Bushe Mwalishininkisha Ukuti Yehova Alimutemwa?

1. Cinshi calengele muipeele kuli Yehova? (Moneni ne cikope.)

IBUKISHENI ifyo cali ilyo mwaipeele kuli Yehova. Icalengele muipeele kuli ena, ni co mwalimwishibe kabili mwalimutemenwe. Mwalimulaile ukuti ico mukalabikako sana amano mu bumi bwenu, kumubombela no kuti mukatwalilila ukumutemwa no mutima wenu onse, no mweo wenu onse, no kutontonkanya kwenu konse, na maka yenu yonse. (Marko 12:30) Ukutula apo mwaipeelela kuli Yehova, mwalimutemenwako sana. Nomba kuti mwa-asuka shani nga ca kuti umuntu amwipusha ati: “Bushe cine cine mwalimutemwa Yehova?” Ilyo line kuti mwamwasuka amuti, “Nalimutemwa sana, kabili takwaba nangu umo uo natemwa ukucila ifyo natemwa Yehova!”

2-3. Cinshi Yehova afwaya twashininkisha, kabili finshi twalasambililapo muli cino cipande? (Yeremia 31:3)

² Nomba kuti mwa-asuka shani nga ca kuti umuntu amwipusha ati, “Bushe mwalishininkisha ukuti Yehova alimutemwa?” Bushe kuti mwashingashinga ukwasuka, nalimo pa mulandu wa kuti mutontonkanya ukuti Yehova te kuti amutemwe? Nkashi umo uo balecusha ilyo ali umwaice alandile ati: “Nalishiba ukuti nalitemwa Yehova. Ico cena nshitwishika. Lelo ilingi line ndatwishika nga ca kuti Yehova alintemwa.” Nomba kuti mwashininkisha shani ukuti cine cine Yehova alimutemwa?

³ Yehova afwaya mwashininkisha ukuti alimutemwa. (Belengeni Yeremia 31:3.) Icishinka ca kuti, Yehova e walengele mwaba cibusa wakwe. Kabili ilyo mwaipeele kuli ena, mwabatishiwa no kubatishiwa, alimulangile ukutemwa kwakwe ukushipwa. Aya amashiwi yalola mu kuti alimutemwa nga nshi kabili takatale amusha. Uku ukutemwa ukushipwa, kulenga Yehova alemona ababomfi bakwe bonse aba cishinka ukuti “balitemwikwa.” Ifi fine e fyo na imwe amumona. (Mal. 3:​17, futunoti.) Yehova afwaya mwashininkisha ukuti alimutemwa nga filya fine umutumwa Paulo ashininkishe ukuti alimutemenwe. Paulo alembele ati: “Ninshininkisha ukuti nangu ni mfwa, nangu mweo, nangu ni bamalaika, nangu mabuteko, nangu fintu ifyabapo, nangu fintu ifikesabako, nangu fya maka, nangu ifya pa muulu, nangu ifya panshi, nangu ifyabumbwa, tafyakakwate amaka ya kutupaatulako ku kutemwa kwa kwa Lesa.” (Rom. 8:​38, 39) Muli cino cipande twalasambilila pa co tulingile ukushininkishisha sana ukuti Yehova alitutemwa. Twalasambilila na pa fyo twingacita pa kuti tushininkishe sana ukuti Yehova alitutemwa.

