Bushe Inte sha kwa Yehova Balisumina mu Cipingo ca Kale?

Ee. Inte sha kwa Yehova basumina ukuti Baibolo yonse fye “yafuma kuli Lesa.” (2 Timote 3:16) Mu Baibolo mwaba Icipingo Cipya ne Cipingo ca Kale ukulingana ne fyo abengi bafiita. Inte sha kwa Yehova beta Icipingo ca kale ati Amalembo ya ciHebere e lyo Icipingo Cipya bacita ati Amalembo ya ciGriki. Ici cilenga cilaumfwika kwati Amalembo ya mu Baibolo yamo yalileka ukubomba.

Mulandu nshi Abena Kristu bafwile ukulakonkela ifyalembwa mu Cipingo Cipya na mu Cipingo ca Kale?

Umutumwa Paulo alembele ukuti: “Fyonse ifyalembelwe kale fyalembelwe ku kutufunda.” (Abena Roma 15:4) Kanshi na mu Malembo ya ciHebere mwaliba ifyebo ifyo twingasambililako. Mwalilembwa ifyacitike kale ifitufunda no kutwafwa.

• Ilyashi lya kale ilitwafwa. Mu Malembo ya ciHebere mwaba ilyashi ililondolola bwino sana ifyo ifintu fyabumbilwe, ne fyo umuntu abembwike. Aya Amalembo nga tayalembelwe, nga tatwaishiba amasuko ku mepusho pamo nga: Bushe Twafumine kwi? Cinshi abantu bafwila? (Ukutendeka 2:7, 17) E lyo Amalembo ya ciHebere yalanda pa fyo Yehova aleafwa abantu abaleba ne nsansa na mafya ayo na ifwe tukwatako.—Yakobo 5:17.

• Ukufunda ukusuma. Mwi buuku lya Amapinda ne lya kwa Lukala Milandu, ayaba mu Malembo ya ciHebere, mwaba ukufunda ukusuma ukutwafwa mu mikalile. Mwaba amashiwi ayasuma ayatufunda pa fya kuba ne nsansa mu lupwa (Amapinda 15:17), na pa fyo tufwile ukumona incito (Amapinda 10:4; Lukala Milandu 4:6), ne fyo abacaice bengacita pa kuti babe ne nsansa. (Lukala Milandu 11:9–12:1).

E lyo kabili kuti twasambilila ifingi mu fyalembwa mu Mafunde ya kwa Mose ayaba mu mabuuku ya kutendekelako 5 ayaba mu Baibolo. Nangu ca kutila Abena Kristu tabakonka Amafunde ya kwa Mose, muli aya mafunde kuti twasambililamo ifingalenga twaba ne nsansa.—Ubwina Lebi 19:18; Amalango 6:5-7.