Ukubila Imbila Nsuma mu Misumba Iikalamba

INTE sha kwa Yehova balasambilisha abantu icine ca mu Baibolo ku ng’anda ne ng’anda. Pali ino nshita balisanga ukuti ukubomfya amatebulo e lyo no tumastandi nako kulalenga baleshimikila abantu abengi imbila nsuma pa Bufumu bwa kwa Lesa. (Mat. 24:14) Bakabila ba Bufumu balabomfya amatebulo no tumastandi pa kubila imbila nsuma mu ncende umuba abantu abengi. Na kabili ifilonganino ifingi fyalipokelela kale utumastandi twamawilo nalimo 250,000 utwa kubikapo impapulo. Fisuma nshi fyafumamo mu kubomfya ishi nshila sha kubililamo imbila nsuma?

Ukutula apo inshila yaibela iya kubililamo imbila nsuma mu misumba iikalamba yatendeke mu 2014, abantu nalimo 700 mu Dar es Salaam, ku Tanzania balitendeka ukusambilila Baibolo. Abantu abengi balitendeka ukulongana kabili balepalama kuli Lesa. Mu mwaka fye umo abantu abekala mu Africa na mu fyalo fimbi balisendele impapulo ukucila pali 250,000 pa tumastandi utwamawilo.

Bakasabankanya 2,000 abekala pa fishi fya Solomon Islands, balabomfya inshila iyaibela iya kubililamo imbila nsuma mu misumba iikalamba pa kubila ku bantu abekala pa fishi ukucila pali 300. Mu musumba ukalamba uwa Honiara, aba bwananyina balipeele abantu magazini ukucila pali 104,000 na mabroshuwa 23,600. Abengi abapokele ishi mpapulo bekala mu mishi iya kutali ukushaba ba Nte. Bushiku bumo balipeele abantu amakope 400 aya citabo icitila Bushe Cinshi Baibolo Isambilisha? kabili abantu 60 balefwaya ukutendeka ukusambilila Baibolo.

Bushiku bumo ulucelo, ba Michael na ba Linda, bapainiya ba nshita yonse balebika kastandi ka kubikapo impapulo ku lulamba lwa bemba pa cishi ca Margarita, mu Venezuela. Umwaume uwe shina lya Aníbal alile pali kastandi kabili balimupeeleko icitabo icitila Ico Baibolo Isambilisha. Lyena abebele ukuti palipitile myaka 7 ukutula apo bawishi bafwilile mu lulamba lwa bemba, kabili ukutula apo bawishi bafwila banyina baliba no bulanda sana. Umulungu wa konkelepo Aníbal alibweleele kuli ba Michael na ba Linda no kuyabeba ukuti bulya bwine bushiku e bushiku bawishi bafwililepo. Lyena alitumiine banyina foni no kweba ba Michael ukuti babasansamusheko. Ukutula ilya yine nshita, banyina ba kwa Aníbal balatumina ba Michael na ba Linda foni kabili balalanshanya nabo amalembo aya kubasansamusha. Bushiku bumo, batumiine ba Michael na ba Linda meseji no kubeba abati: “Lelo ninsansamuka pantu mwalinkoselesha kabili mwalingafwile ukukosha icitetekelo candi.”

Mu United States bakasabankanya balabomfya inshila yaibela iya kubililamo imbila nsuma mu misumba iikalamba 14 mu ncende 127. Mu myeshi 7 iya kubalilapo mu mwaka wa mulimo uwa 2015, bakasabankanya balitendeke amasambililo ya Baibolo 8,445! Iyi nshila ya kubililamo imbila nsuma nayafwa na bengi abalekele ukulongana ukubwelela ku kupepa kwa cine. Ku ca kumwenako, ba Terry baile pe tebulo apo ba Nte abaupana babikile impapulo mu musumba wa Los Angeles mu California. Aba abaupana balipwishe ba Terry nga ca kuti balibelengapo impapulo shesu. Bayaswike ukuti nabo bene ni Nte ya kwa Yehova nomba palipitile ne myaka nalimo 4 ukutula apo balonganinepo nangu ukubila imbila nsuma. Aba abupana balilanshenye nabo ilembo lya Esekiele 34:11 apo Yehova atila: “Ine, ndi no kufwaya impaanga shandi no kushisakamana.” Balibebele na pali webu saiti yesu e lyo na pa mulabasa wesu uwa JW Broadcasting. Ubushiku bwakonkelepo, ba Terry balilembeele munyinefwe meseji ya pa intaneti ukumulondolwela ukuti ilyo tabalamonana nankwe, balipepele kuli Yehova ukuti abelele pa fyo balekele ukulongana. Balilombele no kuti Yehova abafwe ukupalama kuli ena. Na kabili ba Terry batile: “Mwalimposeshe ne nsansa, mwalinkoseleshe mwambelengelako ne lembo no kunjeba ifyo mfwile ukucita pa kuti mbwelele ku cilonganino ca kwa Yehova. Ala Yehova alyaswike ipepo lyandi!”

