ICIPANDE CA KUSAMBILILAMO 51
ULWIMBO 132 Nomba Twaba Umubili Umo
Ifyo Mwingapekanya Ubwinga Ubwingalenga Yehova Acindikwa
“Fyonse fifwile ukulacitika bwino bwino kabili ukwabula icimfulumfulu.”—1 KOR. 14:40.
IFYO TWALASAMBILILAPO
Twalasambilila pa fyo Abena Kristu abalefwaya ukuupana bengacita pa kuti bengapekanya ubwinga ubwingalenga Yehova acindikwa.
1-2. Bushe Yehova afwaya ubwinga bwenu bwaba shani?
BUSHE mwalikobekela nangu mwalikobekelwa? Nga ca kuti e fyo caba, ninshi cawama sana! Nalimo pali ino nshita namukwata ifya kucita ifingi pa kuti mupekanye ubwinga bwenu. Yehova afwaya mukabe ne nsansa pa bwinga bwenu,a kabili afwaya mukabe ne nsansa mu cupo cenu.—Amapi. 5:18; Ulwimbo 3:11.
2 Ubwinga bwenu bufwile ukulenga Yehova acindikwa. Cinshi twalandila ifi, kabili kuti mwacita shani pa kuti ubwinga bwenu bukalenge Yehova akacindikwe? Nangu ca kuti cino cipande cilelanda sana pa bakobekelana abalepekanya ubwinga, ifishinka ifyo cilandilepo kuti fyatwafwa na ifwe bonse pa kuti twingacita ifingalenga Yehova acindikwa nga batwita ku bwinga, nelyo nga ca kuti abalefwaya ukuupana batweba ukuti tubapandeko amano pa fya kupekanya ubwinga.
CINSHI UBWINGA BWENU BULINGILE UKULENGELA YEHOVA ACINDIKWA?
3. Bushe abalepekanya ubwinga bafwile ukupekanya shani ubwinga bwabo, kabili mulandu nshi?
3 Abakobekelana bafwile ukupekanya ubwinga bwabo ukulingana na mashinte ya mafunde ayaba mu Cebo ca kwa Yehova. Mulandu nshi? Pantu Yehova e watendeke icupo. Yehova e wapekenye ubwinga bwa kubalilapo ilyo aufishe Adamu na Efa. (Ukute. 1:28; 2:24) Kanshi abalepekanya ubwinga bafwile ukushininkisha ukuti bapekanya ubwinga bwabo ukulingana ne fyo Lesa afwaya.
4. Cinshi abalepekanya ubwinga balingile ukupekanishisha ubwinga ubwingalenga Yehova acindikwa?
4 Na cimbi ico mulingile ukubikila amano ku fyo Yehova afwaya ilyo mulepekanya ubwinga bwenu ni ci: Yehova ni Shinwe wa ku muulu kabili ni Cibusa wenu umusuma sana. (Heb. 12:9) Ukwabula no kutwishika mufwaya ukutwalilila ukuba ifibusa na Yehova. Te kuti mufwaye icintu nangu cimo pa bushiku bwenu ubwa bwinga nangu pa bushiku fye bumbi cakalifya Cibusa wenu Yehova. (Amalu. 25:14) Nga mwatontonkanya pa fintu fyonse ifyo Yehova amucitila e lyo ne fyo akamucitila, bushe te kuti ciwame mwacita ifingalenga ubwinga bwenu bwalenga acindikwa?—Amalu. 116:12.
FINSHI MUFWILE UKUCITA PA KUTI UBWINGA BWENU BUKALENGE YEHOVA AKACINDIKWE?
