Yesu ni Shimapepo Mukalamba Uutulangulukilako

1-2. (a) Cinshi Yehova atumiine Umwana wakwe pano isonde? (b) Finshi twalasambililapo muli cino cipande? (AbaHebere 5:​7-9)

NAPAPITA imyaka nalimo 2,000 ukutula apo Yehova atumiine Umwana wakwe uo atemwa sana pano isonde. Cinshi amutumiine? Cimo pa fyo amutumiine, kwisalubula abantu ku lubembu ne mfwa, na pa kuti engesafumyapo ifyabipa fyonse ifyo Satana aleta. (Yoh. 3:16; 1 Yoh. 3:8) Na kabili Yehova alishibe ukuti Yesu nga aisafyalilwa pano isonde, ali no kuba Shimapepo Mukalamba uumfwila sana abantu uluse kabili uubalangulukilako. Yesu aishileba Shimapepo Mukalamba mu mwaka wa 29 ilyo abatishiwe.a

² Muli cino cipande twalasambilila pa fyo Yesu alecita ilyo ali pano isonde e lyo na pa fyo ifyo alecita fyalengele afikepo sana ukuba Shimapepo Mukalamba uulangulukilako abantu. Nga twaumfwikisha ifi, cikalatwangukila ukupepa kuli Yehova no kuba ifibusa fyakwe, na lintu tusakamikwe pa mulandu wa kuti ifilubo ifyo twacita fyalilenga twafuupuka.—Belengeni AbaHebere 5:​7-9.

UMWANA WA KWA LESA UO ATEMWA AISA PANO ISONDE

3-4. Bushe ifintu fyali shani ilyo Yesu ali ku muulu, nomba fya-alwike shani ilyo aishile pano isonde?

³ Fwe bengi kwaliba ifyatucitikilapo ifyalenga ifintu fyaluke. Ku ca kumwenako, nalimo twalikuukile uko twaleikala, twasha ne ng’anda yesu iyo twatemenwe sana, balupwa lwesu e lyo ne fibusa fyesu. Kwena ifintu tafyanguka nga ca kuti ifya musango uyu fyacitika. Nomba takwaba umuntu nangu umo uo ifintu fya-alukapo nga fintu fya-alwike kuli Yesu. Ilyo ali ku muulu, e wali malaika uo Yehova abalilepo ukubumba kabili e wali malaika uwacindamishepo pali bamalaika bonse. Yehova alimutemenwe sana kabili lyonse alesekelela nga nshi pantu alebombela pamo na Wishi. (Amalu. 16:11; Amapi. 8:30) Lelo Baibo pa Abena Filipi 2:7 itila Yesu ali-itemenwe ‘ukusha fyonse.’ Alishile icifulo icikalamba ico akwete ku muulu, kabili aishile pano isonde no kutendeka ukwikala na bantu abashali abapwililika.

⁴ Na kabili tontonkanyeni pa fyo ifintu fyali ilyo Yesu ali umwaice pano isonde. Ulupwa afyalilwemo lwali lupiina, pantu ilyo afyelwe abafyashi bakwe bailetuula utuni tubili pe tempele. (Lebi 12:8; Luka 2:24) Ilyo Imfumu Herode iyali iyabipa yaumfwile ukuti Yesu alifyelwe, yalefwaya ukumwipaya. Pa kuti abafyashi ba kwa Yesu bamucingilile kuli ilya imfumu iyali iyabipa, bamubutushishe ku Egupti uko baileba imbutushi pa nshita imo. (Mat. 2:​13, 15) Ala ifyo Yesu aleikala ilyo ali pano isonde, fyalipusene sana ne fyo aleikala ilyo ali ku muulu!

5. Finshi Yesu alemona ilyo ali pano isonde, kabili filya aleikala pano isonde fyalengele shani aba Shimapepo Mukalamba uulangulukilako abantu? (Moneni ne cikope.)

