“Ukwima Ubulendo no Bwato mu Nkuuka”

BUSHE ubo bulendo te kuti mubumone ubwa mafya, ubwa buwelewele nelyo ubwa kuitwala mu kapoosa mweo? Nomba bamo baipoosa mu mibele yapalako mu mampalanya. Shani? Kalemba wa fitabo fya ciNgeleshi uwa muli ba 1600, Thomas Fuller atile: “Mwicitila ifintu mu bukali. Cimo cine no kwima ubulendo no bwato mu nkuuka.”

Ukucite fintu ninshi namufulwe cibi kuti kwafumamo amafya yashaibipila. Ilyashi limo ilya mu Baibolo kuti lyatulangilila bwino pa lwa ici. Simeone na Lebi, abana baume ba cikolwe Yakobo, bayankwileko mu bukali nga nshi no kulandula, ilyo nkashi yabo Dina acendelwe. E calengele bene ukwipayaulula abantu abengi no kutapa ifyuma. E mulandu wine Yakobo abashimawilile pali ubu bubi ukuti: “Namufundaula kuli ine, no kunengo kupimpinuka mu bekashi ba calo cino.”—Ukutendeka 34:25-30.

Mano mano, Icebo ca kwa Lesa, Baibolo cena citasha ukutekanya. Citila: “Nashako ubukali, no kuleke cipyu; wilalunguluka, calola fye ku kubifya.” (Ilumbo 37:8) Ukukonka uku kupanda amano kuti kwatucingilila ku membu ishishaikulila.—Lukala Milandu 10:4; belengeni na Amapinda 22:24, 25.