Ukutemwa kwa kwa Lesa Takupwa

1-2. Bwafya nshi Abena Kristu abengi bakwata?

ELENGANYENI ukuti ubwato buli pali bemba apali icimwela. Amabimbi ayakalamba yalesunkanya sana ubu bwato. Aya amabimbi kuti yasenda ubwato nga ca kuti abalimo tabaponeshe inanga. Inanga kuti yalenga ubwato bwaleka ukusunkana sana, kabili te kuti busensenunwe.

² Nga ca kuti muleshipikisha ubwafya ubukalamba, kuti mwaba nga ubu bwato ubuli pali bemba apali icimwela. Ifyo mwingalaumfwa, kuti filealuka aluka. Lelo kuti mwalaumfwa ukuti Yehova alimutemwa kabili alamwafwa, mailo kuti mwalatwishika nga ca kuti naishiba na mafya ayo mukwete. (Amalu. 10:1; 13:1) Nalimo cibusa wenu kuti amusansamushako, kabili pali iyo nshita kuti mwaumfwako bwino. (Amapi. 17:17; 25:11) Lyena kuti mwatendeka ukutwishika na kabili nga ca kuti Yehova alamwafwa. Kuti mwalamona no kuti nalimo Yehova naleka ukumutemwa. Nga namukwata ubwafya, kuti mwaponya shani inanga ya mampalanya? Nangu tutile, kuti mwacita shani pa kuti mushininkishe ukuti Yehova alimutemwa, kabili akulamwafwa?

3. Ukulingana ne fyo Baibo ilanda pa Amalumbo 31:7 na pa Amalumbo 136:​1, bushe amashiwi ya kuti “ukutemwa ukushipwa” yalola mwi, kabili mulandu nshi twingalandila ukuti Yehova e wakwatisha ukutemwa ukushipwa? (Moneni ne cikope.)

³ Cimo ico mwingacita pa kuponya inanga ya mampalanya nga namukwata ubwafya, kwibukisha ukuti Yehova alikwata ukutemwa ukushipwa. (Belengeni Amalumbo 31:7; 136:1.) Amashiwi ya kuti “ukutemwa ukushipwa” yapilibula ukuti umuntu alatwalilila ukutemwa sana umuntu nankwe, kabili alatwalilila ukuba uwa cishinka sana kuli ena. Yehova e wakwatisha ukutemwa ukushipwa. Na kuba, Baibo imulondolola ukuti ‘aliba sana no kutemwa ukushipwa.’ (Ukufu. 34:​6, 7) Na kabili Baibo ilanda pali Yehova ukuti: “Mulalanga sana ukutemwa ukushipwa kuli bonse abalilila kuli imwe.” (Amalu. 86:5) Tontonkanyeni pa fyo aya Malembo yapilibula. Yapilibula ukuti: Yehova talekelesha ababomfi bakwe ababa ne cishinka kuli ena! Nga muleibukisha ukuti Yehova wa cishinka, kuti mwashipikisha ubwafya ubukalamba.—Amalu. 23:4.

MULEMONA UKUTI UKUTEMWA KWA KWA YEHOVA CINE ICO BAIBO ISAMBILISHA

4. Landeniko pali fimo ifyo Baibo isambilisha, kabili mulandu nshi tushilekela umuntu nangu umo alenga twalamona ukuti ifyo isambilisha te cine?

⁴ Na cimbi ico mwingacita pa kuponya inanga ya mampalanya nga namukwata ubwafya, kwibukisha ukuti ukutemwa kwa kwa Yehova, cine ico Baibo isambilisha. Finshi mutontonkanyapo nga mwaumfwa amashiwi ya kuti icine ico Baibo isambilisha? Nalimo mutontonkanya pa cine ico mwasambilila mu Cebo ca kwa Lesa. Ku ca kumwenako, mwalisambilila ukuti ishina lya kwa Lesa ni Yehova, mwalisambilila ukuti Yesu Mwana wa kwa Lesa uwafyalwa eka, mwalisambilila ukuti abafwa tabeshiba nangu cimo, kabili mwalisambilila no kuti lino isonde likaba paradaise umo abantu bakekala umuyayaya. (Amalu. 83:18; Luk. Mil. 9:5; Yoh. 3:16; Ukus. 21:​3, 4) Ilyo mwashininkishe ukuti ici cine, tamwalekele umuntu nangu umo alenga mwalamona kwati te cine. Mulandu nshi? Pantu mwalishininkishe ukuti ifyo Baibo isambilisha fya cine. Nga natukwata ubwafya, nomba tulemona ukuti Yehova taletusakamana nelyo talemona ubwafya tukwete, kuti twaleka ukumona ifi nga ca kuti tuleibukisha ukuti ukutemwa kwa kwa Yehova cine ico Baibo isambilisha. Cinshi twalandila ifi? Natumone.

