AMEPUSHO UKUFUMA KU BABELENGA
Bushe ifyo Davidi alandile pa Amalumbo 37:25 ne fyo Yesu alandile pali Mateo 6:33, fyalola mu kuti Yehova te kuti alekeleshe Umwina Kristu ica kuti abulisha ne fya kulya?
Davidi alembele ati “nshatalamona uwalungama nalekeleshiwa, nelyo abana bwakwe balelombelesha ifya kulya.” Kanshi ifyo alandilepo fintu ifyo aimwenene na menso. Alishibe ukuti Yehova lyonse alasakamana abantu bakwe. (Amalu. 37:25) Lelo Davidi taloseshe mu kuti ababomfi tabakabale ababulisha ifyo bakabila.
Limo limo Davidi alekwata amafya ayakalamba. Limo ilyo akwete ubwafya ubukalamba ni lilya afulumwike Shauli. Davidi takwete ifya kulya ifingi kabili alombele ifya kulya ifya kuti engalya na bo ali nabo. (1 Sam. 21:1-6) Kanshi kuti twatila pali ilya nshita Davidi takwete ifya kulya. Nangu ca kuti takwete ifya kulya, Davidi alishibe ukuti Yehova tamulekeleshe. Icishinka ca kutila tapaba nangu pamo apo tubelenga ukuti Davidi alelombelesha ifya kulya pa kuti efwa ku nsala.
Pali Mateo 6:33, paba amashiwi ya kukoselesha ayo Yesu alandile aya kuti Lesa akalapeela ababomfi bakwe aba cishinka fyonse ifyo bakabila nga babika Ubufumu intanshi. Yesu atile, “Intanshi mulefwaya ubufumu no bulungami bwakwe, na fyonse ifi ifyo mukabila [ifya kulya, ifya kunwa, ne fya kufwala] akamupeela.” Lelo na kabili Yesu alilandile ukuti pa mulandu wa kuti “bamunyina” bakwe bakalabacusha, nalimo tabali no kulakwata ifya kulya. (Mat. 25:35, 37, 40) Ifi fine e fyacitikile no mutumwa Paulo. Inshita shimo na o wine aleumfwa insala ne cilaka.—2 Kor. 11:27.
Yehova alitweba ukuti abantu bakatucusha mu nshila ishalekanalekana. Nalimo kuti atuleka twabulisha fimo pa kuti na ifwe tushinine Satana Kaseebanya ukuti wa bufi. (Yobo 2:3-5) Ku ca kumwenako, bamunyinefwe bamo pamo nga balya abo bakakiile mu nkambi sha kucushishamo abantu isha ba Nazi, balekwata amafya pa mulandu wa kubacusha. Inshila imo iyo balebacushishamo sana kubatana ifya kulya pa kuti betwalilila ukuba aba cishinka. Ba Nte aba cishinka balitwalilile ukumfwila Yehova; kabili na o tabalekeleshe. Alilekele baeshiwa muli uyu musango nga filya fine aleka Abena Kristu bonse ukukwata amafya ayalekanalekana. Na lyo line, tatutwishika ukuti Yehova alafwa bonse abacula pa mulandu we shina lyakwe. (1 Kor. 10:13) Kanshi natuletontonkanya pa mashiwi ayaba pa Abena Filipi 1:29, ayatila: “Kuli imwe kwapeelwe ishuko pa mulandu wa kwa Kristu, te kumutetekela fye, lelo no kumuculila kwine.”
Yehova alilaya ukuti akala-afwa ababomfi bakwe. Ku ca kumwenako, pali Esaya 54:17 atila: “Icanso conse ico bakupangila tacakabombe.” Ubu bulayo e lyo na yambi amalayo ayapalana no bu yalenga abantu ba kwa Lesa ukucetekela ukuti Yehova takabalekeleshe. Lelo, Abena Kristu umo umo kuti baeshiwa, ica kuti limo no kubepaya kuti babepaya.