ICO TULINGILE UKUSHININKISHISHA UKUTI YEHOVA ALITUTEMWA

4. Kuti twacimfya shani umucenjelo umo uo Satana abomfya sana?

⁴ Nga twashininkisha ukuti Yehova alitutemwa, kuti twacimfya “imicenjelo” ya kwa Satana. (Efes. 6:11) Satana kuti acita icili conse pa kuti fye alenge tuleke ukubombela Yehova. Umucenjelo umo uo Satana abomfya sana, kulenga twalamona ukuti Yehova tatutemwa. Lelo ubu bufi ubwafiita fititi. Baibo ilinganya Satana ku nkalamo. Inkalamo isansa inama iishikwete amaka. Ifi fine e fyo Satana na o acita. Atusansa ilyo tushikwete amaka, ilyo tunakile nelyo ilyo tuli no bulanda pa mulandu ne fintu ifyabipa ifyatucitikiile, nelyo pa mulandu wa mafya ayo tukwete pali ino nshita, nangu pa mulandu wa kuti natusakamana pa fikacitika ku ntanshi. (Amapi. 24:10) E ico ilyo tukwete amafya, e lyo Satana esha na maka yakwe yonse pa kuti alenge tuleke ukubombela Yehova. Nomba nga twashininkisha sana ukuti Yehova alitutemwa, kuti ‘twalwisha’ Satana ne micenjelo yakwe.—1 Pet. 5:​8, 9; Yako. 4:7.

5. Mulandu nshi tulingile ukulaumfwila ukuti Yehova alitutemwa nga nshi kabili alitubikako sana amano?

⁵ Nga twashininkisha ukuti Yehova alitutemwa, kuti twaba ifibusa sana na ena. Cinshi twalandila ifi? Ni co Yehova atubumba mu nshila ya kuti tuletemwa abantu kabili na ifwe tuleumfwa ukuti abantu balitutemwa. Umuntu nga atulanga ukuti alitutemwa, mu cifyalilwa fye na ifwe bene tulafwaya ukumulanga ukuti twalimutemwa. E ico nga tuleumfwa ukuti Yehova alitutemwa nga nshi, kabili alitubikako sana amano, na ifwe tukalamutemenwako. (1 Yoh. 4:19) Na kabili nga twamutemenwako, na o akatutemwa sana. Baibo yalilanda bwino bwino ukuti: “Palameni kuli Lesa, na o akapalama kuli imwe.” (Yako. 4:8) Nomba finshi tulingile ukucita pa kuti tushininkishe ukuti Yehova alitutemwa?

FINSHI TUFWILE UKUCITA PA KUTI TUSHININKISHE UKUTI YEHOVA ALITUTEMWA?

6. Finshi mufwile ukucita pa kuti mushininkishe ukuti Yehova alimutemwa?

⁶ Mwilaleka ukupepa, kabili mulepepa mu kulungatika. (Luka 18:1; Rom. 12:12) Mulepepa kuli Yehova imiku iingi cila bushiku. Mulemulomba ukuti alemwafwa pa kuti muleyimona nge fyo ena amumona. Kwena inshita shimo, umutima wenu kuti walamweba ukuti Yehova tamutemwa. Lelo muleibukisha ukuti Yehova alicila umutima wenu. (1 Yoh. 3:​19, 20) Alimwishiba bwino sana ukucila ne fyo mwayishiba mwe bene; kabili alamona ne fyo nalimo imwe mushingamona. (1 Sam. 16:7; 2 Imila. 6:30) Kanshi mulemweba ‘fyonse ifili mu mutima wenu,’ kabili mulemulomba ukuti alemwafwa pa kuti mushininkishe ukuti alimutemwa. (Amalu. 62:8) Lyena nga mwapepa kuli ena, mulingile ukucita ifyakonkapo.

7-8. Bushe amashiwi yaba mu Amalumbo, yalenga shani twashininkisha ukuti Yehova alitutemwa?

⁷ Mulecetekela ifyo Yehova alanda. Yehova alengele abalembele Baibo balanda ifyo aba. Moneni ifyo Davidi uwalembele amalumbo alondolwele ifyo Yehova atubikako amano. Alembele ati: “Yehova alaba mupepi na baba no bulanda; alapususha abafuupuka.” (Amalu. 34:​18, futunoti) Nga muli no bulanda, kuti mwalaumfwa kwati tamukwete nangu umo uwa kumwafwa. Lelo Yehova alilaya ukuti nga muli no bulanda akulaba mupepi sana na imwe, pantu aleshiba ukuti pali iyi nshita mulefwaya sana ukuti amwafwe. Na kabili Davidi alembele ati: “Bikeni ifilamba fyandi mu nyambi yenu.” (Amalu. 56:8) Yehova aleshiba nga ca kuti muli no bulanda. Alamusakamana sana kabili tatemwa nga amona mulecula. Nga filya fine uule-enda mu ciswebebe amona ukuti amenshi ayo asendele pa lwendo nayacindama, e fyo na Yehova amona ifilamba fyenu. Lyonse ilyo mwaba no bulanda kabili mwalila, Yehova aleshiba. Pa Amalumbo 139:3 Baibo itila: “Muleshiba fyonse ifyo ncita.” Yehova alamona fyonse ifyo mucita, lelo abika amano ku fisuma ifyo mucita. (Heb. 6:10) Cinshi acitila ifi? Ni co alatemwa fyonse ifyo mucita pa kuti mulelenga alesekelela.a

