‘Pa Ntanshi ya Mpili’
“MWABA ubwikalo bwesu ukupulinkana inkulo shonse. Pa ntanshi impili tashilafyalwa nelyo tamulaleta isonde ne calo, ukufuma umuyayaya no kuya umuyayaya ni mwe Lesa.” (Ilumbo 90:1, 2, New International Version) Ayo mashiwi yalungatikwe kuli Kabumba wesu, kabili fintu yaba aya kusansamusha—ukucilisha ilelo, lintu takuli icili conse icilemoneka icashikatala!
Mu mibele ilebotelela iya fya bunonshi, banono abayumfwa abacetekela pa lwa nshita ya ku ntanshi. Ukwingilishiwako kwa kutulumusha mu misoka na mu kubomfya bubi bubi imiti ikola kwalyalula imisumba imo mu fifulo fya nkondo. Nelyo fye ni cilya caimikwa ca nshita ntali, ulupwa, ciletelententa. Tulomfwa pa lwa fintu ifyeni ifya musango yo pamo nga indupwa sha balaalana ba bwamba bumo bwine. Indupwa sha bafyashi baba beka shilekulilako mu mpendwa, mu kuba no mufyashi umo ilingi line ukubomba no kukanshika kukalamba. Umutende wa ndupwe shingi walipaswa no lupato pamo nga ukupuma kwa mwina mwakwe no kucenda abana.
Ni nani akatutungulula ukupula muli ishi nshita shayafya? Kwena, takwabako ukubulisha kwa kupanda amano ukufuma ku basambilila ifya muntontonkanya, bakafundisha, na bambi, lelo ubwingi bwa kwene bwaba ubwa kupilika. Ukupulinkana inkulo yonse ku Masamba, Dr. Benjamin Spock aali e mpanda mano wa ntanshi mu mulandu wa kusambilisha abana. Lyene asumine ukuti ukupanda amano kwakwe kwalisendelwe mu cilubo!
Fintu caba ica mano ukucilapo apakalamba ukukwata Lesa ngo “bwikalo bwesu”! Muli ishi nshita shalulunkana, aba libwe lya kushikatalika, uwabako “ukufuma umuyayaya no kuya umuyayaya.” Asosele ulwa mwine ukupitila muli kasesema Malaki ukuti: “Ine Yehova nshiteluka.” (Malaki 3:6) Ifipimo fya kwa Lesa, nga fintu fyalembwa muli Baibolo, fyalishintililwapo umupwilapo. Aliko ‘pa ntanshi ya mpili,’ kabili ukufunda kwakwe, ukusangwa mu Malembo ya Mushilo, kwashimpwa pa mano yakwe aya muyayaya. E cintu fye tukabila ku nsansa no kutunguluka.
Cili ica mano, lyene, ukukwata icitetekelo mu Cebo ca kwa Lesa, Baibolo. Sambilila yene ku kunonkelamo ukufuma ku mano ya kwa Lesa. Cetekela cintu ulesambilila, kabili leka cibe ulubuuto ku kukutungulula ukwenda mu nshila ya ku bumi. (Ilumbo 119:105) Ni beka fye abacite co e bakakwata umulandu wa kucetekela mu nshita ya ku ntanshi no kukwato mutende wa muntontonkanya uwine wine.