Yerusalemu Yaonaulwa

Ilingi line abaYuda baleleka ukupepa Yehova no kutendeka ukupepa balesa ba bufi. Pa myaka iingi, Yehova alebafwa. Alitumine bakasesema abengi mu kusoka abantu, lelo tabalefwaya ukumfwa. Balecusha no kuseka bakasesema. Bushe Yehova acitile shani pa kuti baleke ukupepa ifilubi?

Nebukadnesari imfumu ya ku Babiloni alecimfya ifyalo cimo na cimo. Umuku wa kubalilapo uo acimfishe Yerusalemu, alikete Imfumu Yehoyakini, bacilolo, abashilika na baishibe sana ukupanga ifintu, kabili alibasendele ku Babiloni. Na kabili alisendele ifyuma fyonse ifyali mwi tempele lya kwa Yehova. Lyena Nebukadnesari abikile Sidekia pa bufumu mu Yuda.

Pa kubala, Sidekia aleumfwila Nebukadnesari. Lelo ifyalo ifyali mupepi e lyo na bakasesema wa bufi baebele Sidekia ukuti apondokele Imfumu ya Babiloni. Yeremia amusokele ati: ‘Nga waipondokela, mu Yuda mukaba insala, amalwele, kabili abantu bakabepaya.’

Sidekia alipondokele abena Babiloni pa numa ya kuteka imyaka 8. Aumfwene na bashilika abena Egupti ukuti bakamwafwe. E ico Nebukadnesari atumine abashilika bakwe mu kusansa Yerusalemu, kabili balishingile umusumba. Yeremia aebele Sidekia ati: ‘Yehova alanda ati nga wacimba ku bena Babiloni, tabakamusanse, kabili tabakonaule no musumba. Lelo nga tawacimbe, abena Babiloni bakoca Yerusalemu kabili bakakusenda ku Babiloni uko ukayaba umufungwa.’ Lelo Sidekia alandile ati: ‘Nshacimbe!’

Pa numa ya mwaka umo ne myeshi 6, abena Babiloni balitobele ifibumba fya Yerusalemu kabili balyocele umusumba. Balyocele itempele no kwipaya abantu abengi, kabili balisendele abantu abengi sana ku Babiloni uko baileba abafungwa.

Sidekia alibutwike ukufuma mu Yerusalemu, lelo abena Babiloni balimupepeke. Bamwikatile mupepi no musumba wa Yeriko, kabili bamutwele kuli Nebukadnesari. Imfumu ya bena Babiloni yaipeye abana abaume aba kwa Sidekia ninshi alemonanako. Lyena Nebukadnesari atonkwele Sidekia amenso no kumubika mu cifungo umo afwilile. Lelo Yehova alaile abaYuda ati: ‘Pa numa ya myaka 70, nkamubwesesha ku mwenu ku Yerusalemu.’

Finshi fyali no kucitikila abaice abo basendele ku Babiloni? Bushe bali no kutwalilila ukumfwila Yehova?