⁸ Nga twabelenga amalembo ya musango uyu, ciba kwati Yehova aletweba ukuti: “Ndefwaya wishibe ukuti nalikutemwa sana kabili nalikubikako amano.” Lelo nga fintu tusambilile, Satana afwaya mwasumina ukuti Yehova tamutemwa. Kanshi inshita shimo nga mwalatwishika nampo nga Yehova alimutemwa nelyo iyo, muleyipusha amuti, ‘Nani nalacetekela, bushe ni “wishi wa bufi,” nelyo ni “Lesa wa cishinka”?’—Yoh. 8:44; Amalu. 31:5.

9. Finshi Yehova alaya abantu abamutemwa? (Ukufuma 20:​5, 6)

⁹ Muletontonkanya pa fyo Yehova omfwa pa bantu abamutemwa. Tontonkanyeni pa fyo Yehova aebele Mose na bena Israele. (Belengeni Ukufuma 20:​5, 6.) Yehova alilaya ukuti abantu abamutemwa, akatwalilila ukubalanga ukutemwa kwakwe ukushipwa. Aya amashiwi yalenga twashininkisha ukuti Lesa wesu uwa cishinka te kuti afilwe ukutemwa abantu abamutemwa. (Nehe. 1:5) Kanshi nga ca kuti inshita shimo mwalamona kwati Yehova tamutemwa, muleyipusha amuti, ‘Bushe nalitemwa Yehova?’ E ico nga mwalimutemwa kabili nga mulesha na maka yenu yonse pa kuti mulecita ifingalamusekesha, ninshi kuti mwashininkisha ukuti na o wine alimutemwa icine cine. (Dan. 9:4; 1 Kor. 8:3) Kanshi kuti twatila, nga ca kuti tamutwishika ukuti mwalitemwa Yehova, cinshi mwingalatwishikila ukuti alimutemwa? Kuti mwashininkisha ukuti Yehova alimutemwa, kabili takatale amusha.

10-11. Bushe Yehova afwaya mulemona shani icilubula? (Abena Galatia 2:20)

¹⁰ Muletontonkanya sana pa cilubula. Ilambo lya kwa Yesu Kristu, e bupe ubwacila pa bupe bonse ubo Yehova apeela abantu. (Yoh. 3:16) Bushe na imwe bene Yesu alimufwilile? Ee! Natulande pa mutumwa Paulo. Ilyo ashilaba Umwina Kristu, alicitile ifintu ifyabipa sana, kabili na lintu aishileba Umwina Kristu, alitwalilile ukulwishanya no lubembu pa kuti elacita ifyabipa. (Rom. 7:​24, 25; 1 Tim. 1:​12-14) Na lyo line, alemona icilubula ukuti bupe ubo Yehova amupeele. (Belengeni Abena Galatia 2:20.) Ibukisheni ukuti Yehova e walengele ukuti Paulo alembe aya amashiwi mu Baibo. Na kabili, fyonse ifyaba mu Baibo bafilembele pa kuti tulesambililako. (Rom. 15:4) Amashiwi Paulo alembele yalangilila ukuti Yehova afwaya mulemona icilubula ukuti bupe ubo amupeela pa lwenu. Nga mulemona icilubula ukuti bupe ubo Lesa amupeela pa lwenu, mukashininkisha ukuti Yehova alimutemwa.