5. Bushe Baibo kuti ya-afwa shani abalepekanya ubwinga pa kuti bengapekanya bwino ubwinga bwabo?
5 Baibo tayalanda pali fyonse pa fyo ubwinga bufwile ukuba nelyo pa fyo imitebeto iibako pa numa ya bwinga ifwile ukuba. Kanshi abalepekanya ubwinga kuti bapekanya ubwinga bwabo ukulingana ne fyo ifintu fili, ukulingana ne ntambi nelyo ukulingana ne fyo balefwaya. Abena Kristu ba cine bafwile no kukonka amafunde ya buteko ayalanda pa cupo. (Mat. 22:21) Nomba nga mwapekanya ubwinga bwenu ukulingana na mashinte ya mafunde ya mu Baibo, bukalenga Yehova akacindikwe kabili akabe ne nsansa. E ico mashinte nshi aya mafunde aya mu Baibo ayo mulingile ukukonka?
6. Mulandu nshi abalefwaya ukuupana balingile ukukonkela amafunde ya buteko ayalanda pa cupo?
6 Mufwile ukukonka amafunde ya buteko. (Rom. 13:1, 2) Mu fyalo ifingi abalefwaya ukuupana bafwile ukukonka amafunde ya buteko ilyo bashilaupana. Kabili bafwile ukwishiba bwino amafunde ayaba mu calo bekala. Nga mulefwaya ukwishiba ayo amafunde kuti mwaipusha baeluda.b
7. Bushe ubwinga bufwile ukuba shani?
7 Mufwile ukucita ifingalenga ubwinga bwenu bwaba ubwa mucinshi. (1 Kor. 10:31, 32) Mufwile ukwesha na maka ukucita ifingalenga abali pa bwinga bwenu balatungululwa no mupashi wa kwa Lesa ukucila ukulatungululwa no mupashi wa calo. (Gal. 5:19-26) Apo shibwinga e ukaba umutwe wa lupwa, afwile ukushininkisha ukuti abali pa bwinga bali ne nsansa, kabili ubwinga buli ubwa mucinshi. Cinshi alingile ukucita pa kuti ubwinga bube ifi? Nga ca kuti uulelanda ilyashi lya Baibo ilya bwinga ali no kutemwa, nacincimuka kabili ali no mucinshi, abalekutika ilyashi kuti bamona ukuti icupo bupe ubusuma ubo Yehova atupeela. Na kabili abalekutika kuti bamona ukuti ubwinga bwalicindama. E co Abena Kristu abengi abopana basalilapo ukuti ilyashi lya bwinga likabele pa Ng’anda ya Bufumu nga ca kuti fyonse fili fye bwino. Nga mulefwaya ilyashi lya bwinga bwenu likabele pa Ng’anda ya Bufumu, mulingile ukulembela ibumba lya baeluda kalata ninshi kucili inshita.
8. Nga mwasalapo ukukwata umutebeto wa bwinga, finshi mufwile ukucita pa kuti Yehova akacindikwe? (Abena Roma 13:13)
8 Belengeni Abena Roma 13:13. Nga mwasalapo ukukwata umutebeto wa bwinga, finshi mwingacita pa kuti abakabapo bekalalanga ukuti batungululwa no mupashi wa calo? Ishiwi lya ciGriki ilyo bapilibula ukuti “iciwowo” lilanda pa mitebeto apo balenwa sana ubwalwa no kulisha inyimbo ukufika fye no bushiku. Nga ca kuti pa mutebeto wenu uwa bwinga pakaba ubwalwa, mufwile ukutontonkanishisha limo ifyo mufwile ukucita pa kuti bonse abakalanwa bakanwe mu kulinga.c Nga mukalalisha inyimbo, iciunda cifwile ukuba fye icalinga pa kuti abantu bakalelanshanya bwino. Mufwile ukusala bwino inyimbo kabili mufwile ukwishiba amashiwi yali muli isho inyimbo pa kuti shikapunwisha nangu umo.
9. Finshi abaleupana bafwile ukushininkisha nga ca kuti pa mutebeto wabo uwa bwinga pakaba abakalandapo nelyo pakaba fimbi ifya kusansamusha abantu?
