Mwe Bacaice, Ibukisheni Kalenga Wenu

“Lelo ibukisha Kalenga obe mu nshiku sha bulumendo bobe.”—LUK. MIL. 12:1.

1. Finshi filanga ukuti Yehova alicetekela abacaice abamubombela?

YEHOVA amona Abena Kristu bacaice kwati mume kabili balicindama sana mu menso yakwe. Na kuba, asobele ukuti mu kasuba “ka bulamba” aka Mwana wakwe, abalumendo na bakashana “bakaipeela” ku kubomba umulimo uo Kristu akabapeela. (Amalu. 110:3) Uku kusesema kufikilishiwa pali ino nshita ilyo abantu abengi bashumfwila Lesa, babika fye amano ku fyo bafwaya na ku kukonkelela indalama, kabili ni bacintomfwa. Na lyo line, Yehova alishiba ukuti abacaice abamubombela bena balipusanako na ba bantu. Ala mwandini Yehova alimucetekela imwe mwe balumendo na bakashana abamubombela!

2. Bushe ukwibukisha Yehova kusanshamo finshi?

² Elenganyeni ifyo Lesa atemwa ilyo amona abacaice balemwibukisha ukuti ni Kalenga wabo. (Luk. Mil. 12:1) Nomba, ukwibukisha Yehova takupilibula ukuti tufwile ukulamutontonkanyapo fye. Lelo, kupilibula ukucitapo fimo, e kutila, ukulacita ifimutemuna, ukuleka amafunde ne fishinte fyakwe ukulatutungulula muli fyonse ifyo tucita. Kupilibula no kuti tufwile ukucetekela Yehova, ukulaibukisha ukuti alatusakamana sana kabili alafwaisha ukutwafwa. (Amalu. 37:3; Esa. 48:17, 18) Bushe ifi e fyo mwaishiba Kalenga wenu?

“Tetekela Yehova Umutima Obe Onse”

3, 4. Bushe Yesu alangile shani ukuti alicetekela Yehova, kabili mulandu nshi cacindamina ukucetekela Yehova muno nshiku?

³ Umuntu uwatetekele Lesa uo tufwile ukulapashanya sana ni Yesu Kristu. Alecita ifintu ukulingana na mashiwi yaba pa Amapinda 3:5, 6, ayatila: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.” Ilyo fye Yesu abatishiwe, Satana aile kuli Yesu no kumwesha pa kuti asumine ukupokelela amaka pa mabufumu yonse aya mu calo no bucindami bwa yako. (Luka 4:3-13) Lelo, Yesu alikeene pantu alishibe ukuti “ubucindami no bukata no mweo” ifya cine cine “cilambu ca kufuuka na katiina ka kuli Yehova.”—Amapi. 22:4.

⁴ Muno nshiku, ubufunushi no kuitemwa e mibele iseekele sana. Apo twikala mu calo ca musango yu, kuti cawama ukulapashanya Yesu. Mwilalaba no kuti Satana apampamina pa kutunka ababomfi ba kwa Yehova pa kuti abafumye mu nshila yafyenenkana iitwala ku mweo. Afwaisha ukuti abantu bonse baleenda mu nshila iyapabuka iitwala ku bonaushi. Mwikaleka ukuti akamulufye! Mupampamine fye pa kulaibukisha Kalenga wenu. Mucetekeleni ne mitima yenu yonse, kabili ikateni ku “bumi ubwine bwine,” ubo tuli no kuipakisha nomba line fye.—1 Tim. 6:19.

Mwe Bacaice, Beni aba Mano!

5. Bushe mutontonkanyapo shani pa fikacitika ku ntanshi kuli cino calo?

⁵ Abacaice abebukisha Kalenga wabo ba mano sana ukucila bambi abo balingene nabo umushinku. (Belengeni Amalumbo 119:99, 100.) Apo balishiba ukufwaya kwa kwa Lesa, balishiba ukuti cino calo cili no kupita nomba line fye. Nangu ni muli iyi yine fye imyaka iinono mwaikala abomi pa calo, ukwabula no kutwishika mwalimona ukuti abantu abengi balisakamikwa kabili bekala fye mwenso mwenso pantu tabaishiba ifili no kucitika ku ntanshi. Nga mucili pa sukulu, mufwile mulomfwa amalyashi yalanda pa kukowesha umwela na menshi, ukonaula umushili, pa fyo icalo cilekaba ukucila mu cipimo, ukutemaula imiti, na mafya yambi ayapalana na ya. Abantu balisakamikwa sana umulandu ne fi filecitika, lelo Inte sha kwa Yehova balishiba ukuti ifilecitika fyaba pa fintu ifyapanga icishibilo cilanga ukuti nomba line icalo ca kwa Satana cili no konaulwa.—Ukus. 11:18.

