Nalisangile Ifyacindama mu Bumi

ILYO ba José bakukiile ku Santo Domingo ninshi bali fye ne myaka 11, balebomba incito ya kupukutila abantu insapato, baleshitisha amacungwa no twa kulya utwatalala uto beta abati, shaved ice pa kuti balekwata indalama sha kwikalilamo. Ilyo bakulileko, ninshi balishibikwa kale ukuti balabombesha. Mu kupita kwa nshita, abakalamba babo abali ba Nte balilombele ukuti balebasungilako ing’anda. Muli ilya ng’anda e mo basangile icitabo pe tebulo icitila, Kuti Waikala Kuli Pe na pe muli Paradise Pe Sonde kabili balicibelengele ubushiku bonse. Ba José balilwike ukuti balisangile icintu icacindama mu bumi.

Umulungu wakonkelepo, ba José baile ku Ng’anda ya Bufumu iyali mupepi no kuilondolola ku ba bwananyina. Ba José baebele aba bwananyina abati balisambilile ukuti balingile ukulalongana no kulashimikila imbila nsuma. Na kabili batile apo balibelengele icitabo ca Kuti Waikala, balisambilile ifintu ifyo Abena Kristu bashifwile ukulacita, balandile no kutila bena tabalecitako nangu cimo pali ifyo fintu. Pa numa fye ya nshiku 15, ba José balibasuminishe ukuba kasabankanya uushabatishiwa. Na kabili, pa numa fye ya myeshi 6 balibatishiwe ninshi bali ne myaka 21.

Apo incito ba José balebomba yalelenga belakwata inshita ya kulongana, basalilepo ukuileka no kutampa imbi iyo balefola amalipilo ayanono sana lelo iyalelenga balekwata inshita ya kulongana no kubomba bupainiya. Na lyo line, ilyo baupile, bakwata na bana babili, ba José balilekele bupainiya.

Ba José balefwaisha ukusambilisha abana babo icine ukutula fye ku bunya. E calengele balebelengela umwana uwali mwi fumo icitabo icitila Icitabo ca Malyashi ya mu Baibolo ilyo abena mwabo ba Josefina baali pa bukulu pantu baletontonkanya ukuti umwana wabo Noé uwali mwi fumo aleumfwa. Ilyo Noé afyelwe, ninshi ba José balimubelengela icitabo conse. Ifi fine e fyo bacitile na ku mwana wabo uwa bubili, Neftalí.

Mu kupita kwa nshita, ba José balishileba ba maneja pa kampani imo ifi apo balefola indalama ishingi sana ukucila isho balefola ku ncito iyo balebomba kale. Lelo, mu 2008 ilyo abana babo babili baali ne myaka 10 na 13, balilekele bumaneja no kutendeka bupainiya na kabili. Pali iyi nshita, baleshimikila pamo na bena mwabo e lyo na bana. Apo nomba balefola indalama ishinono sana, bonse mu lupwa balingile ukulabombela pamo pa kuti belapoosa indalama ishingi ku fya kushitashita. Bonse pamo muli ulu lupwa balatungulula amasambililo ya Baibolo nalimo 30 cila mweshi. Yesu alitulaya ukuti nga twabika Ubufumu intanshi, Yehova akalatupaala. (Mat. 6:33) Ba José no lupwa lwabo balicetekela ubu bulayo kabili balishininkisha ukuti Yehova alafikilisha fyonse ifyo alaya.