9 Bushe pa mutebeto wenu uwa bwinga pakaba abakalandapo amashiwi ayanono? Bushe mukatambishako ifikope, amavidio nelyo bushe pakaba ifintu fimbi ifikalenga abantu bakasansamuke? Ilingi line ifya musango uyu filalenga umutebeto wa bwinga wawaminako. Na lyo line mulingile ukushininkisha ukuti fyonse ifikaba pa mutebeto wenu uwa bwinga tafyakapunwishe abantu. (Fil. 4:8) Mufwile ukuyipusha amuti: ‘Bushe ifi tulefwaya ukubika pa mutebeto wa bwinga fikalanga ukuti natucindika abantu? Bushe fikalanga ukuti twalicindika icupo?’ Ne cipusho icacindamisha ico mulingile ukuyipusha ca kuti: ‘Bushe fikalenga Yehova akacindikwe?’ Nangu ca kutila kuti caba fye bwino bamo ukulandapo ifya kusekesha, tabafwile ukulanda ifishawama. Ku ca kumwenako, tabafwile ukulanda pa fintu ifingalenga abantu batampa ukutontonkanya pa bulalelale. (Efes. 5:3) Nga ca kuti balupwa lwenu ne fibusa bakalandapo, mukashininkishe ukuti bekalanda pa fintu ifyo mushilefwaya ukuti bakalandepo.
10. Mulandu nshi abalefwaya ukuupana balingile ukupekanishisha ubwinga ubwa-anguka? (1 Yohane 2:15-17)
10 Ubwinga bwenu tabufwile ukuba ubwa lulumbi. (Belengeni 1 Yohane 2:15-17.) Yehova alatemwa nga ca kuti abamupepa bale-esha na maka ukulacita ifingalenga acindikwa ukucila ukulacita ifingalenga e bo abantu balalumbanya. Kanshi Abena Kristu abaicefya te kuti bafwaye babomfya indalama ishingi sana pa kupisha ubwinga ica kuti camoneka no kuti ‘baleitakishisha pa fyo bakwata.’ Fisuma nshi fingafumamo nga mwapekanya ubwinga ubwa-anguka? Nalimo na imwe ifintu kuti fyaisaba nge fyo fyali kuli munyinefwe Mike uwa ku Norway. Alandile ati: “Pa numa ya bwinga tatwakwete inkongole, kabili ici calengele tutwalilile ukubomba bupainiya. Ubwinga bwesu bwali fye ubwa-anguka. Na lyo line bwaliweme kabili tatwalaba ifyo bwaweme.” Nkashi Tabitha uwa ku India alandile ati: “Pa mulandu wa kuti twalefwaya ubwinga bwesu bube ubwa-anguka, takwali ifyatusakamike sana. Kabili takwali ifingi ifya kupekanya ne fya kukansaninapo.”
Te mulandu no ko twikala, kuti twapekanya ubwinga ubwa-anguka, ubusuma kabili ubo twingatemwa ukulaibukisha (Moneni paragrafu 10-11)
11. Bushe shibwinga na nabwinga bafwile ukufwala no kuiyemfya shani pa bwinga bwabo? (Moneni ne fikope.)
11 Bushe mwalisala kale ifyo mukafwala pa bwinga bwenu? Ukwabula no kutwishika mufwaya mukamoneke bwino sana. Na mu nshita balelemba Baibo, shibwinga na nabwinga balefwaya ukumoneka bwino pa bwinga bwabo. (Esa. 61:10) Ca cine, ifyo mukafwala pa bwinga bwenu nalimo fikapusanako ne fyo mufwala pa nshita shimbi, na lyo line fifwile ukuba ifya mucinshi. (1 Tim. 2:9) Tamufwile ukuleka ifyo mukafwala ne fyo mukaiyemfya fikabe e cintu icacindamisha pa bwinga bwenu.—1 Pet. 3:3, 4.