6. Bushe abacaice bamo batunkwa shani ku kucito lubembu?

⁶ Ku ca bulanda, Abena Kristu bamo abacaice balileka ukuba abalola kabili balisuula ubushininkisho ubulanga ukuti kushele fye inshita iinono cino calo cili no kupwa. (2 Pet. 3:3, 4) Bambi balitunkwa ukucita ulubembu ulwabipisha pa mulandu wa kwangala na bantu ababipa no kutamba ifye shiku. (Amapi. 13:20) Ala mwandini kuti cabipa nga Lesa aleka ukutupaala pali ino nshita ilyo impela ya cino calo ipalamine nga nshi! Sambilileni ku fyacitikile abena Israele mu 1473 B.C.E. ilyo bali mu Mawanga ya Moabu, lintu bali fye mupepi no kwingila mu Calo ca Bulayo. Bushe cinshi cacitike?

Babembwike Ilyo Bali fye Mupepi no Kwingila mu Calo ca Bulayo

7, 8. (a) Mucenjelo nshi uo Satana abomfeshe ilyo abena Israele bali mu Mawanga ya Moabu? (b) Mucenjelo nshi Satana alebomfya pali ino nshita?

⁷ Pali ilya nshita, Satana alefwaya ukucilikila abena Israele ukupyana icalo ico Yehova abalaile. Ilyo afililwe ukulenga Balaamu ukubatiipa, Satana abomfeshe umucenjelo umbi uo bafililwe ukwiluka; alengele bacite ifyali no kulenga Yehova aleke ukubapaala. Abomfeshe abanakashi abena Moabu ukubeleleka abena Israele, kabili uyu muku Kaseebanya alengele abena Israele bamo ukufilwa ukwingila mu Calo ca Bulayo. Batendeke ukulacita ubulalelale na banakashi abena Moabu no kulapepa Baali wa ku Peore! Nangu cingati bali apepi no kupoka ubupyani bwabo ubwacindama sana, e kutila Icalo ca Bulayo, abena Israele 24,000 balifwile. Ala mwandini calibipile!—Impe. 25:1-3, 9.

⁸ Muno nshiku, natupalama sana no kwingila mu calo cipya, icacila pa calo ico Yehova alaile abena Israele. Nga filya fine acitile mu nshiku sha bena Israele, na ino ine nshita Satana alebomfya ubulalelale pa kulenga abantu ukubembukila Lesa. Imibele muli cino calo naibipa sana ica kuti abantu bamona kwati ubulalelale tabwabipa kabili batila umuntu umwine kuti asalapo nga alefwaya ukulaulungana na baume banankwe nelyo abanakashi banankwe. Nkashi umo atile, “Ni pa ng’anda pa mwesu fye na pa Ng’anda ya Bufumu e po abana bandi basambilila ukuti Lesa alipata ukuulungana kwa baume beka beka na banakashi beka beka nelyo ukuulungana no muntu uo ushaupana nankwe.”

9. Cinshi cingacitika ku muntu ilyo acila “pa mushinku wa bwaice,” kabili abacaice kuti bashipikisha shani ilyo bafika pali iyi myaka?

