Umukululo wa Mepusho

◼ Nga ca kuti abaleupana balefwaya ilyashi lya bwinga ukubela mu Ng’anda ya Bufumu, finshi bafwile ukulanshanya na baeluda?

Amenga ayo bacita ukulingana ne fyo amafunde ya mu Baibolo yalanda yalaleta umucinshi kuli Yehova. Ifi e fyo caba, sana sana nga ca kuti ilyashi lya bwinga lyabela mu Ng’anda ya Bufumu, pantu abantu basondwelela ukuti ificitika palya filanga fye ifyo ukupepa kwesu kwaba. Pa kuti “fyonse filecitika bwino bwino kabili ukwabula icimfulunganya,” calilinga ukuti ilyo abaleupana balomba ukuti bakabomfye Ing’anda ya Bufumu, baeluda ba pali ico cilonganino bafwile ukulanshanya nabo ifintu fimo ifikumine ubwinga.—1 Kor. 14:40.

Abaleupana abalefwaya ukuti ilyashi lya bwinga likabele mu Ng’anda ya Bufumu bafwile ukulemba kalata kuli komiti wa mulimo uwa cilonganino icibomfya iyo Ng’anda ya Bufumu, ukubepusha nga kuti bakwatilamo ilyashi lya bwinga. Bafwile ukutuma kalata ilyo kucili inshita, kabili bafwile ukulembamo ubushiku ne nshita ilyo balefwaya ukubomfya Ing’anda ya Bufumu. Bafwile ukwishiba ukuti baeluda tabakateulule inshita ya kulongana kwa cilonganino pa kuti fye bena bakakwatilemo ilyashi lya bwinga. Na kabili, nabwinga na shibwinga bafwile ukuba aba mibele iisuma, abakonka ifyo amafunde ayaba mu Baibolo yalanda kabili abakonka ifintu ifyalungama ifyo Yehova afwaya.

Pa kuti ubwinga bwabo bukalete umucinshi kuli Lesa wesu katebebe, ilyo bashilapwishisha amapekanyo yonse aya bwinga, abaleupana bafwile ukulanshanya na komiti wa mulimo pa fyo bapekenye ubwinga bwabo ukuba. Nangu ca kuti baeluda tabakapatikishe abalecita ubwinga ukukonka ifyo bena batemenwe, lelo nga kuli ifishiweme ifyo abaleupana bapekenye ukucita, baeluda bakabeba, kabili bafwile ukusumina ukwalula ifyo fintu. Inyimbo isho bafwile fye ukubomfya ma Kingdom Melodies nelyo shilya ishaba mu citabo cesu ica nyimbo. Fyonse ifyo balefwaya ukuyemfya Ing’anda ya Bufumu nelyo ifyo balefwaya ukutantika imipando bafwile intanshi baipusha baeluda. Nga ca kuti bakalakopa ifikope nelyo bakalabomfya vidio pa kukopa, abakalakopa bafwile ukucita fyonse mu mucinshi. Baeluda kuti basuminisha ukuti abaleupana balepituluka mu fyo bakacita ilyo bakaba mu Ng’anda ya Bufumu pa bushiku bwa bwinga, lelo bafwile ukucite fyo ninshi takuli abalelongana. Takuli amakardi ya kwitilapo abantu ku bwinga ayafwile ukubikwa pa cipampa ca fyebo. Lelo, baeluda kuti babilisha mu kwipifya pa Kulongana kwa Mulimo ukweba icilonganino pa lyashi lya bwinga ilikaba pa Ng’anda ya Bufumu.

Nangu ca kutila te funde ukuti bonse inshindishi bafwile ukuba ababatishiwa, lelo te kuti cibe bwino nangu panono ukubikapo abantu abo imibele yabo ilelanga ukuti tabakonka amafunde ayaba mu Baibolo, nelyo aba kuti bakalacita ifintu ifikalenga abantu abakasangwa ku bwinga ukubatwishika. Uufwile ukupeela ilyashi lya bwinga ni eluda, kano fye nga tapali eluda. Baeluda e bengalinga ukulanda pa fishinte ifya mu Malembo ifikumine ku bwinga pantu balishiba sana ukusambilisha Icebo ca kwa Lesa.—1 Tim. 3:2.

Apo ifikacitika pa bwinga fikakuma eluda ukapeela ilyashi, kanshi kuti cawama ukuti aishibila limo ifyo bapekenye ubwinga. Eluda akalanda na baleupana ukubepusha nga ca kuti baliisungile ilyo baleishishanya; kanshi abaleupana bafwile balanda fye icishinka ilyo abepusha. Nga ca kuti nabwinga nelyo shibwinga alyupilwepo nelyo ukuupapo, afwile ukushinina ukuti ifyupo fyalipwa ukulingana na Malembo no kulingana ne funde kabili nakwata insambu sha kuupa nelyo ukuupwa kuli umbi. (Mat. 19:9) Na kabili afwile ukulangisha eluda kope ya setifiketi iyo balekaninepo.

Nga ca kuti abaleupana balanshanya bwino bwino no kumfwana bwino na baeluda, awe ubwinga bwabo bukawama nga nshi kabili abantu bonse bakasangalala.—Amapi. 15:22; Heb. 13:17.