12. Mulandu nshi abaleupana bashilingile ukukonkela intambi ishapusana ne fyo Baibo ilanda ishaseeka uko bekala?
12 Tamufwile ukukonka intambi ishapusana ne fyo Baibo ilanda. (Ukus. 18:4) Ilingi line intambi isho bakonka pa menga shalyampana no kupepa kwa bufi e lyo no kupupa imipashi nelyo ukutiina imipashi. Yehova alitweba ukwabula ukupita na mu mbali ukuti tufwile ukutaluka ku fintu fya musango uyu. (2 Kor. 6:14-17) Nga ca kuti uko mwikala abantu balakonka intambi shimo isho mushaishiba bwino ifyo Yehova ashimona, mufwile ukufwailapo ifyebo. Kabili mufwile ukukonka amashinte ya mafunde ya mu Baibo pa kusalapo nampo nga mukakonka isho intambi nelyo iyo.
13. Bushe abaleupana kuti bapashanya shani Yehova nga babapeela ubupe?
13 Bushe caliseeka uko mwikala abo betile ku bwinga ukupeela abopene ifya bupe? Ubupe ubo umuntu uwakwata indalama ishingi engapeela abaleupana kuti bwapusanako no bo uwakwata indalama ishinono engabapeela. Na kuba Baibo itukoselesha ukuti tufwile ukuba bakapekape, kabili nga tulepeela tulaba ne nsansa. (Amapi. 11:25; Imil. 20:35) Na lyo line tatufwile ukulenga abo twitile ku bwinga balaumfwa ukuti bafwile ukutupeelako fimo, nelyo ukulenga baumfwa ukuti nga batupeela ubupe ubunono tatwatashe. Kuti twalapashanya Yehova nga ca kuti tuletasha pa bupe bonse ubo umuntu atupeela, tuleleka abantu batupeela ukulingana na po bakwatile kabili ukulingana ne fyo bapangile mu mutima.—2 Kor. 9:7.
IFYO MWINGACITA PA KUTI MWIKWATA AMAFYA NE FYO MWINGACITA PA KUTI MUPWISHE AMAFYA AYO MWINGAKWATA
14. Mafya nshi yamo abalepekanya ubwinga bakwata?
14 Ilyo mulepekanya ubwinga ubwingalenga Yehova acindikwa, nalimo kuti mwakwata amafya. Ku ca kumwenako, nalimo kuti camukosela ukupekanya ubwinga ubwa-anguka. Ba Charlie abekala ku Solomon Islands, balandile abati: “Calitukosele ukusala abakwita ku bwinga. Twalikwata ifibusa ifingi, kabili kuno ku mwesu umuntu onse alenekela ukuti balamwita ku bwinga!” Nkashi Tabitha uo tulandilepo alandile ati: “Uko twikala, ilingi line abantu baleta abantu abengi sana ku bwinga. Palipitile inshita pa kuti abafyashi besu basumine ifyo twasalilepo ukuti tuketa fye abantu abanono ku bwinga, nalimo 100.” Ba Sarah aba ku India balandile abati: “Abantu bamo babika sana amano ku ndalama isho bakwata e lyo ne fyo abantu babamona. Balupwa lwesu bamo balipishishe amenga ya lulumbi. E ico abantu balenjeba ukuti na ine mfwile ukupisha ubwinga bwa lulumbi ukucila na pa menga ayo balupwa lwesu bapishishe.” Kuti mwacita shani pa kuti mupwishe aya amafya e lyo na mafya yambi?
15. Mulandu nshi abalepekanya ubwinga balingile ukupepela lyonse ilyo bashilatendeka ukulanshanya pa fyo ubwinga bwabo bukaba?
