Twalilileni “Ukucite Cawama”
1 Mwalicitile bwino ilyo mwasangwike umubomfi wa kwa Yehova Lesa. Nomba, icakosa muli shino nshita shayafya caba kutwalilila “ukucite cawama.” (Gal. 6:9) Nangula ca kuti ici cifwaya ukubombesha, teti mufilwe. Kuti mwacita shani?
2 Mube no Kwangwa Ukwali na Muli Yesu: Na imwe kuti mwashipikisha ku fya kwesha nga fintu Yesu ashipikishe, nga muleangwa kwi subilo lya Bufumu. (Heb. 12:2, 3) Ishibeni ukuti Yehova alimutemwa kabili afwaya mulebomba bwino. (2 Pet. 3:9) Mucetekeleni na maka yonse, no kucetekela ukuti akamwafwa. (1 Kor. 10:13) Mube aba mukoosha mu kupepa, ukulomba Yehova ukuti amwafwe ukushipikisha. (Rom. 12:12) Sekeleleni mu kushininwa mwashininwa ukuti ukushipikisha kwenu kukalenga Lesa akamusenamine. (Rom. 5:3-5) Ukutwalilila ukufwaya ukuba no “kwangwa ukwali na muli Kristu Yesu” kukamulenga ukumfwa bwino no kulenga umutima wa kwa Yehova ukusamwa.—Rom. 15:5; Amapi. 27:11.
3 Twalilileni Ukucite Fyalungama: Bomfyeni fyonse ifyo Yehova ateyanishisha abantu bakwe ku kubafwa ukucite fyalungama. Pangeni ukutantika kusuma ukwa kubelenga Icebo ca kwa Lesa lyonse no kusambilila impapulo shilanda pa fya mu Baibolo isha musha wa cishinka kabili uwashilimuka. Lyonse mulepekanishisha ukulongana kwa pa cilonganino, ukusangwako, no kwasukapo. Pa ntanshi ya kulongana kwa Bwina Kristu na pa numa, bishanyeni sana na bamunyinenwe ba ku mupashi na bankashi. Kwateni amabuyo yalinga aya mu butumikishi pa kuti mulebombako bwino umulimo wa mwi bala no kuwamyako mu mishimikilile yenu iya mbila nsuma.
4 Ifi e fyo mwingatwalilila ukucite cawama no kusangamo ubuseko icine cine. Ukukuma kuli ci, munyina umo uwa ku Italy atile: “Lintu kwaba icungulo bushiku, kabili nabwelela ku ng’anda pa numa ya kubomba mu mulimo wa kwa Yehova akasuba, ndanaka kwena. Lelo ndabo wa nsansa, kabili ndatootela Yehova pa kumpeela ubuseko ubo umuntu nangu umo ashingampokolola.” Ne mwe bene kanshi, twalilileni ukucite cawama, kabili muli no kuba no kusekelela kukalamba.