Mose Ne Nsengo—Icabaswa Ca Kulamuka

NGA ca kuti walibala autandala ku Italy, pambi walimona icipasho caishibikwa ica kwa Michelangelo ica kwa Mose waikala, nomba icabikwa pe Calici lya St. Peter mu Chains, mu Rome. We kufwaisha kwa kwishiba uko kubasa kwa mu mwanda wa myaka walenga 16 kumoneka, nga fintu kulondolola Mose mu kuba ne nsengo ukutumpuka ukufuma pa mutwe wakwe! Na kuba, impendwa ya bakalenga balilondolola Mose mu kuba ne nsengo. Mulandu nshi ifyo? Bushe Baibolo ilapayanya icitendekelo icili conse ica iyo mfundo?

Ubupilibulo bwa ciLatin ubwa Vulgate ubwa Baibolo butwebo kuti ukukonka pa kulanshanya kwakwe na Lesa pa Lupili lwa Sinai, icinso ca kwa Mose “cabele ne nsengo.” (Ukufuma 34:29, 30, 35; Linganyeniko Douay Version.) Vulgate yaipakishe ukwishibikwa kukalamba mu bwingi bwa Kristendomu kabili muli fyo bwasongele inshila intu amalembo yaumfwikilwemo.

Nangu cibe fyo, ishiwi lya ciHebere ilipilibulwa “ukuba ne nsengo” na kabili lyakwata ubupilibulo ‘ukupoose myengelele’ nelyo ‘ukubengeshima.’ (Moneni futunoti uwa Douay Version pa Ukufuma 34:29.) Ukulingana kuli Theological Wordbook of the Old Testament, ishiwi “lipilibula umusango wa lusengo (insengo) te capalako.” Kabili ukumonwa mu cikope, imyengelele ya lubuuto mu cishinka yapala insengo.

Icishinka ca kuti icinso ca kwa Mose catumine imyengelele kuti calondololwa, nga fintu ubukata bwa kwa Yehova e lintu fye bwapitile. (Ukufuma 33:22; 34:6, 7) Paulo asuminishe ci ukuba ukumfwikisha kwalungikwa, ukulemba pa lwa “bukata” ubwa cinso ca kwa Mose, te bwa “nsengo” shakwe.—2 Abena Korinti 3:7.

Ukumfwikisha kwalungikwa ukwa mashiwi ya Baibolo muli fyo kutungulula ku kwishiba kwashika ukwa lipoti wa Baibolo. Mu kulinganako, insengo pa cipasho caishibikwa ica kwa Michelangelo ica kwa Mose caba fye kubasa kwa kulamuka ukufuma ku cilubo ca kale icalungikwa ica bupilibulo.

[Abatusuminishe Ukubomfya Icikope pe bula 7]

Ukushimpwa pali Short History of Art