuti tulepepa na mapepo ya kutasha Yehova! Nga tuletasha, tukalaba no “mutende wa kwa Lesa uwacila pa fyo twaishiba.”—Fil. 4:​6, 7.

5. Finshi abena Israele bali no kulatashishapo Yehova? (Moneni ne cikope.)

⁵ Natulande pa fyo abena Israele bacitile. Ilyo bali mu matololo, pa miku iingi baleilishanya kuli Yehova ukuti tabalekwata ifya kulya ifyo balelya ilyo bali mu Egupti. (Impe. 11:​4-6) Kwena imikalile yalikosele ilyo bali mu matololo. Finshi balingile ukucita pa kuti baleteka imitima ku fyo balekwata? Balingile ukulatontonkanya pali fyonse ifyo Yehova abacitiile, kabili balingile ukulamutasha. Ilyo abena Israele bali mu Egupti umo babatekele ubusha, Yehova aletele ifinkunka 10 pa bena Egupti pa kuti abapusushe. Ilyo Yehova abalubwile mu busha, “balisendele ifipe fya bena Egupti,” e kutila silfere, golde ne fya kufwala. (Ukufu. 12:​35, 36) Ilyo bafikile ku lulamba lwa Bemba ya Kashika ninshi abena Egupti balebakonka ulubilo, Yehova apaatwile amenshi ya muli iyi bemba mu cisungusho. Na kabili ilyo bali mu matololo, cila bushiku alebapeela mana. Nomba mulandu nshi abena Israele baleilishanishisha pa fya kulya? Icalengele baleilishanya ni co tabatekele imitima ku fyo bakwete, pantu ifya kulya ifyo balekabila fyena balekwata. Lelo tabaletasha pali fyonse ifyo Yehova alebapeela.

6. Finshi fimo ifyo tulingile ukulacita pa kuti tuletasha?

⁶ Nomba kuti mwacita shani pa kuti muletasha? Ica kubalilapo, cila bushiku muletontonkanya pa fisuma ifilenga muleba ne nsansa. Nga mulefwaya kuti mwalemba ifintu fibili nelyo fitatu ifyo mwingatashishapo Yehova. (Inyimbo 3:​22, 23) Icalenga bubili, muletasha. Muleitendekelako ukutasha abantu pa fyo bamucitila. Ne cacilapo ukucindama, muletasha Yehova cila bushiku. (Amalu. 75:1) Icalenga butatu, mulesala abantu abatasha e bo baleba ifibusa fyenu. Abanenu nga balatasha, na imwe bene mwakulatasha, lelo nga tabatasha, na imwe bene tamwakulatasha. (Amala. 1:​26-28; 2 Tim. 3:​1, 2, 5) Nga tulebika amano ku fintu ifyo twingatashishapo Yehova na bantu, tatwakulabika amano ku fintu ifyo tushakwata.

7. Finshi nkashi Aci acitile pa kuti aletasha, kabili finshi fyafuminemo?

⁷ Natulande pali nkashi Aci uwa ku Indonesia. Alandile ati: “Ilyo kwali icikuko ca COVID-19 natampile ukulailinganya ku ba bwananyina. Ifi nalecita fyalengele naleka ukulateka umutima ku fyo nakwete.” (Gal. 6:4) Finshi uyu nkashi acitile pa kuti aluke mu fyo aletontonkanya? Atile: “Natendeke ukulabika amano ku fyo Yehova alempaala cila bushiku, kabili naletontonkanya pa fisuma ifingi ifyo nakwata pa mulandu wa kuti naba mu cilonganino ca kwa Lesa. Lyena naletasha Yehova pali ifi fyonse. Ifi natampile ukucita fyalengele nalateka umutima ku fyo nakwete.” Nga ca kuti na imwe tamuteka umutima ku fyo mwakwata, bushe te kuti ciwame mwacita nge fi nkashi Aci acitile pa kuti muletasha?