15 Mulepepa pa kulanshanya pa fyo ubwinga bwenu bukaba. Kuti mwaeba Yehova ubwafya bonse ubo mukwete ilyo mulepekanya ubwinga e lyo ne fyo muleumfwa. (Fil. 4:6, 7) Mulemulomba ukuti alemwafwa pa kuti mulesalapo bwino ifya kucita, muleteka umutima nga ca kuti kuli ifimusakamike, no kuti muleba abashipa nga ca kuti ifyo mwasalapo ukucita te fyo abantu abengi balefwaya mucite. (1 Pet. 5:7) Nga mwamona ifyo Yehova alemwafwa, mukamucetekela sana. Nkashi Tabitha uo tulandilepo, alandile ati: “Ine na bankobekela wandi twalesakamana ukuti nalimo twali no kulakansana no kuti nalimo twali no kulakansana na balupwa lwesu ilyo tukalalanshanya pa fyo ubwinga bwesu bwali no kuba. Kanshi lyonse ilyo tushilatendeka ukulanshanya twalebalilapo ukupepa. Twalemona ukuti Yehova aletwafwa, kabili twalelanshanya bwino.”
16-17. Bushe ukulanshanya bwino kuti kwalenga shani mwapekanya bwino ubwinga?
16 Mulelanshanya bwino. (Amapi. 15:22) Mwe balefwaya ukuupana, fingi ifyo mulingile ukulanshanyapo pa fyo mulefwaya ubwinga bwenu bukabe. Ku ca kumwenako, mufwile ukulanshanya pa bushiku mukapisha ubwinga, pa bwingi bwa ndalama mukabomfya, pa bantu mufwile ukwita e lyo na pa fintu fye fimbi. Ilyo mushilasalapo ifya kucita, mulingile ukulanshanya pa fyo bonse babili muletontonkanya, kabili mufwile ukulanshanya pa mashinte ya mafunde aya mu Baibo ayengamutungulula e lyo na pa fyo abakalamba mu fya kwa Lesa bamupandileko amano. Ilyo mulelanda pa fyo mulefwaya ubwinga bwenu bukabe, muleba ne cikuuku, mwilapampamina fye pa cintu cimo cine, kabili mulealuka. Ku ca kumwenako, nga ca kuti abafyashi benu nelyo balupwa lwenu bambi bamweba ukuti mukacite fimo pa bwinga ifilemoneka ukuti fili fye bwino, kuti mwacita ifyo bamweba. Pantu nabo bene ubushiku bwa bwinga bwenu bukaba ubwacindama kuli bena. Nga ca kuti te kuti mucite ifyo bamweba, mufwile ukubalondolwela bwino bwino ico mwakaanina. (Kol. 4:6) Mulingile ukubalondolwela bwino bwino ukuti ico mulefwaisha, kukwata ubwinga ubukalenga mukabe ne nsansa kabili ubukalenga Yehova akacindikwe.
17 Kuti camukosela ukulondolwela bwino abafyashi benu ifyo mulefwaya ubwinga bwenu bukabe, maka maka nga te ba Nte. Na lyo line kuti mwakumanisha ukubalondolwela bwino. Munyinefwe Santhosh uwikala ku India alandile ati: “Indupwa shesu shalefwaya ukuti pa bwinga bwesu pakabe ne ntambi sha baHindu. Palipitile inshita pa kuti bomfwe ico ine na nkobekela wandi twakaanine ukucitilako ifyo balefwaya. Nomba twalisumine ukucita fimbi ifyo balefwaya pantu tafyali no kukalifya Yehova. Ku ca kumwenako, twalifumishepo ifya kulya ifyo twapekenye ukuti fikabe pa mutebeto wa bwinga no kubikapo ifya kulya ifyo balefwaya. Na kabili twalisalilepo ukuti kwikaba ukwimba nelyo ukucinda pantu ilingi line tabaleficita pa menga.”
18. Kuti mwacita shani pa kuti ubwinga bwenu bukende bwino? (1 Abena Korinti 14:40) (Moneni ne cikope.)
18 Mufwile ukupekanya bwino. Nga mwapekanya bwino ifintu, te kuti musakamikwe sana pa bushiku bwa bwinga bwenu. (Belengeni 1 Abena Korinti 14:40.) Ba Wayne aba ku Taiwan balandile abati: “Ilyo kwashele inshiku ishinono ukuti tupishe ubwinga, twalikumene na baipeeleshe ukuti bakatwafwako fimo pa bwinga kabili twalilanshenye nabo. Twalilanshenye pa fyo ifintu fyali no kuba, kabili twalipitulwike muli fimo pa kuti tushininkishe ukuti ubwinga bwali no kwenda fye bwino.” Pa kuti mulange ukuti namucindika abo mwitile ku bwinga, mufwile ukwesha na maka ukukonka inshita.
