Nalipuswike Ilyo Kwali Ifimfulunganya mu Kabungwe ka Bakomyunisti

PA 1 OCTOBER mu 1965 ulucelo, abashilika ba mu kabungwe ka Indonesian Communist Party (PKI) abalefwaya ukufumyapo ubuteko ku maka, balipeye abakalamba ba bashilika ba mu buteko 6. Ilyo line fye, aba mu buteko balikalipe nga nshi ica kuti balipeye abantu nalimo 500,000 abo balemona kwati baali mu kabungwe ka bakomyunisiti. Ala kwali “ulukakala lwa kapela makufi.”

Ilyo papitile imilungu pa numa ya ifi ifimfulunganya, umukalamba wa bashilika anjebele ati ishina lyandi lyali pa mutande wa bakalamba ba macalici abo aba mu kabungwe ka bakomyunisiti balefwaya ukwipaya. Alefwaya fye no kunanga apo baimbile icilindi ca kunshikamo, lelo nalikene ukwabula ukumukalifya. Apo pali iyi nshita kwali sana ifimfulunganya mu mitekele, nshalefwaya ukwampana no yu muntu kabili nshalefwaya na bantu balemona nankwe pantu banjishibe ukuti ndi Mwina Kristu kabili nshiibimba mu fikansa fya calo.