ISAMBILILO 25
Bushe Lesa Alefwaya Ukuti Tuleikala Shani?
Baibo ilanda ukuti abantu ‘bekala fye inshita iipi kabili balaba na macushi ayengi.’ (Yobo 14:1) Bushe ifi e fyo Lesa alefwaya ukuti tuleikala? Nga te fyo alefwaya, ninshi alefwaya ukuti tuleikala shani? Bushe tukabala atwikalapo nge fyo Lesa alefwaya ukuti tuleikala? Moneni ifyo Baibo yasuka aya mepusho.
1. Bushe Yehova afwaya tuleikala shani?
Yehova afwaya ukuti tuleikala bwino sana. Twaishiba shani ukuti ifi e fyo afwaya tuleikala? Ilyo abumbile abantu ba kubalilapo, Adamu na Efa, ababikile mu paradaise iyayemba, e kutila ibala lya Edeni. Kabili “Lesa alibapaalile no kubeba ati: ‘Fyaleni, fuleni, kumaneni pe sonde no kulalisakamana.’” (Ukutendeka 1:28) Yehova alefwaya ukuti balekwata abana, bakalenge isonde lyonse ukuba paradaise, e lyo no kulasakamana inama. Alefwaya ukuti abantu bonse bakabe no bumi ubwapwililika no kulaikala umuyayaya.
Nangu ca kuti ifi twikala te fyo Lesa alefwaya tuleikala,a ifyo alefwaya tafya-aluka. (Esaya 46:10, 11) Acili alafwaya ukuti abantunse abamumfwila bakaleikala bwino umuyayaya.—Belengeni Ukusokolola 21:3, 4.
2. Kuti twacita shani pa kuti tuleba ne nsansa pali ino nshita?
Yehova atupangile ukuti ‘tulekabila ifya kwa Lesa,’ e kutila ukulafwaya ukumwishiba no kulamupepa. (Belengeni Mateo 5:3-6.) Yehova afwaya twaba sana ifibusa fyakwe, ‘tule-enda mu nshila shakwe shonse, tulemutemwa kabili tulemubombela no mutima wesu onse.’ (Amalango 10:12; Amalumbo 25:14) Nga tulecita ifi tukaba ne nsansa, nangu ca kuti natukwata amafya. Nga tulepepa Yehova tulaba ne nsansa, pantu ninshi tuleikala ukulingana ne fyo afwaya tuleikala.
SAMBILILENI NA FIMBI
Sambilileni ifyo Lesa alangile ukuti alitutemwa nga nshi ilyo alebumba isonde, e lyo ne fyo Icebo cakwe citusambilisha pa co abumbiile abantu.
3. Yehova afwaya abantunse baleikala bwino
Tambeni VIDIO, lyena lanshanyeni icipusho cakonkapo.
Cinshi Lesa apangiile isonde ilisuma?
Belengeni Lukala Milandu 3:11, lyena lanshanyeni ici cipusho:
Ukulingana ne li ilembo, cinshi mwasambilila pa co Lesa abumbiile abantu?
4. Ifyo Lesa alefwaya tafya-aluka
Belengeni Amalumbo 37:11, 29 na Esaya 55:11, lyena lanshanyeni ici cipusho:
Twaishiba shani ukuti ifyo Yehova alefwaya tuleikala tafya-aluka?
Nga filya fine abantu bengawamya ing’anda iyo balekelesha, Lesa na o akawamya isonde ilyo abantunse balekelesha pa kuti abamutemwa bakaleikalamo
5. Ukupepa Yehova kulalenga tuleba ne nsansa
Ukwishiba ico Lesa abumbiile abantu kuti kwalenga twaba ne nsansa. Tambeni VIDIO, lyena lanshanyeni icipusho cakonkapo.
Bushe ba Terumi banonkelemo shani ilyo basambilile ico twabela pano calo?
Belengeni Lukala Milandu 12:13, lyena lanshanyeni ici cipusho:
Apo Yehova alitucitila ifintu ifingi nga nshi, cinshi na ifwe tulingile ukucita pa kulanga ukuti tulatasha?
BAMO KUTI BAIPUSHA ABATI: “Cinshi Lesa abumbiile abantu?”
Kuti mwabasuka shani?
IFYO MUSAMBILILE
Yehova afwaya tukatwalilile ukuba ne nsansa umuyayaya mwi sonde ilisuma nga nshi. Nga tulemupepa ne mitima yesu yonse, tulaba ne nsansa na pali ino ine nshita.
Ukupitulukamo
Bushe ilyo Yehova abumbile Adamu na Efa alefwaya ukuti baleikala shani?
Twaishiba shani ukuti ifyo Lesa alefwaya abantu baleikala tafya-aluka?
Finshi mufwile ukucita pa kuti mube ne nsansa?
ISHIBILENIPO NA FIMBI
Belengeni pa kuti mumone icalenga tushininkishe ukuti ibala lya Edeni e ko lyali.
“Bushe Ibala lya Edeni e ko Lyali?” (Ulupungu lwa kwa Kalinda, January 1, 2011)
Moneni icingalenga twashininkisha ukuti isonde likatwalilila ukubako.
Moneni ifyo Baibo ilanda ukuti e fingalenga mwaba ne nsansa.
Moneni ifyo umwaume uwaletontonkanya ukuti alikwete fyonse aishileiluka ukuti kwali ifyacindama ifyo ashakwete.
a Mwi sambililo likonkelepo, mukasambilila icalenga twilaikala ukulingana ne fyo Lesa alefwaya.