5. Londololeni ifyo umuntu engaleka ukusumina mu fisambilisho fya bufi.

⁵ Ilyo mwatendeke fye ukusambilila Baibo, cinshi calengele muleke ukusumina mu fisambilisho fya bufi? Mufwile mwalelinganya ifyo mwalesambilila uko mwalepepa ku fyo Baibo isambilisha. Natulandeko pa ca kumwenako cimo. Tutile mwasumine ukuti Yesu ni Lesa wa Maka Yonse. Nomba ilyo mwalesambilila Baibo mwaleyipusha amuti, ‘Bushe ici cisambilisho ca cine?’ Ilyo mwaishibe ifyo Baibo isambilisha, mwashininkishe ukuti Yesu te Lesa wa Maka Yonse. Lyena mwalilekele ukusumina muli ici cisambilisho ca bufi. Lelo nomba mwasumine mu cine ca kuti Yesu “e beli pa fibumbwa fyonse,” “Mwana wa kwa Lesa uwafyalwa eka.” (Kol. 1:15; Yoh. 3:18) Kwena ifisambilisho fya bufi fyaba kwati “malinga ayakosa,” kabili calikosa ukuleka ukufisuminamo. (2 Kor. 10:​4, 5) Na lyo line, ilyo mwasambilile icine, mwalilekele ukufisuminamo.—Fil. 3:13.

6. Cinshi twingashininkishisha ukuti ‘ukutemwa kwa kwa Yehova ukushipwa kwabako umuyayaya’?

⁶ Ifi fine e fyo nalimo mwingacita pa kuti mushininkishe ifyo Baibo isambilisha pa kutemwa kwa kwa Yehova. Nga namukwata ubwafya, e lyo mwatampa ukutwishika nga ca kuti Yehova alimutemwa, muleyipusha amuti: ‘Bushe ifi ndetontonkanya fili fye bwino?’ Mulemona nga ca kuti ifyo muletwishika nga ca kuti Yehova alimutemwa nafilingana ne fyo Baibo isambilisha pa Amalumbo 136:1. Ili e lembo apafumine cino cipande. Ishiwi lya ciHebere ilyo bapilibula ukuti “ukutemwa,” kuti lyapilibula no kuti ukuba ne cishinka. Nomba mulandu nshi Yehova alengele uwalembele Amalumbo alembe ukuti ukutemwa kwa kwa Yehova takupwa? Kabili mulandu nshi amashiwi ya kuti “ukutemwa kwakwe ukushipwa kwabako umuyayaya” bayabwekeseshapo imiku 26 mu Amalumbo 136? Nga fintu tusambilile, ifyo Yehova alanga abantu bakwe ukutemwa ukushipwa, cine icacindama ico Baibo isambilisha, nga filya fine fyaba ifisambilisho fimbi ifyo Baibo isambilisha ifyo mwasuminamo. Tamufwile ukulatontonkanya ukuti Yehova amumona ukuti tamwacindama nelyo tamutemwa, pantu ifi te fya cine. Tamulingile ukusumina ifi nangu fye panono, nga filya fine mushilingile ukusumina ifisambilisho fimbi ifya bufi!

7. Landeniko pa Amalembo yamo ayengalenga mwashininkisha ukuti Yehova alimutemwa.

⁷ Mu Baibo mwaliba na fimbi ifingalenga twashininkisha ukuti Yehova alitutemwa. Ku ca kumwenako, Yesu aebele abasambi bakwe ati: “Mwalicindama ukucila inseba ishingi.” (Mat. 10:31) Yehova aebele abantu bakwe ati: “Ndekukosha kabili ndekwafwa. Ukuboko kwandi ukwa ku kulyo ukucita ifyalungama kulekwikatilila.” (Esa. 41:10) Moneni ico twingalandila ukuti ifyo Yehova na Yesu balandile fya cine. Yesu talandile ukuti ‘nalimo mwalicindama ukucila inseba,’ lelo alandile ati: “Mwalicindama ukucila inseba ishingi.” Yehova na o talandile ukuti ‘nalimo kuti nakwafwa,’ lelo alandile ati: “Ndekwafwa.” Nga namukwata ubwafya e lyo mwatendeka ukulatwishika nampo nga Yehova alimutemwa nelyo iyo, Amalembo ya musango uyu kuti yalenga mwaumfwako bwino, kabili kuti yalenga mwashininkisha ukuti Yehova alimutemwa. Ifyo yalanda fya cine. Nga muletontonkanya sana pa fyo aya mashiwi yalanda, kabili nga mulepepelapo, mukalanda ifyo Baibo ilanda pali 1 Yohane 4:16. Itila: “Twalishiba kabili twalisumina ukuti Lesa alitutemwa.”a