⁹ Abacaice abebukisha Kalenga wabo balishiba ukuti ukupanga icupo bupe ubo Lesa apeela abantu pa kuti balefyalana. Kanshi balishiba ukuti, ukulingana na mafunde ya kwa Lesa, umuntu alingile ukupanga icupo no muntu fye uo aupana nankwe. (Heb. 13:4) Lelo, umuntu nga acila “pa mushinku wa bwaice,” imyaka ilyo umuntu aba sana ne nsuuna ya kupanga icupo ica kutila kuti afilwa no kupingulapo bwino, kuti cayafya ukutwalilila ukuba uwasanguluka. (1 Kor. 7:36) Bushe kuti mwacita shani nga mwatampa ukulatontonkanya pa fyalubana? Mufwile ukupepa kuli Yehova ukufuma panshi ya mutima pa kuti amwafwe ukulatontonkanya pa fintu ifyasanguluka. Lyonse fye Yehova alakutika ku mapepo ya babomfi bakwe abafwaisha ukuti abafwe. (Belengeni Luka 11:9-13.) Ukulalanda pa fintu ifyasanguluka kabili ifingakosha icitetekelo ca bambi nako kuti kwalenga umuntu ukuleka ukulatontonkanya pa fyalubana.

Mulesala Mano Mano Ifya Kucita!

10. Kutontonkanya nshi ukwalubana uko tufwile ukusengauka, kabili mepusho nshi twingaipusha?

¹⁰ Cimo icilenga abacaice abengi muno nshiku ukukanailama no kulakonkelela umusamwe mulandu wa kuti tabatungululwa na mafunde ya kwa Lesa kabili tabakwata isubilo lya ku ntanshi. Baba nga bena Israele abaliko mu nshiku sha kwa Esaya abashaleumfwila Lesa, lelo babikile fye amano ku ‘kusekelela no kwanga, . . . ukulye nama no kunwo mwangashi.’ (Esa. 22:13) Mu nshita ya kulakumbwa abantu ba musango yu, kuti cawama nga tuletontonkanya pe subilo ilisuma nga nshi ilyo Yehova apeela ababomfi bakwe aba cishinka. Nga uli Mwina Kristu wacaice, bushe ulafwaisha ukwisaikala mu calo cipya? Bushe ulesha na maka ‘ukuba uwa mano ayatuntulu . . . ilyo ulelolela isubilo lya nsansa’ ilyo Yehova akulaya? (Tito 2:12, 13) Ifyo walayasuka aya mepusho fyalalenga wishibe ifyo ukapanga ukucita ne fyo ukabikako amano mu bumi.

11. Mulandu nshi abacaice Abena Kristu abacili ku sukulu balingile ukubikila amano ku masambililo?

¹¹ Abantu muno calo bafwaya ukuti abalumendo na bakashana balebika sana amano ku fya muli cino calo. Kwena, mwe bacaice bonse mwe bacili ku sukulu mufwile ukubika amano ku masambililo. Mufwile ukulaibukisha ukuti ico muleila ku sukulu te kufwaya fye ukuti mukengile incito, lelo kufwaya no kuti mukalebomba bwino mu cilonganino no kulashimikila bwino imbila nsuma iya Bufumu. Pa kuti mucite fyonse ifi, mulingile ukwishiba ifya kulanshanya na bantu, ukulatontonkanya bwino, e lyo no kulapelulushanya na bantu bambi mucinshi mucinshi. Na lyo line, abacaice abasambilila Baibolo kabili abesha na maka ukulabomfya ifishinte fya mu Baibolo, balasambilila amasambililo ayacindama kabili balaibakila umufula uusuma uwa ku ntanshi.—Belengeni Amalumbo 1:1-3.a

12. Bushe Abena Kristu abakwata indupwa bafwile ukupashanya bani?

¹² Mu Israele, abafyashi balibikile sana amano ku kusambilisha abana. Abafyashi balesambilisha abana babo fyonse fye pa mikalile, sana sana ifyakumine ukupepa Lesa e lyo na mafunde yakwe. (Amala. 6:6, 7) E ico, abena Israele bacaice abaleumfwila abafyashi babo na bakalamba bambi abaletiina Lesa, tabanonkele fye ukwishiba, lelo balinonkele na mano, ukushilimuka, ukwiluka, no bupanda. Abakwata iyi mibele bantu fye abasambilila pali Lesa e lyo na pa mafunde yakwe. (Amapi. 1:2-4; 2:1-5, 11-15) Na muno nshiku mwine Abena Kristu abakwata indupwa bafwile ukubika amano ku kusambilisha abana babo.

