Bushe Abalembele Baibolo Kuti Twabeshiba?

Icasuko ca mu Baibolo

Abantu abengi babeba ukutila te kuti twishibe abalembele Baibolo. Lelo Baibolo yalitweba bwino bwino abalembele ifyabamo. Ifyebo fimo ifyaba mu Baibolo fitendeka ati, “amashiwi ya kwa Nehemia,” “icimonwa ca kwa Esaya,” e lyo na “ici e cebo ca kwa Yehova icaishile kuli Yoele.”—Nehemia 1:1; Esaya 1:1; Yoele 1:1.

Abalembele Baibolo abengi balisumina ukuti ifyo balembele fyafumine kuli Yehova, Lesa wa cine, kabili e walebatungulula. Bakasesema abalembele Amalembo ya ciHebere balilanda imiku ukucila 300 ukuti: “E fyo Yehova atila.” (Amose 1:3; Mika 2:3; Nahumu 1:12) Bakalemba bambi bapokelele amashiwi ya kwa Lesa ukupitila muli bamalaika.—Sekaria 1:7, 9.

Abalembele Baibolo baume nalimo 40 kabili bailembele mu myaka 1,600. Bamo balembele amabuuku yabili no kucilapo. Na kuba, mu Baibolo mwaba amabuuku 66. Aya ciHebere ayetwa no kuti Icipingo ca Kale yabamo 39. Amalembo ya ciGriki aya Bwina Kristu, ayo abengi beta ati Icipingo Cipya yaba 27.