8. Finshi mwingacita nga ca kuti inshita shimo mulatwishika nga ca kuti Yehova alimutemwa?

⁸ Nomba finshi mwingacita nga ca kuti inshita shimo mulatwishika nga ca kuti Yehova alimutemwa? Mulelinganya ifyo mumfwa ku fyo mwaishiba pali ena. Ifyo tumfwa filaaluka aluka, lelo ifishinka fyena tafyaluka. Ifi Baibo itusambilisha ukuti Yehova alitutemwa, cishinka icishingaluka. Nga tatusumine ukuti Yehova alitutemwa, ninshi tatubikile amano ku mibele yakwe iyacindamisha, ukutemwa.—1 Yoh. 4:8.

MULETONTONKANYA PA FYO YEHOVA ‘AMUTEMWA’

9-10. Cinshi Yesu alelandapo ilyo alandile amashiwi ayaba pali Yohane 16:​26, 27 ayatila: “Tata alimutemwa”? (Moneni ne cikope.)

⁹ Kuti twaishibilapo na fimbi pa fyo Yehova atutemwa nga twatontonkanya pa fyo Yesu aebele abasambi bakwe. Abebele ati: “Tata alimutemwa.” (Belengeni Yohane 16:​26, 27.) Yesu talandile aya amashiwi pa kuti fye abasambi bakwe bomfwe bwino. Na kuba, nga twabelenga ifyo Yesu alandile ilyo ashilalanda aya amashiwi, kuti twamona ukuti talelanda pa fyo abasambi bakwe baleumfwa pali ilya nshita, lelo alelanda pe pepo.

¹⁰ Pali iyi nshita, e lyo Yesu afumine fye mu kweba abasambi bakwe ukuti balingile ukulapepela muli ena, lelo tabalingile ukulapepa kuli ena. (Yoh. 16:​23, 24) Abasambi balingile ukwishiba ici cishinka. Mulandu nshi? Ilyo Yesu abuushiwe, nalimo abasambi bakwe nga balefwaya ukulapepa kuli ena. Na kuba, Yesu ali ni cibusa wabo. Nalimo nga baletontonkanya ukuti apo Yesu alibatemenwe, ali no kulakutika amapepo yabo, kabili ali no kulabalandilako kuli Wishi. Nomba Yesu abebele ukuti tabalingile ukulatontonkanya ifi. Mulandu nshi? Pantu abebele ati: “Tata alimutemwa.” Ifi abebele nafyo fyaba pa fyo Baibo isambilisha pe pepo. Tontonkanyeni pa fyo aya mashiwi yamukuma. Pa mulandu wa kuti mulasambilila Baibo, mwalimwishiba Yesu kabili mwalimutemwa. (Yoh. 14:21) Nga filya fine cali ku basambi ba kwa Yesu aba mu nshita ya batumwa, na imwe bene kuti mwapepa kuli Lesa pantu mwalishiba ukuti “alimutemwa.” Lyonse ilyo mwapepa kuli Yehova, ninshi mulelanga ukuti mwalicetekela aya mashiwi.—1 Yoh. 5:14.

MULEISHIBA IFILENGA MULETWISHIKA

11. Cinshi Satana engatemenwa nga twalatwishika nga ca kuti Yehova alitutemwa?

¹¹ Nani alenga muletwishika nga ca kuti Yehova alimutemwa? Nalimo kuti mwa-asuka amuti ni Satana. Kwena ici na co cishinka. Satana Kaseebanya ‘alafwaya ukutulya’ kabili kuti atemwa sana nga twalatwishika nga ca kuti Yehova alitutemwa. (1 Pet. 5:8) Nomba icalengele Yehova atupeele icilubula, ni co alitutemwa. Satana afwaya twalamona ukuti te kuti tunonkelemo mu cilubula pantu tuli babembu sana. (Heb. 2:9) Nani atemwa nga twalatwishika nga ca kuti Yehova alitutemwa? Ni Satana. Na kabili, nani engatemwa nga ca kuti twafuupuka sana ica kuti twaleka no kubombela Yehova? Ni Satana wine. Satana afwaya twalamona ukuti Yehova tatutemwa. Lelo ici te cishinka, pantu na kuba Satana wine e o Yehova ashatemwa. Nomba Satana alabomfya “imicenjelo” yakwe pa kuti tulemona ukuti Yehova tatutemwa, kabili tatufwaya. (Efes. 6:11) Lelo nga twaishiba ifyo umulwani wesu Satana Kaseebanya afwaya ukucita, kuti twatwalilila ‘ukumulwisha.’—Yako. 4:7.