Muleumfwila Abantu Abamutemwa

13. Bushe finshi ifyo abacaice bamo babafunda, kabili mulandu nshi bafwile ukubela abacenjela?

¹³ Abacaice balabapanda amano ku bantu abapusanapusana, ukusanshako fye na bampanda mano ba pa sukulu, abo ilingi line bafunda fye abacaice pa fyo bengalumbuka sana no kukwata icuma muli cino calo. Mulepepa kuli Lesa ukuti alemwafwa ukwishiba ifyo mwingapingulapo ukucita pa fyo balemupanda amano kabili mulekonka ifyalembwa mu Cebo cakwe na mu mpapulo isho umusha wa cishinka kabili uwashilimuka atupekanishisha. Ukulingana na fintu mwasambilila mu Baibolo, mwalishiba ukuti Satana afwaya sana ukulufya abacaice pantu tabaishiba ifingi. Ica kumwenako fye, mwi bala lya Edene, Efa uushaishibe ifingi alyumfwilile Satana, uo ashaishibe no kwishiba kabili uushamutemenwe na kumutemwa. Ala mwandini ifintu nga fyaliweme Efa omfwila Yehova, uwamutemenwe sana!—Ukute. 3:1-6.

14. Mulandu nshi tulingile ukulaumfwila ifyo Yehova na bafyashi besu Abena Kristu batweba?

¹⁴ Na imwe bene, Kalenga wenu alimutemwa nga nshi. Afwaya muleba ne nsansa ku ciyayaya, te pali ino nshita fye! Apo Yehova mufyashi uwamutemwa, eba imwe na bonse abamupepa ukuti: “Iyi e nshila, e mo mwende.” (Esa. 30:21) Nga ca kuti abafyashi benu balitemwa sana Yehova, ninshi mwalikwata na bambi aba kumwafwa. Mulekutika ku fyo balemweba ilyo mulepanga ifyo mukacita ne fyo mukabikako amano mu bumi. (Amapi. 1:8, 9) Na kuba, bafwaya ukuti mukanonke umweo, icintu icacindama sana ukucila ifyuma nelyo ukulumbuka.—Mat. 16:26.

15, 16. (a)Twacetekela ukuti Yehova akacita shani nga ca kuti tatufushishe ifya kucitacita ilyo tulemubombela? (b) Lisambililo nshi ilyacindama ilyo tulesambilila ku fyacitikile Baruki?

¹⁵ Abebukisha Kalenga wabo tabafusha ifya kucitacita pa kuti fye baleikala bwino, lelo balicetekela ukuti Yehova takabashe “nakalya” kabili takabalekeleshe “nakalya.” (Belengeni AbaHebere 13:5.) Apo ifyo Abena Kristu batontonkanya fyalipusana sana ne fyo aba muli cino calo batontonkanya, tufwile ukucenjela sana pa kuti twilatungululwa no mupashi wa muli cino calo. (Efes. 2:2) Ibukisheni ifyacitikile Baruki, kalemba wa kwa Yeremia, uwaikeleko mu nshiku sha kulekelesha ishayafishe sana mu Yerusalemu lintu abena Babiloni bali mupepi no konaula uyu musumba mu 607 B.C.E.

¹⁶ Cimoneka kwati Baruki alefwaya ukuba ne cuma sana. Yehova alishibe ifyo Baruki aletontonkanya kabili cikuuku cikuuku amusokele ukuleka ‘ukuifwaila ifikalamba.’ Baruki ali na mano kabili aliicefeshe pantu alyumfwile ifyo Yehova amwebele kabili ilyo abena Babiloni baonawile Yerusalemu alipuswike. (Yer. 45:2-5) Lelo tapakokwele, abaikeleko pa nshita imo ine na Baruki, ‘abaifwaile ifikalamba’ no kukanabika amano ku kupepa Yehova, balilufishe ifyuma fyonse bakwete ilyo abena Kaldi (abena Babiloni) baonawile Yerusalemu, kabili abengi balifwile. (2 Imila. 36:15-18) Ifyacitikile Baruki filetusambilisha ukuti ukuba cibusa wa kwa Lesa kwalicindama sana ukucila ukunonka ifyuma no kulumbuka muli cino calo.

