ICIPANDE CA KUSAMBILILAMO 47
ULWIMBO 38 Akamukosha
‘ Mwalitemwikwa nga Nshi’!
“ Walitemwikwa nga nshi.”—DAN. 9:23.
IFYO TWALASAMBILILAPO
Twalasambilila pa fyo abantu abaimona ukuti tabacindama bengacita pa kuti bashininkishe ukuti Yehova abamona ukuti balicindama.
1-2. Finshi twingacita pa kuti tushininkishe ukuti Yehova atumona ukuti twalicindama?
YEHOVA amona ababomfi bakwe bonse ukuti balicindama. Lelo ababomfi bakwe bamo baimona ukuti tabacindama. Nalimo icalenga baleimona ifi, ni co bamo balibebelepo fimo nelyo balibacitilepo fimo ifyalengele baleimona ukuti tabacindama. Bushe na imwe muimona ukuti tamwacindama? Nga ca kuti ifi e fyo muimona, finshi fingalenga mwashininkisha ukuti Yehova amumona ukuti mwalicindama?
2 Cimo ico mwingacita, kubelenga amalyashi ya mu Baibo ayalanga ifyo Yehova afwaya abantu balemona abantu banabo. Yesu Umwana wakwe alecindika abantu kabili aleba ne cikuuku kuli bena. Ifi alecita fyalelanga ukuti ena na Wishi bamona abantu abaimona ukuti tabacindama ukuti balicindama sana. (Yoh. 5:19; Heb. 1:3) Muli cino cipande twalasambilila (1) pa fyo Yesu alengele abantu balaimona ukuti Yehova alebamona ukuti bali abacindama na (2) pa fyo twingacita pa kuti tushininkishe ukuti Yehova atumona ukuti twalicindama sana.—Hag. 2:7.
IFYO YESU ALENGELE ABANTU BALAIMONA UKUTI YEHOVA ALEBAMONA UKUTI BALICINDEME SANA
3. Finshi Yesu acitiile abena Galili abaile kuli ena pa kuti abafwe?
3 Ilyo Yesu alebila imbila nsuma mu Galili pa muku walenga butatu, abantu ukufuma mu ncende ishalekanalekana baleya kuli ena. Balekutika ilyo alebila imbila nsuma kabili alebondapa amalwele. Yesu alimwene ukuti “balebacusha kabili bali abapaswa nge mpaanga ishabula kacema.” (Mat. 9:36) Intungulushi shabo isha mapepo shalibasuulile kabili shalebamona fye ukuti bali ‘abatiipwa.’ (Yoh. 7:47-49) Lelo Yesu ena alibacindike kabili ali ne cikuuku kuli bena, pantu alebatekanishisha pa kubasambilisha kabili alibondepe. (Mat. 9:35) Na kabili pa kuti engafwa abantu na bambi, alisambilishe abasambi bakwe ifya kubila imbila nsuma, kabili alibapeele na maka ya kuposha amalwele.—Mat. 10:5-8.
4. Finshi tulesambilila kuli filya Yesu alemona abo abantu balemona ukuti tabali abacindama?
4 Filya Yesu alecindika abalekutika kuli ena, kabili filya alebalangulukilako, fyalelangilila ukuti abo abantu muli cino calo bamona ukuti tabacindama, Yesu na Wishi bena babamona ukuti balicindama. Nga ca kuti mulabombela Yehova, nomba mumona ukuti Yehova amumona ukuti tamwacindama, muletontonkanya pa fyo Yesu aleba ne cikuuku ku bantu abo balemona ukuti tabacindeme, lelo abalefwaya ukuti abasambilishe. Nga mulecita ifi, mukashininkisha ukuti Yehova amumona ukuti mwalicindama.
