Ukwishiba Umwalola Ifishibilo Kwalicindama Sana!
“Pa kubala, nalemona kwati umwana wesu umwaume Andreas, alwele fye umutwe. Lelo alilekele ukulya kabili umubili walikabile sana. Umutwe walicililemo ukukalipa, kabili ici calinsakamike. Ilyo abena mwandi babwelele, twatwele Andreas kuli dokota. Alimupimine kabili apo pene fye atwebele ukutwala Andreas ku cipatala. Ubulwele alwele tabwali mutwe fye, lelo bwali bukalamba. Alwele meningitis, (ubulwele ubwikata ku mongololo na bongobongo). Balimupeele umuti kabili alipolele no kupola.”—E fyashimika baGertrud, aba ku Germany.
IFYACITIKILE baGertrud fifwile fyalicitikilapo abafyashi na bambi abengi. Abafyashi balamona ifishibilo fimo ifilanga ukuti umwana nalwala. Nangu ca kuti te bulwele bonse ubucilamo nga nshi, kuti cabipa sana nga ca kuti abafyashi basuulako fye ku fishibilo filelanga ukuti umwana nalwala. Ukubika amano ku fishibilo no kucitapo cimo kuti kwapususha ubumi, kabili kwalicindama sana.
Ukubika amano ku fishibilo fya kulwala kwalicindama, lelo kwaliba ifishibilo na fimbi ifyo tulingile ukubikako sana mano. Inkuuka ilengwa ne cinkukuma ca pali bemba iyacitike ku ncende yabela kuli Bemba wa Indian Ocean mu December 2004, ilanga ifyo ici cacindama. Aba mu tubungwe twa buteko bwa ku Australia na Hawaii balimwenepo fimo ifyalelanga ukuti icinkukuma cikalamba cali no kucitika ku ncende shabela ku kapinda ka ku kuso aka Sumatra kabili balimwene na mafya yali no kukonkapo. Lelo, takwali inshila ya kusokelamo abantu baleikala kuli ishi ncende. Ne cacitike ca kuti abantu ukucila pali 220,000 balifwile.
Ifishibilo Ifyacindama Sana
Ilyo Yesu Kristu aali pano isonde, asambilishe abantu ukubika amano ku fishibilo no kucitapo fimo. Alandile pa cishibilo icacindama sana. Baibolo itila: “AbaFarise na baSaduke baishile kuli wene, na pa kumwesha, bamulombele ukuti abalange icishibilo icafuma ku muulu. Na o pa kwasuka atile kuli bene: ‘Lintu cabe cungulo mutila, “Kukacelebuka, pantu umuulu naukashika ce”; kabili ulucelo mutila, “Leelo kuleba impepo ne mfula pantu umuulu naukashika ce, kabili naubundama.” Mwaishibo kwiluka imimonekele ya muulu, lelo tamwiluka ifishibilo fya nshita.’”—Mateo 16:1-3.
Ilyo Yesu alandile pa “fishibilo fya nshita,” aleeba abaYuda abaliko ilyo ubuKristu bwatendeke ukuti balekabila ukwishiba ukuti kwali cimo icacindama icali no kucitika ilya nshita. Ubwikashi bwa ciYuda bwali mupepi no konaulwa. Ilyo kwashele inshiku shinono ukuti Yesu epaiwe, aebele abasambi bakwe icishibilo na cimbi—icishibilo ca kubapo kwakwe. Ifyo alandile fyalicindama sana kuli ifwe bonse muno nshiku.