Ilyo Muleisambilisha, Muletontonkanya pa fyo Mwingebako Abantu Ifyo Mwalasambilila

Nga twaisambilisha ifya mu Baibo, tulomfwa bwino. Lelo tulomfwa bwino sana nga ca kuti twaebako abantu ifyo tusambilile. Pa Amapinda 11:​25, Baibo itila: “Onse uupeela bambi amenshi ya kunwa na o bakamupeela.”

Nga twaebako abantu ifyo tusambilile, cilatwangukila ukwibukisha ifishinka ifyo tusambilile kabili tulafyumfwikisha. Na kabili, apo ifishinka twingabebako kuti fyabafwa, tulomfwa bwino nga twabebako.—Imil. 20:35.

Mukesheko ifi: Mu mulungu uleisa, mukeshe ukwebako umuntu ifyo musambilile. Kuti mwaebako lupwa lwenu, uwa bwananyina mu cilonganino, uo mubomba nankwe, uo musambilila nankwe, umwina mupalamano nelyo umuntu umbi uo mukabilako imbila nsuma. Mukeshe ukumulondolwela ifishinka mu mashiwi yenu kabili mu nshila iya-anguka ukumfwa.

Ico mufwile ukulaibukisha: Ico mulefwaila ukwebelako abantu ifyo musambilile, kufwaya ukubakoselesha, te kufwaya ukuilanga ukuti mwalishiba ifingi.—1 Kor. 8:1.