5. Landeniko pa fyo umwanakashi uo Yesu akumene nankwe mu Galili ali.
5 Yesu talepelela fye pa kusambilisha amabumba ya bantu, lelo alebika amano na ku muntu umo umo. Ku ca kumwenako, ilyo alebila imbila nsuma mu Galili, alikumene no mwanakashi uwalwele ubulwele bwa kufuma umulopa pa myaka 12. (Marko 5:25) Ubu bulwele uyu mwanakashi alwele, bwalengele aba uwakowela. Kabili onse uwali no kumukumya, na o wine ali no kuba uwakowela. Uyu mwanakashi afwile taleba sana pamo na bantu, kabili ilingi line afwile aleba fye eka. Na kabili taleya pe sunagoge mu kupepela pamo na bantu banankwe. (Lebi 15:19, 25) Ukwabula no kutwishika uyu mwanakashi alecula sana pa mulandu no bulwele alwele kabili aleimona ukuti tacindeme.—Marko 5:26.
6. Finshi umwanakashi uwalwele ubulwele bwa kufuma umulopa acitile pa kuti apole?
6 Uyu mwanakashi alecula sana pa mulandu no bulwele alwele. E ico alefwaya ukuti Yesu amundape. Lelo tamwebele ukuti amundape. Cinshi ashamwebele? Nalimo ni co aleumfwa insoni pa mulandu no bulwele alwele. Nelyo ni co alemona ukuti Yesu ali no kumutamfya nga ca kuti aya mwi bumba e lyo ninshi ali uwakowela. E ico aileikata fye ica kufwala ca kwa Yesu ica kunse, kabili alicetekele ukuti nga acita ifi, ali no kupola. (Marko 5:27, 28) Caliweme filya alangile ukuti ali ne citetekelo pantu ifyo acitile fyalengele apola. Lyena Yesu alipwishe ati, “Nani aikata ku fya kufwala fyandi?” Uyu mwanakashi alisumine ukuti e wamwikete. Finshi Yesu acitile?
7. Finshi Yesu acitiile umwanakashi uwalecula sana? (Marko 5:34)
7 Yesu ali ne cikuuku kuli uyu mwanakashi kabili alimucindike. Alimwene ukuti “alitiinine kabili aletutuma fye.” (Marko 5:33) Apo Yesu alishibe ifyo uyu mwanakashi aleumfwa, ali ne cikuuku kuli ena kabili alimukoseleshe. Amwitile no kuti “we mwana.” Aya mashiwi Yesu abomfeshe, yalangile ukuti alimucindike, ali ne cikuuku kuli ena kabili alimutemenwe. (Belengeni Marko 5:34.) Ni pali ici cikomo fye e po Baibo yalanda ukuti Yesu aitile umwanakashi ukuti “we mwana.” Nalimo icalengele amwite ifi, ni co alimwene ukuti uyu mwanakashi alitiinine sana. Elenganyeni ifyo uyu mwanakashi aumfwile pali filya Yesu amwitile! Yesu akanamukoselesha, kwena ukupola kwena nga alipolele, nomba nga afumine mwi bumba ninshi ali no bulanda sana pali filya acitile pantu ali uwakowela. Lelo Yesu alilengele ulya mwanakashi amona ukuti Yehova Shifwe wa ku muulu uwatutemwa, alemumona ukuti ali mwana wakwe umwanakashi uwacindama.
8. Mafya nshi nkashi Maria akwete?
8 Na muno nshiku mwine, ababomfi ba kwa Lesa bamo balilwala amalwele ayalenga baleumfwa ububi sana, kabili baleumfwa ukuti tabacindama. Ku ca kumwenako, nkashi Mariaa painiya wa nshita yonse uwa ku Brazil uwafyelwe ukwabula amolu no kuboko kwa ku kuso, alandile ati: “Abana be sukulu banandi balenseka sana pa mulandu ne fyo nalemana. Balenjita na mashina ayabi. Inshita shimo, balupwa lwandi nabo bene balencusha, kabili ifyo balencita fyalelenga ndeumfwa ukuti nshacindama.”