Ku Ethiopia mu musumba wa Addis Ababa mwaba incende 4 umo babika amatebulo ya kubomfya pa kubila imbila nsuma. Mu myeshi fye itatu bamunyinefwe balipeele abantu impapulo 37,275 kabili abantu 629 balefwaya ukulasambilila Baibolo. Pa bapokeleko icitabo icitila Ico Baibolo Isambilisha. paali na bashikulubantu bamo abatendeke ukubelenga ici citabo ilyo line fye babapeele. Kale, aba bashikulubantu balesambilila pe sukulu apo basambilisha ifya bushimapepo kabili balikwete ifipusho ifingi pali Yesu na pa Bufumu bwa kwa Lesa. E ico ubushiku bwakonkelepo balibweleele kuli bamunyinefwe pe tebulo pa kuti babasuke ifipusho bakwete. Papitile fye ubushiku bumo aba bashikuulubantu balitampile ukusambilila Baibolo, kabili muli ulya wine mulungu balisangilwe na mu kulongana umuku wa kubalilapo. Ino nshita balalongana lyonse kabili no kulunduluka balelunduluka.

Umwaume umuYuda, mu Mexico aliile pali kastandi no kuyaipusha bamunyinefwe babili abalipo nga ca kuti balikweteko impapulo ishilanda pa mfwa. Bamwebele ukuti magazini iyalelanda pa mfwa naipwa, lelo bamwebele ukutila kuti bamupeelako magazini imbi iyalelanda pa fikacitika ku ntanshi. Uyu mwaume aikete munyinefwe pa kuboko no kumweba ati: “Nshilefwaya ukwishiba ifikacitika ku ntanshi, ico ndefwaya fye kuipaya.” Lyena atendeke ukulila. Ilyo bamunyinefwe bamwipwishe ico alefwaila ukuipaila, atile: “Umwana wandi umwaume aliifwa nomba line,” uku ninshi aleshinshimukila no kushinshimukila. Bamunyinefwe bamulangile icipandwa 7 icaba mu citabo ca Ico Baibolo Isambilisha. Bamubelengele amaparagrafu ya kubalilapo yabili pa kamutwe akatila “Umuntu Wesu Nga Afwa” e lyo na maparagrafu ya kulekeleshako muli ici cipandwa ayalanda pe subilo twakwata pa bafwa. Ifyo bamubelengele fyalimufikile sana pa mutima ica kuti aikete munyinefwe pa kuboko na kabili no kumwipusha ati, “Bushe ifi mwambelengela fikacitika?” Bamunyinefwe bamwebele ukuti nangu cibe shani Yehova akafikilisha ifyo alaya. Lyena abepwishe ati, “Finshi mfwile ukucita pa kuti nkamone umwana wandi na kabili?” Balipekenye ukuti bakayelanshanya nankwe pa ng’anda pa mwakwe. Ilyo bafikile, basangile alebalolela ninshi naipekanya ukutendeka ukusambilila Baibolo.

Kangalila wa muputule umo uwayafwile bakasabankanya ukutendeka ukushimikila abantu ku cintubwingi ukubomfya amatebulo mu musumba wa New York atile: “Yehova alepaala iyi nshila ya kubililamo imbila nsuma! Iyi nshila iletwafwa ukulashimikila abantu abengi nga nshi. Na kabili ilelenga tulekumana na bantu abaleka ukulongana e lyo na abatamfiwa, ababa nge ‘mpaanga ishaluba’ abo tulefwaya ukuti babwelele ku mukuni.”—Esekiele 34:15, 16.