Ifyo Yehova Atwafwa pa Kuti Tuleshipikisha

1. Mulandu nshi tulingile ukulashipikishisha, kabili nani engatupeela amaka pa kuti tuleshipikisha? (1 Petro 5:10)

MULI shino nshiku sha kulekelesha isha-afya, abantu ba kwa Yehova balingile ukulashipikisha. Bamo balilwala amalwele ayashipola. Bambi balifwilwa. Bambi nabo balupwa lwabo balabacusha nelyo abalashi ba buteko balabacusha pa mulandu wa kuti balabombela Yehova. (Mat. 10:​18, 36, 37) Kuti mwacetekela ukuti nangu mwingakwata amafya ya musango shani, Yehova kuti amupeela amaka pa kuti mutwalilile ukushipikisha.—Belengeni 1 Petro 5:10.

2. Nani apeela fwe Bena Kristu amaka ya kushipikisha amafya?

² Ukushipikisha cipilibula ukutwalilila ukuba aba cishinka kuli Yehova no kulasekelela ilyo tulemubombela nangu tukwate amafya ya musango shani, nangu baletucusha, nelyo twatunkwa ukucita ulubembu. Na kabili pa kuti tuleshipikisha, tulingile ukusumina ukuti ifintu fikawama ku ntanshi. Fwe Bena Kristu te kuti tushipikishe nga ca kuti Yehova tatupeele amaka ya kushipikisha pantu e utupeela “amaka ayacila aya bantunse.” (2 Kor. 4:7) Muli cino cipande, twalasambilila pa nshila 4 isho Yehova atwafwilamo pa kuti tutwalilile ukushipikisha. Twalasambilila na pa fyo twingacita pa kuti ishi nshila shilelenga tuleshipikisha.

IPEPO

3. Mulandu nshi citupapushisha ifi Yehova atusuminisha ukulapepa kuli ena?

³ Yehova alitubikilako icintu ica kupapusha icilenga tuleshipikisha. Alitusuminisha ukulalanda nankwe nangu ca kuti tuli babembu. (Heb. 4:16) Tontonkanyeni pali ici: Kuti twapepa kuli Yehova inshita fye iili yonse kabili kuti twapepela pali conse ico tulefwaya. Kuti aumfwa nga twapepa mu lulimi lonse ulo twingapepelamo. Kuti aumfwa konse uko twingaba nangu ca kuti ilyo tulepepa tuli fweka nelyo tuli mu cifungo. (Yona 2:​1, 2; Imil. 16:​25, 26) Na lintu tusakamikwe sana ica kuti tatwishibe ne fya kumweba, aleshiba ifyo tulefwaya ukulanda. (Rom. 8:​26, 27) Ala cilatupapusha ifi Yehova atusuminisha ukulapepa kuli ena!

4. Cinshi twingalandila ukuti nga twalomba ukuti Yehova atwafwe pa kuti tushipikishe ninshi ico twalomba nacilingana ne fyo afwaya?

⁴ Yehova alitweba mu Cebo cakwe ukuti “conse ico twalomba, cikulu fye nacilingana ne fyo Lesa afwaya, alatumfwa.” (1 Yoh. 5:14) Bushe kuti twalomba Yehova ukuti atwafwe pa kuti tushipikishe? Ee! Pantu afwaya tuleshipikisha. Cinshi twalandila ifi? Ni co nga twashipikisha amafya, tulalenga Yehova ashinina Satana Kaseebanya, uumusuusha. (Amapi. 27:11) Na kabili, Baibo ilanda ukuti Yehova alafwaisha ukupeela abantu amaka “ababa ne mitima ya cishinka kuli ena.” (2 Imila. 16:9) E ico kuti twacetekela ukuti Yehova alikwata amaka ya kutwafwa kabili alafwaya ukutwafwa pa kuti tuleshipikisha amafya.—Esa. 30:18; 41:10; Luka 11:13.