MWILAPUMBULWA KABILI MULEBA ABAICEFYA

8. Finshi Baruki acitile pa nshita imo?

⁸ Pa nshita imo, Baruki uwali kalemba wa kwa kasesema Yeremia tatekele umutima ku fyo akwete. Umulimo Baruki alebomba uwa kutungilila Yeremia ilyo alebila imbila ya bupingushi pa luko ulushaletasha Yehova, wali uwakosa. Inshita imo Baruki alipumbwilwe. Mu cifulo ca kuti alebomba umulimo uo Yehova alefwaya ukuti alebomba, ena atampile ukulabika amano ku fyo alefwaya umwine. Yehova ukupitila muli Yeremia aebele Baruki ati: “Ulefwaya ukukwata ifintu ifikalamba. Leka ukufwaya ifyo fintu.” (Yer. 45:​3-5) Mu nshila imbi Yehova ale-eba Baruki ukuti: “Teka umutima ku fyo ukwete.” Baruki alikonkele ifyo Yehova amwebele, kabili alitwalilile ukuba cibusa wakwe.

9. Ukulingana na mashiwi yaba pali 1 Abena Korinti 4:​6, 7, bushe nga tuli abaicefya kuti twailuka cinshi? (Moneni ne fikope.)

⁹ Inshita shimo, Umwina Kristu kuti alatontonkanya ukuti bafwile fye ukumupeela umulimo umo mu cilonganino ca kwa Lesa. Nalimo ico engalatontonkanishisha ifi, ni co alishiba sana ukubomba imilimo imo, alabombesha nelyo alibombela Yehova pa myaka iingi. Nomba nalimo bambi e bo bengapeela umulimo uo afwaisha ukubomba. Finshi engacita pa kuti eumfwa ububi sana? Kuti atontonkanya pa mashiwi ayo umutumwa Paulo alembele ayaba pali 1 Abena Korinti 4:​6, 7. (Belengeni.) Imilimo yonse iyo bengatupeela, yafuma kuli Yehova kabili e walenga tube abacenjela muli fyonse ifyo twacenjelamo. Yehova tatupeela iyi milimo pa mulandu wa kuti twalicindama ukucila abantu bambi. Lelo ico atupeelela ifi fyonse mulandu wa cikuuku cakwe icaibela ico atulanga.—Rom. 12:​3, 6; Efes. 2:​8, 9.

10. Kuti twacita shani pa kuti tube abaicefya?

¹⁰ Kuti twaba abaicefya nga tuletontonkanya sana pa fyo Yesu ali. Tontonkanyeni pa fyacitike mu nshita ya bushiku ilyo Yesu asambile amakasa ya basambi bakwe. Umutumwa Yohane alembele ati: ‘Apo Yesu alishibe ukuti Wishi alibikile fyonse mu minwe yakwe no kuti afumine kuli Lesa kabili aleya kuli Lesa, atendeke ukusamba amakasa ya basambi.’ (Yoh. 13:​3-5) Yesu nga atontonkenye ukuti abasambi e balingile ukumusamba amakasa. Nomba ilyo Yesu ali pano isonde, tatalile atontonkanyapo ukuti apo ali Mwana wa kwa Lesa, alingile ukukwata ing’anda iisuma, indalama ishingi nelyo alingile ukulaikala ubwanalale. (Luka 9:58) Yesu ali uwaicefya kabili alitekele umutima ku fyo akwete. Ifi fine e fyo na ifwe bene tufwile ukuba.—Yoh. 13:15.

