Amepusho Ukufuma ku Babelenga
Finshi Yehova ali no ‘kulenga’ amabuteko yakacite nomba line?
Pa Ukusokolola 17:16, 17, Baibo yalilondolola ifyo ubucushi bukalamba bukatendeka. Itila: “Insengo 10 ne ciswango ifyo wacimona, fikapata cilende kabili fikamupokolola fye fyonse ifyo akwata no kumusha ubwamba, fikalya no mubili wakwe kabili fikamoca fye onse mu mulilo. Pantu ni Lesa walenga ukuti imitima ya fiko icite ifyo umwine alefwaya, no kuti fifikilishe amapange ya fiko aya kupeela iciswango ubufumu bwa fiko.” Kale impapulo shesu shalandile ukuti ico Yehova ‘akalenga’ amabuteko yakacite, konaula imipepele ya bufi yonse.
Nomba natwalula ifyo twaishibe. Ico Yehova akalenga amabuteko yakacite, ‘kupeela iciswango ubufumu bwa yako.’ Pa kuti tumfwikishe ifyo ifi fikafikilishiwa, natwasuke amepusho yakonkapo.
Bushe ifyo ubu busesemo bulandapo fimininako finshi? “Cilende” uo Baibo ita no kuti “Babiloni Mukalamba” emininako imipepele yonse iya bufi. “Iciswango icakashika ce,” cimininako akabungwe ka United Nations. Aka akabungwe bakapangile mu 1919 pa kuti kalelenga mwi sonde lyonse muleba umutende. Ilyo bakapangile baleketa ukuti League of Nations. (Ukus. 17:3-5) “Insengo 10” shimininako amabuteko yonse ayatungilila iciswango icakashika ce.
Bushe cilende ne ciswango icakashika ce fibombela shani pamo? Cilende ‘aikala pa’ ciswango icakashika ce, alacitungilila, kabili alesha no kucitungulula.
Finshi fikacitikila cilende? Iciswango pamo ne nsengo 10 ishicitungilila “fikapata cilende.” Pa mulandu wa kuti fikamupata, fikamupoka fyonse ifyo akwata, kabili fikalenga bonse bakeshibe ukuti mubi sana. Lyena fikacita ifyo Yehova afwaya, e kutila ukonaula cilende umupwilapo. (Ukus. 17:1; 18:8) E fyo imipepele yonse iya bufi ikaloba. Nomba ilyo imipepele ya bufi ishilaloba, Yehova akalenga amabuteko yakacite icintu ico yashatala ayacitapo.
Cinshi Yehova akalenga amabuteko yakacite? Yehova akalenga insengo 10 shikapeele “iciswango [icakashika ce] amaka ya shiko no bufumu bwa shiko.” Ici iciswango icakashika ce kabungwe ka United Nations. (Ukus. 17:13) Bushe amabuteko yakaitemenwa fye ukupeela ici iciswango amaka no bufumu bwa yako? Awe! Ubu busesemo bulangilila ukuti Lesa umwine e ukalenga yakacite ifi. (Amapi. 21:1; linganyeniko Esaya 44:28.) Bushe amabuteko yakaya yalepeela ici iciswango amaka panono panono? Awe! Amabuteko yakangufyanya ukupeela ici iciswango amaka. Lyena ici iciswango cikacita ifyo Yehova afwaya, e kutila cikonaula imipepele ya bufi yonse.
Finshi twingenekela ukuti e fikacitika? Tatufwile ukwenekela ukumfwa amalyashi ayakalalangilila ukuti panono panono amabuteko nayatampa ukulatungilila sana akabungwe ka United Nations. Ico twingenekela ca kuti: Mu kupumikisha fye Yehova ali no kulenga amabuteko yonse yakapeele akabungwe ka United Nations amaka. Ifi nga fyacitika, tukeshiba ukuti ubucushi bukalamba buli mu kutendeka. Pali ino nshita natutwalilile ukuba ‘abalola kabili tuletontonkanya bwino’ pantu mu kupumikisha fye ifintu fili no kwaluka nomba line!—1 Tes. 5:6.