Twalilileni Abakosa mu Citetekelo!
Ifishinka Fikalamba Ukufuma Muli Petro wa Kubalilapo
INTE SHA KWA YEHOVA balolenkana ne fya kwesha ifyalekanalekana, nelyo amesho ya citetekelo cabo. Mu fyalo fimo, umulimo wabo uwa kushimikila Ubufumu ucitwa mu kulolenkana no kupakaswa kukalamba. Uwaba ku numa ya ifi no kubombesha kumbi ku kwesha ukonaula ukwampana kwabo na Lesa ni Satana Ciwa. Lelo takatunguluke, pantu Yehova alenga ababomfi bakwe ukuba abashangila—ee, abakosa mu citetekelo.
Umutumwa Petro alikwete ishuko lya ‘kukosha bamunyina’ abo “[balelengwo] bulanda . . . ku fya kwesha ifingi.” (Luka 22:32; 1 Petro 1:6, 7) Acitile ifyo muli kalata yakwe iya kubalilapo, iyalembelwe mupepi na 62-64 C.E. ku Babiloni. Muli yene Petro alifundile, alisansamwishe, kabili akoseleshe Abena Kristu abaYuda na Bena fyalo, ukubafwilisha ukukaanya ifya kusansa fya kwa Satana no kutwalilila “abakosa ndi mu citetekelo.” (1 Petro 1:1, 2; 5:8, 9) Nomba pa kuti inshita ya kwa Ciwa naipipa kabili ukusansa kwakwe kuli ukwabipisha nga nshi, mu kushininkisha abantu ba kwa Yehova kuti bamwenamo ukufuma mu mashiwi yapuutwamo aya kwa Petro.
Imyendele Iyashimpwa pa Fishinte fya Bukapepa
Nampo nga isubilo lyesu lya ku mulu nelyo lya pe sonde, cilingile ukutwaafwa ukushipikisha ifya kwesha no kubomba mu nshila ya bukapepa. (1:1 to 2:12) Isubilo lya bupyani bwa ku mulu lilenga abasubwa ukusekelela mu kulolenkana ne fya kwesha, ifyo mu cituntulu filopolola icitetekelo cabo. Pamo nge ŋanda ya ku mupashi iyakulwa pa mufula wa kwa Kristu, bapeela amalambo ya ku mupashi ayapokelelwa kuli Lesa kabili baisunga abene mu nshila isuma iyo Imuletela ubukata.
Ukubomba kwesu na bantunse banensu bonse kulingile ukutungululwa ne fishinte fya bukapepa. (2:13 to 3:12) Petro alangilile ukuti tulingile ukunakila bakateka ba buntunse. Ababomfi ba mu mayanda bali no kunakila bashikulu babo, na bakashi ukunakila abalume babo. Imyendele ya bukapepa iya mukashi wa Bwina Kristu kuti pambi yakolopeka umulume wakwe uushasumina ku citetekelo ca cine. Kabili umulume wasumina alingile ‘ukumupeelo mucinshi nga ku cipe icishakosesha.’ Abena Kristu bonse balingile ukulangulukilana, ukukwata ukutemwa kwa ba bamunyina, ukucita icisuma, no kukonkelela umutende.
Ukushipikisha Kuleta Amapaalo
Ukushipikisha kwa cishinka ukwa kucula ukwa Bena Kristu ba cine kukafumamo amapaalo. (3:13 to4:19) Nga ca kuti twacula pa mulandu wa bulungami, tulingile ukuba aba nsansa. Mu kulundapo, apantu Kristu aculile ku mubili pa kututungulula kuli Lesa, tatulingile ukwikala ukulingana no kufwaisha kwa ku mubili. Nga ca kuti twashipikisha amesho muli bucishinka, tukakana mu kusekelela kukalamba pa kusokololwa kwa kwa Yesu. Ukusenda umusebanya pa mulandu we shina lya kwa Kristu, nelyo nga abasambi bakwe, kulingile ukutulenga aba nsansa pantu cishininkisha ukuti twalikwata umupashi wa kwa Yehova. E co ilyo twacula mu kumfwana no kufwaya kwa kwa Lesa, shi natuitashe kuli wene no kutwalilila ukucita icisuma.
Pamo nga Abena Kristu, tulekabila ukubomba imilimo yesu muli bucishinka no kuipetamika fwe bene pe samba lya kuboko kwakosa ukwa kwa Lesa. (5:1-14) Baeluda bafwile ukucema umukuni wa kwa Lesa mu kuitemenwa, kabili bonse aba ifwe tulingile ukupoosa amasakamika yesu pali Yehova, ukwishibo kuti mu cituntulu alatusakamana. Tufwile na kabili ukubuulo kwiminina kwesu ukulwisha Ciwa kabili te kufupulwa, pa kuti bamunyina bapita mu kucula kumo kwine uko tupitamo. Lyonse ibukisheni ukuti Yehova Lesa akatwikasha kabili akatulenga ukutwalilila abakosa mu citetekelo.
[Akabokoshi ne Cikope pe bula 30]
Ukusaama kwa Bwanakashi: Mu kufunda abanakashi ba Bwina Kristu, Petro asosele ukuti: “Mwiba abasaamo kusaama kwa ku nse, ukwa kuluke mishishi, no kwa kufwale fya golde, nangu kwa kufwala amalaya ya mataki; lelo abasaamo muntu uwabelama uwa mu mutima, icisamo icishingabola ica mutima uwafuuka kabili uwatalala, uwabo wafinisha ku cinso ca kwa Lesa.” (1 Petro 3:3, 4) Mu kati ka mwanda wa myaka uwa kubalilapo C.E., abanakashi ba cisenshi lingi line balikwete ukuisaamika kwa mushishi ukwacishamo, ukuluka umushishi wabo uutali mu misango ya kulangisha ukulamuka no kubika ifya kufwala fya golde mu fikuti. Mu kupalako, abengi balicitile ifyo nga mataki—icintu cimo icishawaminwa Abena Kristu. (1 Timote 2:9, 10) Nalyo line, te kusaama konse ukwabipa, pantu Petro asanshako no “kufwala amalaya”—icakabilwa mu kulengama. Ifibekobeko na fyo fine fyalibomfiwe na babomfi ba kwa Lesa mu nshita sha pa kale. (Ukutendeka 24:53; Ukufuma 3:22; 2 Samwele 1:24; Yeremia 2:32; Luka 15:22) Nangu cibe fyo, umwanakashi wa Bwina Kristu mano mano asengauka ifisaamo ifyayemba mu kucilamo ne fya kufwala fya kucebusha kabili alingile ukusakamana ukuti ukubomfya ukuli konse ukwa fya kusubasuba kuli ukusuma. Icishinka ca kufunda kwa butumwa cili ca kuti alingile ukubika ukukomaila, te pa kusaama kwa ku nse, lelo ukwa mu kati. Pa kuba uwayemba mu cine cine, alingile ukufwala mu bufuuke no kukwata imibele ya kutiina Lesa.—Amapinda 31:30; Mika 6:8.
[Abatusuminishe Ukubomfya Icikope]
Israel Department of Antiquities and Museums; Israel Museum/David Harris