Pali Cimo, September 15
Bamunyinane, mulepashanya bakasesema abalandiile mwi shina lya kwa Yehova. Baliculile pa mulandu wa kuti balebacusha, lelo bali abatekanya.—Yako. 5:10.
Mu Baibo mwalilembwa abantu abengi abali abatekanya. Kuti cawama ukusambilila pali abo bantu. Ku ca kumwenako, nangu ca kuti Davidi balimusubile ukuba imfumu ninshi ali umwaice sana, palipitile imyaka iingi pa kuti abe imfumu. Simeone na Ana, balepepa Yehova ne cishinka ilyo balelolela ukumona Mesia. (Luka 2:25, 36-38) Ilyo mulebelenga pali aya malyashi, mulesanga amasuko kuli ifi fipusho: Cinshi calengele uyu muntu ndebelengapo ukuba uwatekanya? Bushe anonkelemo shani ifi ali uwatekanya? Kuti namupashanya shani? Na kabili kuti mwasambilila ifingi nga mulebelenga pa bantu abashali abatekanya. (1 Sam. 13:8-14) Ilyo mulebelenga pali aba bantu kuti mwatontonkanya pali ifi fipusho: ‘Cinshi calengele aba bantu ukukanatekanya? Finshi fyabacitikile pa mulandu wa kuti tabali abatekanya?’ w23.08 ibu. 25 para. 15
Pali Cibili, September 16
Twalitetekela kabili twalishiba ukuti nimwe Uwa Mushilo uo Lesa atuma.—Yoh. 6:69.
Umutumwa Petro ali uwa cishinka, talekele icili conse calenga aleka ukukonka Yesu. Ku ca kumwenako, alilangile ukuti wa cishinka ilyo Yesu alandile fimo ifyo abasambi bakwe bashaumfwikishe. (Yohane 6:68) Abengi balilekele ukukonka Yesu ukwabula ukuti bamwipushe umo aloseshe. Lelo Petro ena talekele ukukonka Yesu. Alishibe ukuti Yesu fye e wali na “mashiwi ya mweo wa muyayaya.” Yesu alishibe ukuti Petro na batumwa bambi bali no kumubutuka. Na lyo line, Yesu alyebele Petro ukuti alishibe ukuti ali no kulapila kabili ali no kutwalilila uwa cishinka. (Luka 22:31, 32) Alishibe no kuti “umutima . . . ulefwaisha, lelo umubili naunaka.” (Marko 14:38) Kanshi na lintu Petro amukeene, Yesu tamulabileko. Ilyo Yesu abuushiwe, alimoneke kuli Petro, kabili afwile ali eka ilyo amoneke kuli ena. (Marko 16:7; Luka 24:34; 1 Kor. 15:5) Elenganyeni ifyo ifi Yesu acitile fyakoseleshe sana Petro uwaleumfwa ububi pa fyo alufyenye! w23.09 ibu. 22 amapara. 9-10
Pali Citatu, September 17
Ba nsansa abo baeleela pali bumpulamafunde bwabo kabili abo imembu shabo shafimbwapo.—Rom. 4:7.
Lesa eleela abantu abamucetekela. Alabeleela umupwilapo kabili tebukisha ne membu shabo. (Amalu. 32:1, 2) Abamona ukuti balungami pa mulandu wa kuti balikwata icitetekelo. Nangu ca kuti Lesa alemona Abrahamu, Davidi, e lyo na babomfi bakwe bambi ukuti balungami, bali babembu. Nomba pa mulandu ne citetekelo bakwete, Lesa alebamona ukuti balungami, maka maka nga abalinganya ku bantu abashimupepa. (Efes. 2:12) Muli kalata umutumwa Paulo alembeele abena Roma, alilondolwele ukuti tulingile ukuba ne citetekelo pa kuti tube ifibusa fya kwa Lesa. Abrahamu na Davidi bali fibusa fya kwa Lesa pa mulandu wa kuti bali ne citetekelo. Na ifwe kuti twaba ifibusa fya kwa Lesa nga ca kuti tuli ne citetekelo. w23.12 ibu. 3 amapara. 6-7