9. Ni bani balengele ba Maria beshibe ukuti Yehova abamona ukuti balicindama?
9 Cinshi calengele ba Maria baleke ukumfwa ububi kabili baleke ukulaimona ukuti tabacindeme? Ilyo baishileba Inte ya kwa Yehova, aba bwananyina balebasansamusha kabili balelenga balaimona ukuti balicindama nga filya fine Yehova abamona. Ba Maria balandile abati: “Te kuti nkumemo ukulumbula bamunyinefwe na bankashi abangafwa! Ndatasha Yehova pa fyo alenga naba mu lupwa lwa ku mupashi ulusuma nga nshi.” Bamunyinefwe na bankashi balilenga ba Maria balaimona ukuti Lesa abamona ukuti balicindama icine cine.
10. Mafya nshi Maria umwina Magadala akwete? (Moneni ne fikope.)
10 Natulandeko na pa fyo Yesu ayafwile umwanakashi na umbi, Maria umwina Magadala. Ali ne fibanda 7! (Luka 8:2) Pa mulandu ne fibanda akwete, nalimo alecita ifintu fimbi fimbi fye, kabili ifi fyalelenga abantu balemutaluka. Alecula icine cine, aletiina sana kabili alemona ukuti takwali nangu umo uwamutemenwe nelyo uwali no kumwafwa. Yesu alifumishe ifibanda ifyalemucusha kabili aishileba umusambi wakwe. Cinshi cimbi Yesu acitile pa kuti Maria umwina Magadala eshibe ukuti Lesa alemumona ukuti ali uwacindama?
Bushe Yesu alengele shani Maria umwina Magadala ashininkisha ukuti Yehova alemumona ukuti ali uwacindama? (Moneni paragrafu 10-11)
11. Finshi Yesu acitiile Maria umwina Magadala ifyalengele ashininkishe ukuti Lesa alemumona ukuti ali uwacindama? (Moneni ne fikope.)
11 Yesu aebele Maria umwina Magadala ukuti alebila nankwe imbila nsuma pamo na basambi bambi.b Ici calengele atwalilile ukukutika kuli Yesu ilyo alebila imbila nsuma. Na kabili, Yesu alimoneke kuli ena pa bushiku abuushiwe. Maria umwina Magadala ali pa basambi abo Yesu abalilepo ukulanda nabo pali bulya bushiku. Yesu alimwebele no kuti aye ebe abasambi bambi ukuti nabuushiwa. Ala ifi fyonse ifyo Yesu amucitiile, fyalengele Maria umwina Magadala ashininkisha ukuti Yehova alemumona ukuti ali uwacindama icine cine!—Yoh. 20:11-18.
12. Cinshi calengele nkashi Lidia alemona ukuti takwali nangu umo uwali no kumutemwa?
12 Nga filya fine cali kuli Maria umwina Magadala, na bantu abengi nabo muno nshiku bamona ukuti takwaba nangu umo uwingabatemwa. Nkashi Lidia uwa ku Spain atile ilyo banyina bamwimiite, balefwaya ukuponya ifumo. Ebukisha no kuti na lintu ali umwaice sana banyina balimulekeleshe kabili balemweba amashiwi ayabipa. Uyu nkashi alandile ati: “Apo bamayo tabantemenwe, lyonse nalefwaya abantu bambi bantemwe kabili babe ifibusa fyandi. Nomba nalemona ukuti takwali nangu umo uwali no kuntemwa pantu bamayo balenjeba ukuti nali umuntu umubi.”
13. Finshi fyalengele ba Lidia bashininkishe ukuti Yehova abamona ukuti balicindama?
13 Ilyo ba Lidia batampile ukusambilila Baibo, balyalwike mu fyo baleimona. Pa mulandu wa kuti balepepa kuli Yehova, balebelenga Baibo, aba bwananyina balebeba amashiwi ayasuma kabili balebacitila ifintu ifisuma, balishininkishe ukuti Yehova abamona ukuti balicindama. Balandile abati: “Ilingi line abena mwandi balanjeba ukuti balintemwa sana. Lyonse balanjebako pa mibele iisuma iyo nakwata. Ifi fine e fyo na ba bwananyina bacita.” Bushe mwalishibako umuntu uo mufwile ukulaebako amashiwi ayasuma, kabili uo mulingile ukulacitilako ifisuma pa kuti engashininkisha ukuti Yehova amumona ukuti alicindama?