¹¹ Tulatasha Yehova pali ifi atumine Yesu pano isonde pa kuti ese atufwile. Lelo kwali na cimbi ico Yesu aishiile pano isonde. Aishile mu kusambilisha abantu icine pali Lesa. (Yoh. 18:37) Pa cine ico Yesu aishile mu kusambilisha abantu pali Yehova, paba ne cine ca kuti Yehova alitemwa abantu.

IFYO YESU ENGALENGA MWASHININKISHA UKUTI YEHOVA ALIMUTEMWA

12. Cinshi cingalenga twacetekela ifyo Yesu asambilishe abantu ukuti e fyo Yehova aba?

¹² Ilyo Yesu ali pano isonde, alesambilisha abantu pa fyo Yehova aba. (Luka 10:22) Kuti twacetekela ifyo Yesu asambilishe abantu ukuti e fyo Yehova aba. Cinshi twalandila ifi? Ni co ilyo Yesu ashilaisa pano isonde, alikele na Yehova ku muulu pa myaka iingi nga nshi. (Kol. 1:15) Yesu alishiba ukuti Wishi alimutemwa sana, kabili alimona ifyo atemwa bamalaika bakwe bonse aba cishinka, e lyo ne fyo atemwa abantu bonse ababa ne cishinka kuli ena. Bushe Yesu alenga shani abantu baishiba ukuti Yehova alibatemwa?

13. Bushe Yesu afwaya tulemona shani Yehova?

¹³ Yesu afwaya tulemona Yehova nge fyo ena amumona. Mu Mabuuku ya Mbila Nsuma, Yesu aitile Yehova ukuti “Tata” pa miku iingi. Na kabili ilyo alelanda na basambi bakwe, abomfeshe amashiwi pamo nga “Shinwe” nelyo “Shinwe wa mu muulu.” (Mat. 5:16; 6:26) Ilyo Yesu ashilaisa pano isonde, ababomfi ba kwa Yehova abali ne cishinka baleita Yehova ukuti ‘Uwa Maka Yonse,’ ‘Uwapulamo’ na ‘Kabumba Wapulamo,’ kabili balemwitila na ku malumbo yambi. Lelo ilingi line Yesu aleita Yehova ukuti ‘Shifwe.’ Ishiwi lya kuti Shifwe, lilanga ukuti Yehova alafwaya ababomfi bakwe bapalama sana kuli ena, nga filya fine umwana apalama sana kuli wishi uwamutemwa. Kanshi Yesu aletusambilisha ukuti Yehova alitutemwa, nga filya fine umufyashi umusuma atemwa abana bakwe. Natulandeko pa fya kumwenako fibili umo Yesu aitile Yehova ukuti “Tata.”

14. Bushe Yesu alangile shani ukuti Shifwe wa ku muulu amona ukuti ifwe umo umo twalicindama? (Mateo 10:​29-31) (Moneni ne cikope.)

¹⁴ Natubalilepo ukulanda pa mashiwi ayo Yesu alandile ayaba pali Mateo 10:​29-31. (Belengeni.) Inseba tuni utunono sana utushingatemwa Yehova nelyo ukumupepa. Lelo alitubikako amano sana ica kuti aleshiba nga ca kuti uluseba lumo lwapona panshi. Nga ca kuti ifi e fyo Yehova abika amano ku nseba, ninshi alicilapo ukubika amano kuli fwe babomfi bakwe umo umo, pantu ifwe twalimutemwa kabili tulamupepa! Yesu alandile no kuti Shifwe “alishiba ne mpendwa ya mushishi” uo cila muntu akwata ku mutwe. Apo Yehova alishiba no tuntu utunono pali ifwe, ninshi kuti twacetekela ukuti alitubikako sana mano. Cailanga fye apabuuta tuutu ukuti Yesu afwaya twashininkisha ukuti Shifwe wa ku muulu amona umuntu umo na umo ukuti alicindama.