⁵ Ilyo Yesu ali pano isonde, alemona ifyo abantu abengi balecula. Yesu alishibe ifyo umuntu omfwa nga ca kuti umuntu uo atemwa afwa. Ukwabula no kutwishika, kwali abantu abengi abo aishibe abafwile, ukubikako fye na wishi Yosefe. Ilyo Yesu alebila imbila nsuma, alemonana na bantu abalwele ifibashi, abali impofu, abalwele ubulebe na bafyashi abafwililwe abana kabili alebomfwila uluse. (Mat. 9:​2, 6; 15:30; 20:34; Marko 1:​40, 41; Luka 7:13) Kwena ilyo ali ku muulu alemona ifyo abantu balecula. Nomba ilyo aishile pano isonde, e lyo aishibe bwino ifyo abantu bomfwa nga balecula. (Esa. 53:4) Alishibe bwino bwino ifyo abantu bomfwa nga bakwata amafya ayalekanalekana ne fyo bacula pa mulandu wa fintu ifyabipa ifibacitikila. Apo Yesu aishileba umuntu, na o wine alenaka, alesakamikwa kabili aleba no bulanda.

YESU ALALANGULUKILAKO ABANTU

6. Bushe ifyo kasesema Esaya aseseme pa fyo Yesu ali no kulalangulukilako abantu fitusambilisha finshi? (Esaya 42:3)

⁶ Mu myaka yonse iyo Yesu abililemo imbila nsuma, alilangile ukuti alelangulukilako abantu abo balecusha. Filya alecita, fyalelangilila ukuti alefikilisha ubusesemo. Mu Amalembo ya ciHebere, abantu abatetekela sana Yehova limo babalinganya kwi bala ilyatapililwa bwino nelyo ku fimuti ifitali kabili ifyakosa. (Amalu. 92:12; Esa. 61:3; Yer. 31:12) Lelo abantu abo bacusha kabili abashakwata aba kubafwa bena babalinganya kwi tete ilyafunika na ku ciku icili mu kushima ico abantu bashibikako sana amano. (Belengeni Esaya 42:3; Mat. 12:20) Yehova alengele Esaya abomfya ifi filangililo pa kusobela ifyo Yesu ali no kutemwa abantu abo basuulile, ne fyo ali no kulabalangulukilako.

7-8. Bushe Yesu afikilishe shani ifyo Esaya aseseme?

⁷ Mateo uwalembeleko Amabuuku ya Mbila Nsuma, alilangile ukuti Yesu alefikilisha ubusesemo ubo kasesema Esaya aseseme. Alembele ati: “Takakontole itete ilyafunika, kabili takashimye iciku icili mu kushima.” Yesu alyafwile abantu abo balecusha ukupitila mu fipesha mano ifyo alecita. Aba bantu bali kwati litete ilyafunika, tabakwete isubilo, nelyo bali kwati ciku icili mu kushima. Pa bantu abalecula abo Yesu ayafwile, pali no mwaume uwalwele ifibashi umubili onse. Afwile takwetepo ne subilo lya kuti ali no kupola no kuba pamo no lupwa lwakwe. (Luka 5:​12, 13) Kwali umwaume na umbi uwali nkomamatwi kabili uwalebulubusa fye pa kulanda. Elenganyeni ifyo afwile aleumfwa ilyo alemona abantu balelanshanya, lelo ena taleumfwa ifyo balelandapo. (Marko 7:​32, 33) Nomba te aba bene fye balecula, kwali na bambi.

⁸ Ilyo Yesu ali pano isonde, abaYuda abengi basumine ukuti abantu abalecula nelyo abali abalemana, ni Lesa alebakandila pa membu isho bacitile, nelyo pa membu isho abafyashi babo bacitile. (Yoh. 9:2) Ifi abaYuda abengi basuminemo, fyalelenga abantu abalecula baleumfwa ukuti tabacindeme. Lelo nga filya fine Esaya asobele, Yesu alebondapa kabili alelenga baleumfwa ukuti Lesa alebasakamana. Bushe ifi filenga twalamona ukuti Yesu atumona shani?

9. Bushe amashiwi yaba pa AbaHebere 4:​15, 16 yalangilila shani ukuti Yesu Shimapepo wesu Umukalamba, alalangulukilako abantu?