11. Bushe ukuicefya kwalenga shani ba Dennis bateka umutima ku milimo bakwata mu cilonganino?

¹¹ Munyinefwe Dennis uwa ku Netherlands alesha na maka yakwe yonse pa kuti alepashanya Yesu. Alandile ati: “Inshita shimo ndomfwa ububi nga ca kuti uwa bwananyina bamupeela umulimo uo mona ukuti nine mfwile uku-ubomba. Nga natampa ukumfwa ifi, ntendeka ukuisambilisha pa mibele ya kuicefya. Mu JW Library yandi nalibika ifishibilo pa Malembo ayalanda pa kuicefya. Ifi nacita filenga ndeyasanga bwangu lyonse ilyo ndefwaya ukuyabelenga. Na kabili, nalikopolwela amalyashi ayalanda pa kuicefya mu foni yandi pa kuti ndeyakutika lyonse ilyo nafwaya ukuyakutika.a Nalisambililako ukuti ico tubombela imilimo yonse iya kwa Yehova, ni co tufwaya abantu balemulumbanya, te kufwaya abantu baletulumbanya. Yehova alitusuminisha ukuti tulebombako imilimo yakwe, lelo e ulenga tulebomba bwino iyi milimo.” Nga ca kuti mulomfwa ububi pa mulandu wa kuti tabamupeela umulimo uo mufwaisha ukubomba mu cilonganino, mufwile ukucitapo cimo pa kuti mube abaicefya. Nga mwacitapo cimo, bucibusa bwenu na Yehova bukaba ubwakosa kabili mukateka umutima ku fyo mwakwata.—Yako. 4:​6, 8.

MULETONTONKANYA SANA PA FYO YEHOVA ATULAYA

12. Finshi Yehova atulaya ifilenga twateka imitima? (Esaya 65:​21-25)

¹² Nga tuletontonkanya sana pa fisuma ifyo Yehova atulaya, kuti twateka imitima ku fyo twakwata. Mwi buuku lya kwa Esaya, Yehova alitweba ukuti alishiba ukutila tulakwata amafya ayengi. Lelo alitulaya ukuti ali no kupwisha aya amafya yonse. (Belengeni Esaya 65:​21-25.) Alitulaya ukuti tukalaikala mu mayanda ayasuma, tukalabomba imilimo iisuma kabili tukalalya ifya kulya ifisuma. Tatwakulasakamana ukuti nalimo ifyabipa kuti fyatucitikila nelyo kuti fyacitikila abana besu. (Esa. 32:​17, 18; Esek. 34:25) Twalishininkisha ukuti fyonse ifyo Yehova atulaya, akafikilisha.

13. Ni lilali maka maka tulingile ukulatontonkanya sana pa fyo Yehova atulaya?

¹³ Mulandu nshi tulingile ukulatontonkanishisha pa fyo Yehova atulaya? Ni co twikala “mu nshiku sha kulekelesha” kabili bonse tulakwata amafya ‘aya-afya nga nshi.’ (2 Tim. 3:1) Cila bushiku Yehova alatupandako amano, alatukosha kabili alatutungilila pa kuti tuleshipikisha amafya ayo tukwata. (Amalu. 145:14) Na kabili, ifyo Yehova atulaya filalenga tuleshipikisha amafya ayo tukwata. Nalimo cilamukosela pa kuti mulepekanishisha ulupwa lwenu ifya kulya, ifya kufwala no mwa kwikala. Bushe ici cilolele mu kuti ifi fine e fyo ifintu fikatwalilila fye ukuba? Awe! Yehova alilaya ukuti akulamupeela ifyo mukalakabila, kabili mu Paradaise akamupeela ifintu ifingi nga nshi. (Amalu. 9:18; 72:​12-14) Nalimo cila bushiku mulakalipwa sana, mwalikwata amasakamika nelyo mwalilwala ubulwele ubukalamba. Bushe mukalacula fye umo shacela? Awe nakalya! Mu calo cipya ica kwa Lesa, tamwakabe amalwele kabili abantu tabakalefwa. (Ukus. 21:​3, 4) Ili isubilo lilalenga tuleteka imitima kabili twilaumfwa ububi sana pa mafya ayo tukwata pali ino nshita. Na kabili, ili isubilo lilalenga tuleteka imitima nga batufyenga, nga twafwilwa, nga twalwala nelyo nga twakwata ubwafya bumbi. Mulandu nshi? Pantu nangu tukwate ubwafya bwa musango shani pali ino nshita, twalishiba ukuti amafya twingakwata ya pa kashita fye. Twalishiba no kuti mu calo cipya amafya yonse yakapwa.—2 Kor. 4:​17, 18.

