Finshi Baibo Ilanda pa Kuipenta no Kufwala Ifya Kuiyemfeshako?

Icasuko ca mu Baibo

Nangu ca kuti Baibo tayalandapo ifingi pali ili lyashi, tayakaanya ukuipenta no kufwala ifya kuiyemfeshako. Na lyo line, mu cifulo ca kuti tulebika sana amano ku fyo tumoneka kunse, Baibo itukoselesha ukubika sana amano ku “buntu bwa mu kati na ku fya kufwala fya buko ifishingonaika, e kutila umutima uwaba tondolo kabili uwafuuka.”—1 Petro 3:3, 4.

Baibo tayakaanya ukuiyemfya

• Abanakashi abaali ne cishinka kuli Yehova abalembwa mu Baibo baleiyemfya. Rebeka uwaupilwe kuli Isaki umwana wa kwa Abrahamu alifwele isikiyo lya kufwala ku moona ilya golde, amakoosa ya golde, e lyo ne fya kuiyemfeshako fimbi ifya mutengo ifyo Abrahamu amupeele. (Ukutendeka 24:22, 30, 53) Estere na o balimusaliile “abakulamuyemfya” pa kuti bengamusala ukuba namfumu wa mu Persia. (Estere 2:7, 9, 12) Pa kumuyemfya, bafwile balebomfya “ifya kuiyemfeshako ifingi,” nelyo “ifya kuipentelako ifyalekanalekana.”—Baibo ya New International Version; Easy-to-Read Version.

• Baibo ilalinganya ifya kuiyemfeshako ku fintu ifisuma. Ku ca kumwenako, Baibo ilinganya amano ayasuma ayo umuntu apandako abantu bambi, kwi “sikiyo lya ku kutwi ilya golde.” (Amapinda 25:12) Na kabili, Lesa alingenye ifyo alesunga bwino abena Israele ku mulume uushitila umukashi wakwe ifya kuiyemfeshako pamo nga makoosa, ka ceni ka kufwala mu mukoshi, e lyo na masikiyo. Filya Yehova ayemfeshe abantu bakwe mu mampalanya fyalengele ‘bayemba icine cine.’—Esekiele 16:11-13.

Ifya bufi ifyo abantu balanda pa kuipenta no kufwala ifya kuiyemfeshako

Ifyo abantu balanda ifishili fya cine: Filya Namfumu Yesebele uwalecita ifyabipa “apentele inkopyo” filanga ukuti ukuipenta kwalibipa.—2 Ishamfumu 9:30.

Icishinka: Icalengele Yehova epaye Yesebele te filya aiyemfeshe, lelo ni filya alecita ifyabipa pamo ngo kucita ifinjelengwe no kwipaya abantu.—2 Ishamfumu 9:7, 22, 36, 37.