⁹ Belengeni AbaHebere 4:​15, 16. Kuti twacetekela ukuti lyonse fye Yesu akulatulangulukilako. Bushe umuntu uulangulukilako abantu aba shani? Umuntu uulangulukilako abantu alomfwa ububi nga amona umunankwe alecula, kabili alacitapo cimo pa kuti amwafwe. Ishiwi lya ciGriki ilyo bapilibula ukuti “ukulangulukilako” lipilibula ukuti umuntu aleumfwa nge fyo uulecula aleumfwa. (Moneni na pa AbaHebere 10:34 apo Paulo abomfeshe ishiwi limo line ilya ciGriki.) Nga twabelenga pa fipesha mano ifyo Yesu alecita, kuti twamona ukuti alelangulukilako sana abantu. Taleundapa abantu pa mulandu wa kuti e fyo alingile fye ukucita. Lelo ni co alebabikako sana amano kabili alefwaya ukubafwa. Ku ca kumwenako, ilyo aundepe umwaume uwalwele ifibashi, afwaya nga aiminine fye akatalamukila pa kumundapa. Lelo alipaleme kabili alimwikete. Nalimo uyu e wali umuku wa kubalilapo umuntu munankwe amwiketepo mu myaka iingi! Na kabili, Yesu alilangulukileko umwaume uwali nkomamatwi pantu alimufumishe pa bantu apali icongo, e lyo ayamundapila pa mbali. Na lintu umuFarise umo alangile ukuti tali ne cikuuku ku mwanakashi umo uwalapiile, kabili uwabomfeshe amakasa ya kwa Yesu ku filamba fyakwe no kuyakumuna ku mushishi wakwe, Yesu alimupokolweleko. (Mat. 8:3; Marko 7:33; Luka 7:44) Twamona ukuti Yesu talesuula abantu abalwele nelyo abacitile imembu ishikalamba. Lelo alebapokelela kabili alebalanga ukuti alibatemenwe. Te kuti tutwishike ukuti ifi fine e fyo na ifwe atulangulukilako.

IFYO TUCITA PA KUTI TULEPASHANYA SHIMAPEPO WESU UMUKALAMBA

10. Finshi twingabomfya pa kwafwa bankomamatwi na bashimona? (Moneni ne fikope.)

¹⁰ Apo tuli basambi ba kwa Yesu aba cishinka, tulesha na maka yesu yonse pa kuti tulelanga ukuti twalitemwa abantu, tulabomfwila uluse kabili tulabalangulukilako. (1 Pet. 2:21; 3:8) Nangu ca kuti te kuti tundape bankomamatwi na bashimona, kuti twabafwa pa kuti bengaba ifibusa fya kwa Yehova. Ku ca kumwenako, pali lelo twalikwata impapulo ishilanda pali Baibo mu ndimi sha bankomamatwi ukucila pali 100. Na kabili twalikwata impapulo sha bantu abashimwenekesha nelyo abashimona mu ndimi ukucila pali 60. Twalikwata na mavidio umo balondolola ne filecitika. Aya mavidio yaba mu ndimi ukucila pali 100. Ishi mpapulo na mavidio filenga bankomamatwi na bashimona baba ifibusa fya kwa Yehova no Mwana wakwe.

11. Bushe icilonganino ca kwa Yehova cilanga shani ukuti calibika amano ku bantu bonse nga filya Yesu alecita? (Imilimo 2:​5-7, 33) (Moneni ne fikope.)

¹¹ Icilonganino ca kwa Yehova cilesha na maka pa kuti cileafwa abantu bonse fye pa kuti babe ifibusa fya kwa Yehova. Ibukisheni ukuti ilyo Yesu abuushiwe, alipongolwele umupashi wa mushilo pa kuti bonse abalongene pa mutebeto wa Pentekoste bengomfwa imbila nsuma, cila muntu “mu lulimi lwakwe.” (Belengeni Imilimo 2:​5-7, 33.) Apo Yesu alatungulula icilonganino ca kwa Yehova, muno nshiku ici cilonganino calipilibula impapulo mu ndimi ukucila pali 1,000, kabili shimo pali ishi ndimi bantu fye abanono abashilanda. Ku ca kumwenako, ku North America na ku South America kwaliba indimi isha kuti bantu fye abanono abashilanda. Na lyo line, icilonganino ca kwa Yehova calipilibula impapulo mu ndimi ukucila pali 160 pali ishi ndimi, pa kuti abantu abengi abalanda ishi ndimi bengomfwa imbila nsuma. Na kabili twalipilibula impapulo shesu mu ndimi ukucila pali 20 isho abena Roma balanda. Abengi abalanda ishi ndimi balitampa ukubombela Yehova.

12. Finshi fimbi ifyo icilonganino ca kwa Yehova cicita pa kwafwa abantu muno nshiku?

¹² Ukulunda pa kwafwa abantu pa kuti bengomfwa imbila nsuma, icilonganino ca kwa Yehova cilafwa na bantu abaponenwa na masanso ayakalamba. E ico bamunyinefwe na bankashi abengi balaipeelesha ukuya mu kwafwa aba bwananyina abaponenwa na masanso ya musango uyu. Na kabili icilonganino ca kwa Yehova cilakuula ifikuulwa fya kulonganinamo umo abantu balonganina iyo balesambilila pa fyo Lesa abatemwa.

