UBULONDOLOSHI BWA FIKOMO FYA MU BAIBOLO
Yohane 3:16—“Lesa Atemenwe Aba Pano Isonde”
“Lesa Atemenwe Aba Pano Isonde ica kuti apele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16, Amalembo ya Calo Cipya.
“Pantu Lesa alitemwisha aba pano isonde. Abapeela na Mwane uwaba fye umo mpo. Pa kuti onse uwamusumina, ekaloba, lelo akwate umweo wa pe.”—Yoani 3:16, Ishiwi lya kwa Lesa.
Umwalola Amashiwi Yaba Pali Yohane 3:16
Lesa alitutemwa kabili afwaya tukekale umuyayaya. E mulandu wine atumiine Umwana wakwe, Yesu Kristu ukwisa pano isonde. Ilyo Yesu ali pano isonde alibombele imilimo iingi iyacindama. Cimo ico acitile, alisambilishe abasambi bakwe pali Lesa kabili Wishi. (1 Petro 1:3) Cimbi, alifwilile abantunse. Kanshi pa kuti tukabe no mweo wa muyayaya, tufwile ukucetekela Yesu.
Ifyo Lesa aba no kutemwa fimonekela mu mashiwi ayatila, “apele Umwana wakwe uwafyalwa eka.”a Yesu ali mwana wa kwa Lesa uwaibela. Mulandu nshi twalandila ifyo? Pantu Yesu e o fye Lesa abumbile mu kulungatika. (Abena Kolose 1:17) Yesu “e beli pa fibumbwa fyonse.” (Abena Kolose 1:15) Fyonse ifyo Lesa abumbile ukubikako na ba malaika bambi, fyaishilebako ukupitila muli Yesu. Na lyo line, Yehovab Lesa ali-itemenwe ukutuma Umwana wakwe uo atemwa ukwisa pe sonde “mu kubombela abantu no kupeela umweo wakwe icilubula pa kuti alubule abengi.” (Mateo 20:28) Yesu aliculile no kufwa pa kuti atulubule ku lubembu ne mfwa, ifyo twapyene ku mwaume wa kubalilapo Adamu.—Abena Roma 5:8, 12.
Ukucetekela Yesu te kusumina fye no kwishiba ifyo atucitiile. Pa kulanga ukuti twalicetekela Umwana wa kwa Lesa, tufwile ukulamumfwila no kukonka mu ntampulo shakwe. (Mateo 7:24-27; 1 Petro 2:21) Baibolo itila: “Uutetekela Umwana aba no mweo wa muyayaya; uushumfwila Mwana takabe no mweo.”—Yohane 3:36.
Amashiwi na Yambi Ayaba Pali Yohane 3:16
Yesu alandile aya mashiwi ilyo alelanda na Nikodemo uwali intungulushi ya mapepo iya baYuda. (Yohane 3:1, 2) Mu kulanshanya bakwete, Yesu alilandile fimo pa Bufumu bwa kwa Lesac na pa “kufyalwa libili.” (Yohane 3:3) Alandile ne fyo ali no kufwa. Atile: “Umwana wa muntu bakamwimya [ukumukobeka pa cimuti], pa kuti onse uumutetekela akabe no mweo uwa muyayaya.” (Yohane 3:14, 15) Lyena akomaile pa cishinka ca kuti icalengele Lesa apeele Umwana wakwe ni co alitemenwe sana abantu kabili alefwaya bakekale umuyayaya. Mu kulekelesha Yesu alondolwele ukuti pa kuti tukabe no mweo, tufwile ukuba ne citetekelo no kulabomba imilimo iingalenga Yehova alasekelela.—Yohane 3:17-21.
a Ishiwi lya ciGriki monogenes ilyo bapilibula ukuti “uwafyalwa eka,” lipilibula ukuti “umo mpo, . . e kafye nelyo uwapusanako, uwaibeela (pali fyonse).”—Icitabo ca A Greek-English Lexicon of the New Testament and Other Early Christian Literature, ibu. 658.
b Ishina lya kwa Lesa ni Yehova.—Amalumbo 83:18.
c Ubufumu bwa kwa Lesa, ubwitwa no kuti “Ubufumu bwa mu muulu” buteko bwa ku muulu. (Mateo 10:7; Ukusokolola 11:15) Lesa asontele Kristu ukuba imfumu ya ubu Bufumu. Ubufumu bwa kwa Lesa bukalenga ukufwaya kwakwe kukacitwe pano isonde. (Daniele 2:44; Mateo 6:10) Pa kuti mwishibilepo na fimbi, moneni icipande citila “Bushe Ubufumu bwa kwa Lesa Cinshi?”