5. Bushe ipepo kuti lyalenga shani twaba no mutende? (Esaya 26:3)

⁵ Baibo itila nga twalondolwela Yehova ifitusakamike, alatupeela “umutende wa kwa Lesa uwacila pa fyo twaishiba,” kabili uyu mutende “ukalinda imitima [yesu] na matontonkanyo [yesu].” (Fil. 4:7) Tulatasha sana pali ifi Yehova atucitila. Abantu abashibombela Yehova nabo bene balakwata amafya kabili balesha inshila ishalekanalekana pa kuti bengakwata umutende. Ku ca kumwenako, abantu bamo balaleka ukutontonkanya pa fintu fyonse pa kuti bengakwata umutende. Umuntu nga aleka ukutontonkanya pa fintu fyonse, ifibanda kuti fyatampa ukumutungulula. Ici kuti cabipa sana. (Linganyeniko Mateo 12:​43-45.) Nangu ca kuti abantu nga bacita ifi balakwata umutende, umutende bakwata te kuti ulingane no mutende wa cine uo Yehova atupeela. Nga twapepa kuli Yehova, tulanga ukuti e o twacetekela sana kabili na o ‘alatwalilila ukutupeela umutende.’ (Belengeni Esaya 26:3.) Cimo ico Yehova acita pa kutupeela umutende, kutwafwa pa kuti twibukishe icine ico twasambilila mu Cebo cakwe. Ifyo tusambilila mu Cebo cakwe fitwibukishako ukuti alitutemwa kabili alafwaya ukutwafwa. Ne ci cilenga twilasakamikwa sana.—Amalu. 62:​1, 2.

6. Finshi mwingapepelapo? (Moneni ne cikope.)

⁶ Ifyo mwingacita. Nga ca kuti namukwata ubwafya, mule-eba Yehova ifyo muleumfwa, ‘mulepoosa icisendo cenu pali Yehova’ kabili mulemulomba ukuti alelenga muleba no mutende. (Amalu. 55:22) Mulemulomba no kuti alemupeela amano pa kuti muleishiba ifya kucita pa bwafya mukwete. (Amapi. 2:​10, 11) Na kabili, mwilalaba ukutasha Yehova ilyo mulepepa kuli ena. (Fil. 4:6) Ilyo muleshipikisha ubwafya, mulebika amano ku filelanga ukuti Yehova alemutungilila kabili mulemutasha pa fyo amutungilila. Mwilaleka ubwafya mukwete bwalenga mwafilwa ukulamona ifyo Yehova alemupaala.—Amalu. 16:​5, 6.

ICEBO CA KWA LESA

7. Bushe Baibo kuti yatwafwa shani pa kuti tushipikishe ubwafya?

⁷ Yehova alitupeela Icebo cakwe Baibo icingatwafwa pa kuti tuleshipikisha amafya. Mu Baibo mwaliba ifikomo ifingi ifilenga twashininkisha ukuti Yehova kuti atwafwa nga natukwata ubwafya. Natulandeko pa fyo icikomo cimo cilanda. Pali Mateo 6:​8, Baibo itila: “Shinwe aleshiba ifyo mukabila na lintu tamulamulomba.” Yesu e walandile aya mashiwi, e lyo takwaba nangu umo uwaishiba Yehova ukucila ifyo Yesu amwishiba. Kanshi kuti twashininkisha ukuti nga natukwata ubwafya, Yehova aleshiba ifyo tukabila kabili kuti atwafwa. Mu Baibo mwaliba ifikomo na fimbi ifingi ifilanga ukutila kuti atupeela amaka ya kushipikisha ubwafya tukwete.—Amalu. 94:19.

8. (a) Lishinte nshi limo ilya mu Baibo ilingalenga twashipikisha ubwafya? (b) Cinshi cingatwafwa pa kuti twibukishe amashinte ya mafunde ya mu Baibo ayo twingakonka?

⁸ Amashinte ya mafunde ya mu Baibo nayo yene kuti yalenga twashipikisha ubwafya pantu yalalenga twaba na mano ayengalenga twalasala bwino ifya kucita. (Amapi. 2:​6, 7) Ku ca kumwenako, Baibo itweba ukuti tufwile ukuleka ukusakamikwa pa fikacitika ku ntanshi, lelo tulingile ukulashintilila pali Yehova cila bushiku. (Mat. 6:34) Nga ca kuti tulabelenga Baibo cila bushiku kabili tulatontonkanya sana pa fyo ilanda, tukalaishiba ifya kucita pa kuti tuleshipikisha ubwafya twakwata.

9. Bushe amalyashi ya mu Baibo yalenga shani twashininkisha ukuti Yehova kuti atwafwa?

⁹ Mu Baibo mwaliba na malyashi ya bantu abali fye nga ifwe bene abacetekele Yehova abo ayafwile. (Heb. 11:​32-34; Yako. 5:17) Nga twatontonkanya pali aya malyashi tulacetekela ukuti Yehova “e cubo cesu kabili e utupeela amaka, kuti atwafwa lyonse ilyo twaba na mafya.” (Amalu. 46:1) Kabili nga twatontonkanya pa fyo ababomfi ba kwa Yehova batwalilile ukuba aba cishinka kuli ena na lintu bakwete amafya, na ifwe bene tulafwaisha ukubapashanya.—Yako. 5:​10, 11.