12-13. Bushe ukukanapwililika kuti kwalenga shani twalatwishika nga ca kuti Yehova alitutemwa?

¹² Kwaliba na cimbi icingalenga twalatwishika nga ca kuti Yehova alitutemwa. Ni cinshi? Lubembu ulo twapyana. (Amalu. 51:5; Rom. 5:12) Ulubembu lwalilenga abantu baba abalwani ba kwa Lesa. Na kabili ulubembu lwine lwalilenga twilatontonkanya bwino, tuleumfwa ububi kabili tulelwala.

¹³ Na kabili ulubembu lulenga tuleumfwa ukuti tuli no mulandu, tulesakamikwa kabili tuleumfwa ukuti natuseebana. Ifi e fyo tumfwa nga twabembuka. Na kabili kuti twalaumfwa ifi pa mulandu wa kutila twalishiba ukuti tuli babembu. Ifi te fyo Yehova atubumbile. (Rom. 8:​20, 21) Nga filya fine itaela ilifoomonweke lishingenda bwino, e fyo caba na kuli ifwe. Pa mulandu wa kuti tatwapwililika, tatucita ifintu ukulingana ne fyo tulingile ukulacita. E mulandu wine tushilingile ukupapila nga ca kuti inshita shimo twalatwishika nga ca kuti Yehova alitutemwa. Nga twalatwishika nga ca kuti Yehova alitutemwa, tuleibukisha ukuti Yehova ni ‘Lesa mukulu kabili uwa kutiinya, uusunga icipangano kabili uulanga ukutemwa ukushipwa ku bamutemwa kabili abakonka amafunde yakwe.’—Nehe. 1:5.

14. Cinshi twingalandila ukuti nga tuletontonkanya pa cilubula, kuti twaleka ukutwishika nga ca kuti Yehova alitutemwa? (Abena Roma 5:8) (Moneni na kabokoshi akaleti “Muleba Abacenjela pa Kuti Ulubembu Lwilamubeleleka.”)

¹⁴ Kwena inshita shimo kuti twaumfwa ukuti Yehova talinga no kututemwa. Nga kulanda fye icishinka, Yehova talinga no kututemwa. Nomba ifi atutemwa, filanga ukuti ukutemwa uko atulanga kwali-ibela. Pa lwesu fye, te kuti tulenge Yehova atutemwa. Lelo Yehova alitutemwa. E co atupeelela icilubula pa kuti aletwelela imembu. (1 Yoh. 4:10) Muleibukisha no kuti Yesu aishile mu kulubula abantu ababembu, te bantu abapwililika iyo. (Belengeni Abena Roma 5:8.) Takwaba nangu umo uushingalufyanya mu fyo acita ifintu, kabili Yehova tatwenekela ukulacita ifintu kwati twalipwililika. Nga twaishiba ukuti ifi twaba ababembu filenga twalatwishika nga ca kuti Yehova alitutemwa, kuti twalaesha na maka yesu yonse pa kuti twilatwishika.—Rom. 7:​24, 25.

SALENIPO UKUTWALILILA UKUBA ABA CISHINKA

15-16. Finshi twingacetekela nga twatwalilila ukuba aba cishinka kuli Yehova, kabili mulandu nshi? (2 Samwele 22:26)

¹⁵ Yehova afwaya twasalapo ‘ukulambatila kuli ena.’ (Amala. 30:​19, 20) Nga twalambatila kuli ena, na o akatwalilila ukuba uwa cishinka kuli ifwe. (Belengeni 2 Samwele 22:26.) Nga twatwalilila ukuba aba cishinka kuli Yehova, kuti twacetekela ukuti akulatwafwa pa kuti tuletwalilila ukushipikisha amafya yonse ayo twingakwata.

¹⁶ Nga fintu twasambilila, kwaliba ifingi ifingalenga twaponya inanga ya mampalanya nga twakwata amafya. Twalishiba ukuti Yehova alitutemwa kabili akulatwafwa. Ifi e fyo Baibo itusambilisha. Nga twalatwishika nga ca kuti Yehova alitutemwa, tufwile ukulaibukisha ifyo Yehova atutemwa ukucila ukulabika fye amano ku fyo tuleumfwa pali iyo nshita. Kanshi natutwalilile ukucetekela ifyo Baibo isambilisha ukuti ukutemwa kwa kwa Yehova ukushipwa, kwabako umuyayaya.