ABACAICE BEPUSHA UKUTI
Bushe Mfwile Ukubatishiwa?—Ulubali 2: Ukuipekanya Ukubatishiwa
Nga ca kuti ulakonka amafunde ya kwa Lesa ayaba mu Baibo, kabili ulacita ne fingalenga waba cibusa wa kwa Lesa, ninshi ufwile ulatontonkanya na pa kubatishiwa. Kuti waishiba shani nga nauipekanya ukubatishiwa?a
Ifili muli cino cipande
Bushe mfwile ukwishiba fyonse ifyaba mu Baibo pa kuti mbatishiwe?
Pa kuipekanya ukubatishiwa, taufwile ukusungila fimo ku mutwe nga filya umusambi uuli pa kulemba amashindano acita pa kuti akapaase. Lelo ufwile ukulabomfya ‘amaka yobe aya kupelulula’ pa kuti ushininkishe ukuti ifyo Baibo isambilisha fya cine. (Abena Roma 12:1) Ku ca kumwenako:
Bushe walishininkisha ukuti Lesa e ko aba no kuti alafwaya ulemupepa?
Baibo itila: “Uupalamina kuli Lesa afwile ukusumina ukuti e ko aba no kuti alalambula abafwaisha ukumubombela.”—AbaHebere 11:6.
Yipushe auti: ‘Cinshi calenga nsumine ukuti Lesa eko aba?’ (AbaHebere 3:4) ‘Mulandu nshi mfwile ukulamupepela?’—Ukusokolola 4:11.
Bushe ulefwaya ubushininkisho na bumbi? Mona icipande citila “Bushe Fyapangilwe Fye Nelyo Fyasangwike Fye?—Ulubali 1: Mulandu nshi Ningiile Ukusumina Ukuti Lesa E ko Aba?”
Bushe walishininkisha ukuti Lesa e mwine wa fyebo fyaba mu Baibo?
Baibo itila: “Umupashi wa kwa Lesa e watungulwile abalembele Amalembo yonse aya mushilo, kabili aya Amalembo yonse yalikwata umulimo wa kusambilisha, uwa kukalipila, uwa kulungika ifintu, uwa kusalapwila mu bulungami.”—2 Timote 3:16.
Yipushe auti: ‘Cinshi calenga nsumine ukuti Baibo te citabo umwaba amano ya bantunse?’—Esaya 46:10; 1 Abena Tesalonika 2:13.
Bushe ulefwaya ubushininkisho na bumbi? Mona icipande citila “Bushe Baibolo Kuti Yangafwa Shani?—Ulubali 1: Ukwishiba Ifyaba mu Baibolo.”
Bushe walishininkisha ukuti Yehova abomfya icilonganino ca Bena Kristu pa kufikilisha ifyo afwaya?
Baibo itila: “E ico nacindikwe [Lesa] ukupitila mu cilonganino na muli Kristu Yesu mu nkulo shonse umuyayaya umuyayaya.”—Abena Efese 3:21.
Yipushe auti: ‘Bushe imona ukuti ifyo nsambilila pa kulongana kwa Bena Kristu fifuma ku bantunse nelyo mona ukuti fifuma kuli Yehova?’ (Mateo 24:45) Bushe ndaya mu kulongana na lintu abafyashi bandi bashileko (nga ca kuti balikusuminisha ukuya ilyo bena bashileyako)?’—AbaHebere 10:24, 25.
Bushe ulefwaya ubushininkisho na bumbi? Mona icipande citila “Cinshi Ningile Ukwila ku Ng’anda ya Bufumu?”
Finshi mfwile ukulacita?
Taufwile ukuba uwapwililika pa kuti ubatishiwe. Na lyo line, ufwile ukulacita ifilelanga ukuti ulefwaisha ‘ukutaluka ku fyabipa, no kulacita ifisuma.’ (Amalumbo 34:14) Ku ca kumwenako:
Bushe lyonse ulakonka amafunde ya kwa Yehova?
Baibo itila: “Twalilileni ukuba na kampingu iisuma.”—1 Petro 3:16.
Yipushe auti: ‘Finshi ncita ifilanga ukuti “nalikwata amano ya kulekanya icalungama ne calubana”?’ (AbaHebere 5:14) ‘Bushe kuti naibukisha ilyo abanandi bampatikishe ukucita ifyabipa e lyo nakaana? Bushe abanandi balankoselesha ukucita ifyalungama?’—Amapinda 13:20.
Bushe ulefwaya ubushininkisho na bumbi? Mona icipande citila “Kuti Nasambilisha Shani Kampingu Yandi?”
Bushe walishiba ukuti Yehova akakupingwilapo pa fyo ucita?
Baibo itila: “Ifwe bonse umo umo tukalubulula kuli Lesa.”—Abena Roma 14:12.
Yipushe auti: ‘Bushe naliba ne cishinka mu fyo ncita na mu fyo ntontonkanya, kabili bushe naliba ne cishinka ku bantu bambi?’ (AbaHebere 13:18) ‘Bushe nga nalufyanya ndasumina ukuti nindufyanya, nelyo ndafisa icilubo nangu ukupeela bambi umulandu pa co ndufyenye?’—Amapinda 28:13.
Bushe ulefwaya ubushininkisho na bumbi? Mona icipande citila “Finshi Mfwile Ukucita nga Nalufyanya?”
Bushe ulacita ifilenga watwalilila ukuba cibusa wa kwa Yehova?
Baibo itila: “Palameni kuli Lesa, na o akapalama kuli imwe.”—Yakobo 4:8.
Yipushe auti: ‘Finshi ncita ifingalenga napalama sana kuli Yehova?’ Ku ca kumwenako, ‘Bushe ndabelenga Baibo lyonse?’ (Amalumbo 1:1, 2) ‘Bushe ndapepa lyonse?’ (1 Abena Tesalonika 5:17) ‘Bushe nga ndepepa, ndalanda ico ndepepelapo mu kulungatika? Bushe ifibusa fyandi fibusa fya kwa Yehova?’—Amalumbo 15:1, 4.
Bushe ulefwaya ubushininkisho na bumbi? Mona icipande citila “Bushe Baibolo Kuti Yangafwa Shani?—Ulubali 2: Ulecita Ifingalenga Watemwa Ukubelenga Baibolo” ne citila “Mulandu Nshi Ningile Ukupepela?”
IFYO WINGACITA: Pa kwishiba ifyo wingacita pa kuti uipekanye ukubatishiwa, belenga icipandwa 37 mu citabo citila Ifipusho Abacaice Bepusha—ne Fyasuko Ifingabafwa, Ibuuku 2. Ubike sana amano ku fyaba mu kabokoshi akaba pa mabula 308 na 309.
a Belenga icipande citila “Bushe Mfwile Ukubatishiwa?—Ulubali 1,” icalondolola umo ukuipeela kuli Lesa no kubatishiwa fyalola e lyo no mulandu fyacindamina.