10. Finshi mwingacita pa kuti Baibo ilemwafwa sana?

¹⁰ Ifyo mwingacita. Cila bushiku mulebelenga Baibo kabili mulelemba na malembo ayo mulemona ukutila kuti yamwafwa sana. Aba bwananyina abengi balabelenga amalembo ya cila bushiku ulucelo. Ifi bacita filenga balekwata ifintu ifisuma ifya kutontonkanyapo akasuba konse. Ifi fine e fyo bankashi Mariea balecita. Ilyo abafyashi babo bonse babili bali mupepi no kufwa pa mulandu wa kuti balilwele ubulwele bwa kansa, ba Marie batile: “Cila lucelo nalebebeta ilembo lya bushiku kabili naletontonkanya sana pa fyo lyalelandapo. Ifi nalecita fyalelenga ndetontonkanya pali Yehova na pa fisuma ifyo atusambilisha mu Cebo cakwe ukucila ukulatontonkanya fye pa mafya ayo nakwete.”—Amalu. 61:2.

ABA BWANANYINA

11. Tumfwa shani nga twaishiba ukuti na ba bwananyina bambi nabo balashipikisha amafya ayo tukwata?

¹¹ Inshila na imbi iyo Yehova atwafwilamo pa kuti tuleshipikisha amafya, ba bwananyina abo atupeela. Nga twaishiba ukuti bamunyinefwe bonse pano calo ‘balakwata amacushi nga aya yene na ifwe tukwata,’ tulasansamuka pantu tuleshiba ukuti te ifwe fweka tukwata aya macushi. (1 Pet. 5:9) Ici cilolele mu kuti amafya ayo twakwata, bamunyinefwe bamo nabo baliyakwatapo kabili baliyashipikishapo. Kanshi na ifwe bene kuti twashipikisha.—Imil. 14:22.

12. Bushe aba bwananyina kuti batwafwa shani, kabili finshi na ifwe twingabacitila? (2 Abena Korinti 1:​3, 4)

¹² Aba bwananyina kuti batukoselesha ilyo tuleshipikisha amafya. Ifi fine e fyo cali ku mutumwa Paulo. Ilingi line aletasha aba bwananyina abalemwafwa ilyo bamukakiile mu ng’anda. Kabili alebalumbula na mashina pa kubatasha. Balemusansamusha, balemukoselesha, kabili balemwafwa na mu fyo alekabila. (Fil. 2:​25, 29, 30; Kol. 4:​10, 11) Na muno nshiku mwine, aba bwananyina balatusansamusha, balatukoselesha kabili balatwafwilisha mu fyo tukabila. Nga tulekabila aba kutwafwa pa kuti tutwalilile ukushipikisha ubwafya, aba bwananyina balatwafwa kabili na ifwe bene tulabafwa nga balekabila ubwafwilisho.—Belengeni 2 Abena Korinti 1:​3, 4.

13. Cinshi calengele ukuti nkashi Maya ashipikishe ubwafya akwete?

¹³ Aba bwananyina balikoseleshe sana nkashi Maya uwa ku Russia. Mu mwaka wa 2020, bakapokola balipikite ing’anda yakwe kabili bamupeele umulandu wa kwebako abantu ifyo asuminamo. E ico aleya mu kulubulula ku cilye. Nkashi Maya alandile ati: “Pali ilya nshita nalenaka sana, nalesakamikwa sana kabili nali no bulanda. Lelo aba bwananyina balentuminako amafoni, balenembelako amameseji kabili balenembelako amakalata. Balenjeba ukuti balintemwa sana. Kwena nalishibe ukuti aba bwananyina balintemwa kabili baba fye ngo lupwa lwandi, nomba ukutendekela mu 2020, nalishininkisha sana ukuti balintemwa.”

14. Finshi tufwile ukucita pa kuti aba bwananyina baletwafwa ilyo tuleshipikisha amafya? (Moneni ne cikope.)

¹⁴ Ifyo mwingacita. Ilyo muleshipikisha amafya, mwilaitalusha ku ba bwananyina. Mwilashimunuka ukweba baeluda ukuti bamwafwe. Baeluda kuti baba “ngo mwa kufisama ku mwela, kabili . . . nge cifulo ca kuubamo imfula iikalamba.” (Esa. 32:2) Muleibukisha no kuti Abena Kristu banenu nabo baleshipikisha amafya. E ico nga mwacitila uwa bwananyina ifisuma, mukaba ne nsansa. Ne ci cikalenga mukaleshipikisha amafya.—Imil. 20:35.