15. Bushe amashiwi ayo Yesu alandile pali Yohane 6:44 yalenga mwaishiba finshi pali Shinwe wa ku muulu?

¹⁵ Natulandeko pa nshita na imbi ilyo Yesu aitile Yehova ukuti “Tata.” (Belengeni Yohane 6:44.) Shinwe wa ku muulu e walengele mumwishibe kabili mumutemwe. Cinshi acitiile ifi? Ni co alimwene ukuti mwalikwata umutima uusuma. (Imil. 13:48) Ilyo Yesu alandile amashiwi yaba pali Yohane 6:​44, nalimo alelanda pa mashiwi ayo Yehova alandile ayaba pali Yeremia 31:3. Pali ili ilembo, Yehova aebele abantu bakwe ati: “Nakupalamikila kuli ine ukubomfya ukutemwa ukushipwa [nelyo, natwalilila ukukulanga ukutemwa ukushipwa].” (Yer. 31:3; futunoti; linganyeniko Hosea 11:4.) Aya mashiwi yalola mu kuti Shifwe wa mu muulu uwatutemwa, lyonse alamona imibele iisuma iyo mwakwata iyo nalimo mwe bene mushingeshiba no kuti mwalikwata.

16. (a) Filya Yesu aleita Yehova ukuti Shifwe, finshi aletweba, kabili mulandu nshi tulingile ukusuminina ifyo alandile? (b) Kuti mwacita shani pa kuti mushininkishe sana ukuti Yehova e Shinwe uo mulingile ukukwata? (Moneni akabokoshi akaleti “Shifwe uo Ifwe Bonse Tukabila.”)

¹⁶ Filya Yesu aleita Yehova ukuti Shifwe, aletweba ukuti Yehova te wishi fye wa kwa Yesu eka, lelo na imwe bene ni Shinwe. Yesu afwaya mwashininkisha ukuti Yehova alimutemwa kabili alimubikako sana amano. Kanshi nga mwatendeka ukutwishika nampo nga Yehova alimutemwa nelyo iyo, muleyipusha amuti, ‘Bushe nshifwile ukucetekela ifyo Yesu alandile uwaishiba bwino Shifwe kabili uulanda icishinka lyonse?’—1 Pet. 2:22.

MULECITA IFINGALENGA MWASHININKISHA SANA UKUTI YEHOVA ALIMUTEMWA

17. Mulandu nshi tulingile ukutwalilila fye ukucita ifingalenga twashininkisha sana ukuti Yehova alitutemwa?

¹⁷ Tufwile ukutwalilila ukucita ifingalenga twashininkisha sana ukuti Yehova alitutemwa. Nga fintu tusambilile, umulwani wesu Satana alesha na maka yakwe yonse pa kuti alenge tuleke ukubombela Yehova. Satana alafwaisha ukutunasha. E ico takaleke ukucita ifingalenga twalamona ukuti Lesa tatutemwa. Tatulingile ukuleka Satana alenga twaleka ukubombela Yehova!—Yobo 27:5.

18. Finshi mulingile ukulacita pa kuti mushininkishe ukuti Yehova alimutemwa?

¹⁸ Muli cino cipande, natusambilila pa fyo mulingile ukucita pa kuti mushininkishe ukuti Yehova alimutemwa. Natusambilila ukuti mufwile ukulapepa kuli Yehova, kabili mulemulomba ukuti alemwafwa pa kuti muleyimona nge fyo ena amumona. Muletontonkanya sana pa fyo abalembele Baibo balondolola ukuti Yehova alitemwa abantu abamutemwa. Muleibukisha ukuti Yehova te kuti afilwe ukutemwa abantu abamutemwa. Muletontonkanya sana pa co mulingile ukulamwena ukuti icilubula bupe ubo Yehova amupeela pa lwenu. Na kabili mulecetekela ifyo Yesu alandile ukuti Yehova ni Shinwe wa mu muulu. Lyena umuntu nga amwipusha ukuti, “Bushe mwalishininkisha ukuti Yehova alimutemwa?” mukasuka no mweo wenu onse amuti, “Ee, alintemwa! Kabili cila bushiku ndesha na maka yandi yonse pa kuti ndecita ifilanga ukuti na ine wine nalimutemwa!”