Bushe Inte sha kwa Yehova Kalibumba ka Mapepo Akashaishibikwa Bwino?

Awe, Inte sha kwa Yehova te kalibumba ka mapepo akashaishibikwa bwino. Tuli Bena Kristu abapashanya sana Yesu Kristu kabili tulakonka ifyo alesambilisha.

Ifyo abantu balanda pa mipepele iishaishibikwa bwino

Abantu abengi balanda ifyapusanapusana pali iyi mipepele. Umfweni ifintu fibili ifyo abengi balandapo ne co ifyo balanda filangila ukuti imipepele yesu te fyo yaba.

• Bamo batila imipepele ishaishibikwa bwino mipepele iipya kabili iyaibela. Imipepele ya Nte sha kwa Yehova te ipya. Tupepa Lesa nga filya fine Abena Kristu ba kubalilapo balepepa. Na kuba, ifyo balecita ne fyo balesambilisha fyalilembwa mu Baibolo. (2 Timote 3:16, 17) Twasumina ukuti ifyo Amalembo ya Mushilo yalanda e fingalanga ukuti imipepele imo yali-ibela nelyo ipya.

• Bamo batila imipepele ishaishibikwa bwino ibi kabili itungululwa no muntu. Inte sha kwa Yehova tashitungululwa no muntu. Lelo tukonka ifyo Yesu asambilishe abasambi bakwe ilyo atile, “Intungulushi yenu imo, Kristu.”—Mateo. 23:10.

Kanshi Inte sha kwa Yehova te mipepele iipya nelyo iyaibela, lelo mipepele iyafwa ba Nte abene e lyo na bantu fye bambi. Ku ca kumwenako, umulimo tubomba uwa kushimikila ulalenga abakunkuma ku bwalwa na ku miti ikola ukuleka. E lyo tulasambilisha na bantu abengi mu calo conse ukubelenga no kulemba, kabili tulafwilisha sana abantu ilyo kwaba amasanso. Tulesha na maka ukucita ifisuma ifyo abantu bengasambililako nga filya fine Yesu aebele abasambi bakwe ukulacita.—Mateo 5:13-16.