Balangeni Ukuti Mulasakamana

Ku ulemba Loleni! mu Canada

Abakoloci abengi mu Canada balekungumana icilelenga abengi nga nshi ukuipaya. Lipoti ya nyunshipepala ya Vancouver Sun yalandile ukuti mu bacaice 200 abesha ukuipaya ni umo fye e ufwa, lelo ku ba myaka yacila 65, umo pa besha ukuipaya 4, alafwa. Na kuba bamo batontonkanya ukuti impendwa ya bakoloci ifwile “yacilapo, pantu calyafya mu bakoloci balwalilila ukwishiba icibepeye.”

Mulandu nshi abakoloci abengi bashifwaila ukutwalilila abomi? Uwaishibisha ifya muntontonkanya kabili incenshi pa lwa bakoloci baipaya pa yuniversiti ya British Columbia, Oluwafemi Agbayewa atile icilenga caba kupopomenwa, ukutalalilwa, ne citendwe. Intungulushi ya Suicide Information and Education Centre (Icipani cilolekesha pa mulandu wa kuipaya) ku Calgary, Alberta, Gerry Harrington atile lintu abantu bakota, “balaleka ukucindikwa, tabakwata amaka, kabili balafilwa ukutungulula ifintu. . . . Mu kupumikisha, takuba uubepusha ukulandapo pa milandu. Abengi baisanga bekele mu mayanda ya kulelelamo abakoloci tabakwete ca kucita kano kuteya injuka no kutamba TV.” Icilenga ubwafya ukubipilako ca kuti abantu bakatamika ubwaice no buntungwa, ukubombesha, no kwangufyanya—ifintu fine ifipwa lintu umo alekota.

Nangu cibe fyo, Yehova Lesa alikatamika nga nshi abakoloci. Ubushinino bwa kuti alabasakamana mu nkuntu kuti bwasangwa mwi kambisho kuli Israele wa pa kale ilya kuti: “Ku cinso ca wa mfwi uleima, ulecindika ne cinso ca mukote, no kuba na katiina kuli Lesa obe.”—Ubwina Lebi 19:32.

Ni shani lyene ‘twingacindika’ abakoloci? Nangu cingatila te kuti lyonse balande ifya mano kabili ukukanapwililika kulamonekesha pa mulandu no bukote, tulingile ukubacindika. Langeni ukuti mulabasakamana. Bacindikeni no kubomfya ukushilimuka kwabo na mano, ukucilisha nga balitungululwa no mupashi wa kwa Lesa kabili balitesekesha mu kulungika Icebo cakwe.

Icebo ca kwa Lesa cilafunda ifingi pa lwa kusunga no kucindika abakoloci. Nga mulefwaya ifyebo na fimbi, lembeleni bakasabankanya ba luno lupapulo no kubepusha pa lwa citabo ca Icaba Inkaama ku Nsansa sha Lupwa.