ISUBILO

15. Bushe isubilo lya-afwile shani Yesu, kabili na ifwe litwafwa shani? (AbaHebere 12:2)

¹⁵ Yehova alitupeela isubilo lya cine cine, kabili ili subilo lilalenga tuleshipikisha amafya. (Rom. 15:13) Ibukisheni ukuti icalengele Yesu ashipikishe ubwafya ubukalamba ubo akwete pa bushiku alekelesheko ukuba umumi, lisubilo ilyo akwete. (Belengeni AbaHebere 12:2.) Yesu alishibe ukuti nga atwalilila ukuba uwa cishinka kuli Yehova, ali no kulenga caishibikwa ukuti fyonse ifyo Satana alanda pali Yehova fya bufi. Kabili cali no kwishibikwa no kuti Yehova e walinga ukucindikwa. Yesu alesubila no kuyaba pamo na Wishi wa ku muulu na kabili. Alesubila no kuti mu kupita kwa nshita ali no kuba Imfumu kabili ali no kuteka pamo na ba 144,000. Na ifwe bene isubilo twakwata ilya kwikala umuyayaya mu calo cipya ica kwa Lesa, lilalenga tuleshipikisha amafya ayo tukwata muli cino calo ico Satana ateka.

16. Bushe isubilo lya-afwile shani nkashi Anna pa kuti atwalilile ukushipikisha ubwafya akwete, kabili finshi mwasambilila ku fyo alandile?

¹⁶ Natulande pa fyo isubilo lyalengele nkashi Anna uwa ku Russia ashipikishe ubwafya akwete. Abena mwakwe balibekete kabili bababikile mu cifungo ninshi tabalaya na mu kulubulula. Nkashi Anna alandile ati: “Ilingi line ndapepela pa fyo Yehova akatucitila ku ntanshi kabili ndatontonkanyapo sana. Ifi ncita filenga nilasakamikwa sana. Nalishiba ukuti ifintu fikawama ku ntanshi. Yehova akacimfya abalwani bakwe kabili akatulambula.”

17. Kuti twalanga shani ukuti tulatasha pe subilo ilyo Yehova atupeela? (Moneni ne cikope.)

¹⁷ Ifyo mwingacita. Mulekwatako inshita ya kutontonkanya pa fisuma ifyo Yehova atulaya. Mule-elenganya ukuti muli mu calo cipya na balupwa lwenu ne fibusa. Kabili mule-elenganya ne fyo bonse mukaba ne nsansa. Na kabili amesho yonse ayo twingakwata pali ino nshita ya ‘pa kashita fye kabili yalyanguka.’ (2 Kor. 4:17) Mule-esha na maka yenu yonse ukwebako abantu pa fisuma ifyo Yehova atulaya. Elenganyeni ifyo ifintu fikosela abantu abashaishiba Yehova. Nabo bene balakwata amafya ayengi, nomba tabaishiba ifintu ifisuma ifyo Yehova atulaya. Nangu mwabebako fye amashiwi ayanono, kuti bafwaya ukwishibilapo ifingi pa Bufumu bwa kwa Yehova na pa fyo atulaya.

18. Cinshi cingalenga twacetekela ifyo Yehova atulaya?

¹⁸ Ilyo Yobo ashipikishe amafya yonse ayo akwete, aebele Yehova ati: “Nomba naishiba ukutila kuti mwacita ifintu fyonse kabili takuli nangu cimo ico mwapanga ukucita ico mwingafilwa ukucita.” (Yobo 42:2) Nga fintu Yobo asambilile, takuli nangu cimo icingalenga Yehova afilwa ukufikilisha ifyo atulaya. Nga twaishiba ici cishinka kuti twaba na maka ya kushipikisha nga twakwata amafya. Natulangilile: Elenganyeni ukuti umwanakashi alilwala pa nshita iitali, nomba alifuupuka pa mulandu wa kuti badokota abengi balifilwa ukumundapa. Nomba tutile uyu mwanakashi asanga dokota uwaishiba bwino ifya kundapa kabili uwacetekelwa. Uyu dokota aishiba ubulwele uyu mwanakashi alwala, kabili amweba ne fyo ali no kucita pa kumundapa. Uyu mwanakashi kuti aumfwa bwino nangu ca kutila kuti papita inshita pa kuti apole. Uyu mwanakashi nomba kuti ashipikisha pantu aishiba ukuti ali no kupola. Ifi fine e fyo caba na kuli ifwe. Kuti twatwalilila ukushipikisha pantu twalishininkisha ukuti Lesa akalenga lino isonde likabe Paradaise.

19. Finshi tufwile ukulacita pa kuti tuleshipikisha amafya?

¹⁹ Nga fintu twasambilila, ipepo, Icebo ca kwa Lesa, aba bwananyina ne subilo e nshila Yehova abomfya pa kutwafwa pa kuti tuleshipikisha amafya. Nga tulebomfya bwino ishi nshila Lesa atupeela, akalatwafwa pa kuti tuleshipikisha amafya ayo twingakwata mpaka cino calo ca kwa Satana e lyo na macushi yonse fikapwe.—Fil. 4:13.