Nga namupekanya bwino, ubwinga bwenu kuti bwaenda bwino (Moneni paragrafu 18)
19. Kuti mwacita shani pa kuti fyonse fikende bwino pa mutebeto wenu uwa bwinga?
19 Te kuti mukwate amafya ayengi nga ca kuti mwatontonkanishisha libela pa mafya mwingakwata na pa fyo mwingacita nga mwakwata ayo amafya. (Amapi. 22:3) Ku ca kumwenako, nga ca kuti uko mwikala abantu balaya ku bwinga nangu tababetile, mufwile ukutontonkanya pa fyo mwingacita pa kuti ifya musango uyu fikacitika. Mufwile ukulondolwela balupwa lwenu abashili ba Nte ifyo balingile ukwenekela e lyo ne fyo mumona intambi shimo isho bakonka pa menga. Kuti mwabalangako icipande citila “What Happens at a Wedding of Jehovah’s Witnesses?” icaba pa jw.org. Pa kuti ifintu fikende bwino pa mutebeto wa bwinga, kuti cawama mwasonta munyinefwe umukalamba mu fya kwa Lesa pa kuti abe “umukalamba wa mutebeto” wa bwinga. (Yoh. 2:8) Nga ca kuti mwamulondolwela bwino ifyo mulefwaya ubwinga bwenu bukabe, akamwafwa pa kuti ubwinga bukabe ubwa mucinshi, kabili fyonse fikalecitika ukulingana ne fyo mulefwaya.
20. Finshi abalefwaya ukuupana balingile ukulaibukisha ilyo balepekanya ubwinga?
20 Nga mwatontonkanya pali fyonse ifyo mulingile ukucita pa kuti mupekanye ubwinga, nalimo kuti mwasakamikwa. Na lyo line mufwile ukulaibukisha ukuti ubwinga bwenu bukabako fye pa bushiku bumo. Bukaba bushiku ubusuma ubo mukatampa ukubombela Yehova pamo. Kanshi mufwile ukwesha na maka yenu yonse pa kuti mupekanye ubwinga ubwa-anguka kabili ubwa mucinshi. Mulingile ukucetekela Yehova. Yehova nga amutungulula, kuti mwapekanya bwino ubwinga ica kuti mukalaba ne nsansa nga mwatontonkanya pa fyo bwali kabili tamwakalelanguluka.—Amalu. 37:3, 4.
ULWIMBO 107 Lesa Alitulanga Ifya Kutemwa Abantu
a UBULONDOLOSHI: Mu fyalo ifingi nga kuli ubwinga, kulaba ilyashi lya bwinga, abaleupana balalapa imilapo ya cupo pa ntanshi ya kwa Lesa, kabili balafwikana ininda minwe. Pa numa kuti kwaba umutebeto wa bwinga. Na mu fyalo umwa kuti abaleupana tabacita ifi nangu bacitako fye fimo pali ifi, bafwile ukukonka amashinte ya mafunde aya mu Baibo pa bushiku baleupana.
b Nga mulefwaya ukwishibilapo na fimbi pa fyo Abena Kristu balingile ukulamona amafunde ya buteko ayalanda pa cupo, kuti mwabelenga icipande citila “Ifyupo Ifyo Lesa na Bantu Bamona Ukuti fya Mucinshi” mu Ulupungu lwa kwa Kalinda ulwa October 15, 2006.
c Tambeni vidio iyaba pa jw.org itila, Bushe Mfwile Ukupekanya Ubwalwa?