Mulepashanya Abalinga Ukupashanya

17. Mulandu nshi ababomfi ba kwa Yehova aba muno nshiku balingile ukulapashanishisha Yesu, Paulo, na Timote?

¹⁷ Mu Cebo ca kwa Lesa, mwaliba abengi abo twingapashanya nga tulefwaya ukulaenda pa nshila ya ku mweo. Ica kumwenako fye, Yesu ali uwalamuka sana ukucila umuntu uuli onse pano calo, na lyo line, abikile fye amano ku kubila “imbila nsuma iya bufumu” iyali no kulenga abantu ukuba no mweo wa muyayaya. (Luka 4:43) Umutumwa Paulo alefwaya ukulabombela Yehova no mweo wakwe onse. E co alilekele ukubomba umulimo uwali no kulenga abe umukankaala no kubika fye amano ku kubila imbila nsuma. Timote, “umwana wine wine mu citetekelo,” apashenye Paulo. (1 Tim. 1:2) Bushe Yesu, Paulo, na Timote balilangulwike pa fyo basalile ukucita mu bumi? Awe nakalya! Na kuba, Paulo atile alemona ifya mu calo ukuti “fisooso ifingi” nga kufilinganya kwi shuko akwete ilya kubombela Lesa.—Fil. 3:8-11.

18. Finshi munyina umo uwacaice acitile, kabili mulandu nshi ashilangulukila pa fyo acitile?

¹⁸ Abacaice abengi muno nshiku balapashanya Yesu, Paulo, na Timote. Ica kumwenako fye, munyina wacaice uwalebomba incito iisuma kabili uwalefola ne ndalama ishingi atile: “Apo ndakonka ifishinte fya mu Baibolo, tapakokwele bampeele icifulo icikalamba pa ncito. Nangu ca kuti nalekwata indalama ishingi, nalemona kwati naleuma fye umwela. Ilyo naile ku bakalamba ba ncito no kubeba ukuti ndefwaya ukuleka incito no kutampa ukubomba umulimo wa nshita yonse, apo pene fye balinundileko indalama, balemona kwati nga ndefola indalama ishingi nkatwalilila ukubomba. Lelo nalipingwilepo kale ukuleka incito. Abengi balefilwa ukumfwikisha umulandu nalekele incito ya pa muulu no kutendeka umulimo wa nshita yonse. Umulandu nacitile fi wa kuti mfwaya ukufikilisha ubulayo nalaya kuli Lesa ubwa kumubombela. Indalama no kulumbuka tafyanengele ukuba ne nsansa nge fyo naba pali ino nshita ilyo nabika fye amano ku kubombela Lesa.”

19. Cinshi icacindama ico abacaice balekoseleshiwa ukupingulapo ukucita?

¹⁹ Mu calo fye conse, abacaice abengi bapingulapo ukucita nge fyo uyu munyinefwe acitile. E ico, mwe bacaice, ilyo muletontonkanya pa fyo mukacita mu bumi bwenu, muleibukisha ukuti ubushiku bwa kwa Yehova nabupalama nga nshi. (2 Pet. 3:11, 12) Mwilakumbwa abantu abalenonka sana muli cino calo. Lelo mulekutika ku bamutemwa sana. Ukuitutila “ifyuma mu muulu” e cacindama sana ico mwingacita kabili e kukalenga mukekale ku ciyayaya. (Mat. 6:19, 20; belengeni 1 Yohane 2:15-17.) E ico, muleibukisha Kalenga wenu. Nga mulecite fyo Yehova akamupaala.

[Futunoti]

Bushe Kuti Mwaibukisha?

• Tulanga shani ukuti twalicetekela Lesa?

• Masambililo nshi ayacindama?

• Finshi twingasambilila ku fyacitikile Baruki?

• Ni bani abacitile ifisuma abo twingapashanya, kabili mulandu nshi?

[Ifikope pe bula 13]

Yehova alatusambilisha amasambililo ayacindama

[Icikope pe bula 15]

Baruki alikutike kuli Yehova kabili alipuswike ilyo baonawile Yerusalemu. Finshi mwingasambilila ku fyamucitikile?