14. Kuti twacita shani pa kuti tukoshe isubilo lyesu?

¹⁴ Apo isubilo lilalenga twateka imitima ku fyo twakwata, finshi twingacita pa kuti tushininkishe ukuti Yehova akafikilisha fyonse ifyo atulaya? Nga filya fine umuntu uushimwenesha alingile ukufwala amaglasi pa kuti amone ifintu ifili apatali, e fyo na ifwe bene tulingile ukucitapo cimo pa kuti isubilo lyesu ilya fintu ifisuma ifyo Yehova atulaya libe ilyakosa. Nga ca kuti natusakamana sana pa mulandu wa kuti tatukwete indalama sha kushitamo ifyo tulekabila, tule-elenganya ifyo tukalaikala mu calo umo abantu bashakulakabila indalama, kabili umushakabe umupiina nangu umo. Na kabili nga ca kuti tulomfwa ububi pa mulandu wa kuti tabatupeela umulimo uo tufwaisha ukubomba mu cilonganino ca kwa Yehova, tuleibukisha ukuti imilimo iyo tukalabombela Yehova ilyo tukaba abapwililika, ikacila sana pa milimo iyo twingafwaya ukumubombela pali ino nshita, pantu tukamubombela pa myaka iingi nga nshi. (1 Tim. 6:19) Pa mulandu wa kuti pali ino nshita tulasakamana sana pa fintu ifingi, kuti catukosela ukutontonkanya sana pa fyo Yehova atulaya. Nomba nga twatwalilila ukutontonkanya pa fyo Yehova atulaya, cikatwangukila ukulatontonkanya sana pali ifi fintu, ukucila ukwikalila fye ukulatontonkanya pa mafya ayo tukwata.

15. Finshi mwasambilila ku fyo ba Christa balandile?

¹⁵ Natulande pa fyo isubilo lyakosha nkashi Christa uwaupwa kuli ba Dennis abo tulandilepo kale. Alandile ati: “Nalilwala ubulwele ubulenga nilakwata sana amaka, kabili apo te kuti nyende, ilingi line ndala fye. Cila bushiku umubili onse ulakalipa. Nomba line badokota banjebele ukuti nshakapole. Ilyo line natontonkenye nati, ‘Isubilo bakwata te lyo ine nakwata.’ Nabika amano ku fyo ifintu fikawama ku ntanshi, kabili ici cilenga nilasakamikwa sana. Muli cino calo, mfwile ukushipikisha amafya ayengi, lelo mu calo cipya nkalaikala bwino sana ukwabula amafya nangu yamo!”

“ABAMUTIINA TABABULISHA NANGU CIMO”

16. Cinshi calengele Imfumu Davidi ilembe ukuti abatiina Yehova “tababulisha nangu cimo”?

¹⁶ Nangu ca kuti twaliteka imitima ku fyo twakwata, amafya yena tulakwata. Tontonkanyeni pa Mfumu Davidi. Yalifwililwepo abana batatu, bali-ibepeshepo ubufi, bali-ipondokelepo kabili pa myaka iingi Imfumu Shauli yalefwaya ukwipaya Davidi. Nangu ca kuti Imfumu Davidi yalikwetepo aya mafya yonse, yalitekele umutima. Yalandile pali Yehova aiti: “Abamutiina tababulisha nangu cimo.” (Amalu. 34:​9, 10) Cinshi calengele ilande ifi? Ni co yalishibe ukuti, nangu ca kuti Yehova tacincintila amafya ayo twingakwata, ali no kulamupeela ifyo alekabila. (Amalu. 145:16) Na ifwe bene kuti twacetekela ukuti Yehova akulatwafwa pa kuti tuleshipikisha amafya yonse ayo twingakwata. Kanshi kuti twateka imitima.

17. Cinshi mulingile ukutekela umutima ku fyo mwakwata?

¹⁷ Yehova afwaya ukuti muleteka umutima ku fyo mwakwata. (Amalu. 131:​1, 2) E ico mule-esha na maka yenu yonse pa kuti musambilile ifya kuteka umutima ku fyo mwakwata. Nga ca kuti muleibikilishako pa kuti muletasha, pa kuti mwilapumbulwa, pa kuti muleba abaicefya kabili nga mulekosha isubilo lyenu, kuti mwalanda amuti: ‘Nalisambilila ukuteka umutima ku fyo nakwata.’—Fil. 4:11.