IFYO TWINGACITA PA KUTI TULEIMONA NGE FYO YEHOVA ATUMONA
14. Bushe amashiwi yaba pali 1 Samwele 16:7 yalenga shani twalaimona nge fyo Yehova atumona? (Moneni na kabokoshi akaleti “Mulandu Nshi Yehova Amwena Abantu Bakwe Ukuti Balicindama?”)
14 Muleibukisha ukuti Yehova tamumona nge fyo abantu ba muli cino calo bamumona. (Belengeni 1 Samwele 16:7.) Abantu abengi muli cino calo bacindika umuntu nga ca kuti alamoneka bwino, nelyo alikwata indalama ishingi, nangu alisambilila sana. Nomba ifi, te fyo Yehova ena aba. (Esa. 55:8, 9) E ico mu cifulo ca kulaimona nge fyo aba muli cino calo bamumona, muleimona nge fyo Yehova amumona. Nalimo kuti mwabelengako amalyashi yamo aya mu Baibo ayalanga ifyo Yehova alemona abantu bamo ukuti bali abacindama, nangu ca kuti inshita shimo abene baleimona ukuti tabacindeme. Nalimo kuti mwabelengako ilyashi lya kwa Eliya, ilya kwa Naomi, nelyo ilya kwa Hana. Na kabili kuti mwalembako fimo ifilangilila ukuti cine cine Yehova alimutemwa kabili amumona ukuti mwalicindama. Kuti mwabelengako ne fyebo ifyaba mu mpapulo shesu ifilanda pa fyo mwingacita nga ca kuti muimona ukuti tamwacindama.c
15. Cinshi calengele Yehova alemona Daniele ukuti ali ‘uwatemwikwa nga nshi’? (Daniele 9:23)
15 Muleibukisha ukuti apo mwaliba aba cishinka kuli Yehova, amumona ukuti mwalicindama. Inshita imo kasesema Daniele, nalimo ninshi ali ne myaka mupepi na 100 ‘alifunshike’ kabili alifuupwike. (Dan. 9:20, 21) Bushe Yehova amukoseleshe shani? Lesa atumine malaika Gabriele uwailemweba ukuti ali ‘uwatemwikwa nga nshi’ no kuti Yehova alyumfwile amapepo ayo alepepa. (Belengeni Daniele 9:23.) Cinshi calengele Lesa atemwe sana Daniele? Cimo icalengele ni co Daniele alitemenwe ubulungami kabili ali uwa cishinka. (Esek. 14:14) Yehova alilengele ili lyashi lyalembwa mu Baibo pa kuti liletusansamusha. (Rom. 15:4) Na imwe bene Yehova alakutika amapepo yenu, kabili amumona ukuti mwalicindama pa mulandu wa kuti mwalitemwa ifyalungama kabili mumubombela ne cishinka.—Mika 6:8 futunoti; Heb. 6:10.
16. Finshi mwingacita pa kuti mulemona ukuti Yehova ni Shinwe uwamutemwa?
16 Mulemona Yehova ukuti ni Shinwe uwamutemwa. Afwaya ukumwafwa, tafwailisha ifilubo muli imwe. (Amalu. 130:3; Mat. 7:11; Luka 12:6, 7) Abengi abaleimona ukuti tabacindama balileka ukuimona ifi pa mulandu wa kuti balatontonkanya sana pali ici cishinka. Ku ca kumwenako, natulandeko pali nkashi Michelle uwa ku Spain uwaleumfwa ukuti takwali nangu umo uwamutemenwe no kuti tacindeme pa mulandu wa kuti umwina mwakwe alemusaalula pa myaka iingi. Alandile ati: “Lyonse nga naumfwa ukuti nshacindama, ndesha ukwelenganya Yehova nansendela pa maboko yakwe e lyo ndeumfwa ukuti alintemwa kabili nalicingililwa.” (Amalu. 28:9) Nkashi Lauren uwa ku South Africa na o alandile ati: “Apo Yehova alinkula ‘ne myando yakwe iya kutemwa,’ alilenga natwalilila ukuba cibusa wakwe pa myaka yonse iyi, kabili alinsuminisha no kulasambilisha abantu icine pali ena, ninshi ukwabula no kutwishika alintemwa kabili amona ukuti nalicindama.”—Hos. 11:4.