SHIMAPEPO WESU UMUKALAMBA KUTI AMWAFWA

13. Ni nshila nshi shimo isho Yesu atwafwilamo?

¹³ Yesu kacema wesu umusuma alashininkisha ukuti natukwata fyonse ifyo tukabila pa kuti twingatwalilila ukuba ifibusa na Yehova. (Yoh. 10:14; Efes. 4:7) Inshita shimo kulaba ifilenga twafuupuka sana ica kuti twaba fye kwati ciku icili mu kushima nelyo kwati litete ilyafunika. Kuti twafuupuka pa mulandu wa kuti twalilwala sana, twalicitapo icilubo nelyo twalipusana no wa bwananyina mu cilonganino. Kuti catukosela ukubika amano kwi subilo twakwata ilya fintu ifisuma, lelo twalabika fye amano ku fyo tulecula. Nomba muleibukisha ukuti Yesu alamona ifyo mucula kabili aleshiba ne fyo mumfwa. Apo alamulangulukilako, akulamwafwa. Ku ca kumwenako, nga namufuupuka, kuti amutumina umupashi wa mushilo pa kuti umukoshe. (Yoh. 16:7; Tito 3:6) Na kabili Yesu kuti abomfya baeluda na ba bwananyina bambi mu cilonganino pa kuti bamukoselesheko, bamutungilile kabili bamwafwe.—Efes. 4:8.

14. Finshi tufwile ukucita nga twafuupuka?

¹⁴ Nga namufuupuka, muleibukisha ukuti Yesu ni Shimapepo wesu Umukalamba kabili muletontonkanya sana pa fyo aba. Muleibukisha ukuti Yehova tatumine Yesu pano isonde pa kuti fye ese atufwile. Lelo amutumine na pa kuti ese eshibe amafya ayo fwe bantu abashapwililika tukwata. Nga ca kuti natufuupuka pa mulandu wa mafya tukwete nelyo pa mulandu wa membu isho tucitile, Yesu ali-ipekanya ukutwafwa “pa nshita yalinga.”—Heb. 4:​15, 16.

15. Cinshi calengele ba Stefano abalekele ukubombela Yehova babwelele mu cilonganino?

¹⁵ Na kabili Yesu alatungulula abantu bakwe ilyo balefwaya abafuma mu cilonganino ca kwa Yehova pa kuti babafwe, babwele. (Mat. 18:​12, 13) Natulandeko pa fyo cali kuli ba Stefano.b Pa numa ya kubafumya mu cilonganino pa myaka 12, bushiku bumo balile mu kulongana. Ba Stefano balandile abati: “Kwena calinkosele, nomba nalefwaya ukutendeka ukubombela Yehova pamo na ba bwananyina. Baeluda abo nalanshenye nabo balimpokelele bwino. Inshita shimo naleumfwa ububi sana pali filya nalekele ukubombela Yehova, kabili nalefwaya no kulekelela fye ukumubombela. Lelo baeluda balinjibukisheko ukuti Yehova na Yesu balefwaya ukuti ntwalilile ukubombela Yehova. Ilyo nabweshiwe, aba bwananyina bonse mu cilonganino balimpokelele bwino pamo no lupwa lwandi. Mu kupita kwa nshita, umwina mwandi alisumine ukutendeka ukusambilila Baibo, kabili pali ino nshita ine no mwina mwandi tulabombela Yehova.” Ala Shimapepo wesu Umukalamba uwatutemwa alatemwa icine cine nga amona ifyo twafwa abantu abalapila, babwelela kuli Yehova, batendeka no kulongana!

16. Mulandu nshi mutashisha Yehova pa kutupeela Shimapepo Mukalamba uutulangulukilako?

¹⁶ Ilyo Yesu ali pano isonde, aleafwa abantu abengi nga nshi pa nshita ilya ine balefwailapo ubwafwilisho. Muno nshiku kuti twashininkisha ukuti na ifwe bene akulatwafwa ilyo tulekabila ubwafwilisho. Kabili mu calo cipya akalenga tukakwate ubumi ubusuma kabili ubwapwililika. Ala tulatasha nga nshi Lesa wesu Yehova pantu alitutemwa sana ica kuti alisala Umwana wakwe pa kuti abe Shimapepo wesu Umukalamba uutulangulukilako!