UBULONDOLOSHI BWA FIKOMO FYA MU BAIBOLO
Esaya 42:8—“Imfumu E Shina Lyandi”
“Nine Yehova. Ilyo e shina lyandi; nshakapeele ubukata bwandi kuli umbi, nangu amalumbo yandi ku fimpashanya ifyabaswa.”—Esaya 42:8, Amalembo ya Calo Cipya.
“Imfumu e shina lyandi; nshakapeele umbi umucinshi wandi, nangu ubucindami bwandi ku tulubi.—Isaya 42:8, Baibolo ya Diocese of mbala.
Umwalola Amashiwi Yaba Pali Esaya 42:8
Lesa alitweba ishina lyakwe kabili atila tapeela amalumbo nelyo umucinshi ku tulubi.
Lesa ali-ipeele ishina lyakwe, ilyo bapilibula ukuti “Yehova” mu cibemba.a (Ukufuma 3:14, 15) Nangu ca kuti ishina lya kwa Lesa lyaba mu Cipingo ca Kale (Amalembo ya ciHebere ne ciAramaiki) imiku mupepi na 7,000, mu maBaibolo ayengi apalingile ukuba inshina Yehova babikapo SHIKULU nelyo IMFUMU (mu filembo ifikulu). Ku ca kumwenako pa Amalumbo 110:1, paba ubusesemo ubulanda pali Yehova na Yesu. Muli Baibele wa Mushilo pa Imilimo 2:34-36 patila: “Shikulu [Yehova] aebele Shikulu wandi [Yesu].” Baibolo ya Amalembo ya Calo Cipya yalifumyapo shikulu umo pa kuti cishibikwe uo balelandapo no kubikapo ishina ililingile ukubapo. Patila: “Yehova aebele Shikulu, ati: ‘Ikala ku kwa kulyo kwandi, mpaka nkalenge abalwani bobe ukuba nga kapuna ka kunyantapo amakasa yobe.’”
Abasambilila ifya mu Baibolo abengi baishiba ukuti ishina lya kwa Lesa lipilibula ukuti “E Ulenga Ifintu Ukubako.” Ni Lesa fye wa cine e wingacita ifintu ukulingana ne shina lyakwe, pantu e wingacita fye fyonse ifyo alefwaya nelyo ukulenga ifyo abumba ukucita ifyo alefwaya pa kuti afikilishe ubufwayo bwakwe.
Apo Yehova e Kabumba wesu kabili e Lesa wa cine, alinga fye ukumupepa eka. Takwaba na umbi nelyo icintu cimbi ico tulingile ukulapepa, ukubikako fye no tulubi ne fimpanshanya.—Ukufuma 20:2-6; 34:14; 1 Yohane 5:21.
Amashiwi Yambi Ayaba pa Fikomo Fimbi Muli Esaya 42:8
Mu cikomo ca kubalilapo muli Esaya icipandwa 42, Yehova asobele umulimo ‘abasalwa bakwe’ bali no kulabomba. Lesa alandile pali uyu umubomfi uo atemwa ukuti, “akaleta umulinganya ku nko.” (Esaya 42:1) Lesa alandile pali ubu bulayo ukuti: “Ifya kubalilapo fyaliisa, lelo ifipya e fyo ndelondolola. Ilyo fishilatendeka ukumoneka, namulenga ukufyumfwa.” (Esaya 42:9) Ubu busesemo pa ‘wasalwa’ bwafikilishiwe pa numa ya myaka iingi ilyo Mesia nelyo Kristu aishile no kubomba umulimo wakwe pano isonde.—Mateo 3:16, 17; 12:15-21.
Ifyo AmaBaibolo Yambi Yapilibula Esaya 42:8
“Ine ndi Yehoba, e shina lyandi, no bukata bwandi nshibupela kuli umbi, nangu ukutashiwa kwandi ku fimpanshanya.”—Baibele wa Mushilo.
a Ishina lya kwa Lesa mu ciHebere balilemba mu filembo 4, mu ciNgeleshi bafilemba ukuti YHWH. AmaBaibolo yamo aya mu ciNgeleshi ishina lya kwa Lesa balipilibula ukuti “Yahweh.” Nga mulefwaya ukwishibilapo na fimbi, moneni Akatabo ka Kutwafwa Ukusambilila Icebo ca kwa Lesa icipande 1 pa mutwe uutila “Ishina lya kwa Lesa mu Malembo ya CiHebere.”