17. Cinshi cingalenga mwashininkisha ukuti Yehova alimutemwa? (Amalumbo 5:12) (Moneni ne cikope.)
17 Mufwile ukushininkisha ukuti Yehova alimutemwa. (Belengeni Amalumbo 5:12.) Davidi alingenye ifyo Yehova acingilila abantu ku “nkwela iikalamba” iicingilila abantu abalungama. Nga mwaishiba ukuti Yehova alimutemwa kabili alamwafwa, te kuti muletwishika nga ca kuti amumona ukuti mwalicindama. Kuti mwaishiba shani ukuti Yehova alimutemwa? Nga fintu tusambilile, alitweba ukuti alitutemwa mu Cebo cakwe. Na kabili ukupitila muli baeluda, ifibusa fyesu na ba bwananyina, alatwibukishako ukuti atumona ukuti twalicindama. Finshi mufwile ukucita nga ca kuti abantu bamukoselesha?
Nga twaishiba ukuti Yehova atumona ukuti twalicindama, te kuti tuleimona ukuti tatwacindama (Moneni paragrafu 17)
18. Mulandu nshi mulingile ukusuminina nga ca kuti abantu bamutasha?
18 Nga ca kuti abantu abamwishiba kabili abamutemwa bamutasha, mulesumina. Muleibukisha ukuti nalimo abo bene e bo Yehova alebomfya pa kuti mushininkishe ukuti alimutemwa. Nkashi Michelle uo tulandilepo kale atile: “Panono panono ndeya ndesumina amashiwi ayasuma ayo abantu banjeba. Kwena cilankosela ukusumina, lelo nalishiba ukuti ifi fine e fyo Yehova afwaya ukuti ndecita.” Ifyo baeluda bafwa ba Michelle na fyo fyalilenga bashininkisha ukuti Yehova alibatemwa. Pali ino nshita ba Michelle ni bapainiya ba nshita yonse kabili balabombako ne milimo ya pa Bethel ku ng’anda ku mwabo.
19. Cinshi cingalenga mwashininkisha ukuti Lesa amumona ukuti mwalicindama?
19 Yesu alatwibukishako ukuti Shifwe wa ku muulu atumona ukuti twalicindama sana. (Luka 12:24) Kanshi kuti twashininkisha ukuti Yehova alitutemwa nga nshi. Ala twikatala atulaba ici cishinka! Na kabili natule-esha na maka yesu yonse pa kuti tulelenga abantu bambi nabo balemona ukuti Lesa abamona ukuti balicindama!
ULWIMBO 139 Elenganyeni Ukuti E ko Muli Ilyo Fyonse Fyalengwa Ifipya
a Amashina yamo nabayalula.
b Cimoneka kwati Maria umwina Magadala ali pa banakashi abaleya mu kubila imbila nsuma pamo na Yesu. Aba banakashi balebomfya indalama shabo pa kusakamana Yesu na batumwa bakwe.—Mat. 27:55, 56; Luka 8:1-3.
c Ku ca kumwenako, kuti mwamona icipandwa 24 ice buuku ilitila Palameni Kuli Yehova, kabili kuti mwabelenga Amalembo na malyashi ya mu Baibo pa mutwe uutila “Ukuimona Ukuti Tatwacindama” mu citabo citila Amalembo Ayengafwa Abena Kristu mu Mikalile.