Ukutendeka Umulimo Ukalamba

RICHARD na Lusia pa kulondolola abana be sukulu banabo aba mu kalasi lyalenga 105 ilya Watchtower Bible School of Gilead batile: “Tatwalecimfyanya. Twalefwaya bonse bakacite bwino. Nangu cingati twalipusana, umwana we sukulu onse alicindama kuli ifwe.” Umwana we sukulu munabo, Lowell, na o asuminisheko ati: “Ukupusana ukulamuka kwalitwikatanya.”

Aba mu kalasi lyapwile isukulu pa September 12, 1998, bali abapusanapusana. Abana be sukulu bamo bali ni bapainiya mu ncende umwali ukubulisha kukalamba kwa bakasabankanya ba Bufumu; bambi babombele mu busumino mupepi na ku mwabo. Abanono, pamo nga Mats na Rose-Marie, balitukwite nga nshi ukusambilila IciNgeleshi ilyo bashilaisa ku sukulu. Icinabwingi cabo balefwaya ukuba bamishonari ukufuma fye na ku bwaice. Bamo abaupana balyeseshe imiku 12 ukwipusho mulimo wa bumishonari; fintu batemenwe ilyo baitilwe kwi kalasi lyalenga 105!

Imilungu 20 ya kukansha kwashika yalipwile bwangu ica kuti abana be sukulu baishilepulikilwa fye na bapwisha amashindano ya kulekelesha, ukulanda amalipoti ya kulekelesha no bushiku bwa kupwisha nabufika.

Ceyamani wa programu, Albert Schroeder, uwa mwi Bumba Litungulula ilya Nte sha kwa Yehova, acinkwileko abana be sukulu ukuti bali no “kutendeka umulimo ukalamba uwa kusambilisha Baibolo,” ukukonka bambi ukucila pali 7,000 ababalilepo ukwisa ku Gileadi. Alandile ukuti mu lusuba, abana be sukulu baipakishe ishuko lyaibela ilya kubishanya na bamishonari abakokole ilyo batandalile amaofeshi yakalamba pa nshita ya mabungano ya pa kati ka fyalo.

Lyene Munyina Schroeder aitile Max Larson uwa ku Bethel Operations Committee uwalandile pa “Amasomo Ayatungulula ku Bumi bwa Muyayaya.” Munyina Larson ayambwile Amapinda 1:5, apatila: “Uwa mano aumfwa no kulundako ukusambilila, kuti no wa mucetekanya amwenamo imitubululo.” Mishonari akabila ukuba uwakampuka pa kuti engabomba bwino. Abakampuka baleminina ku cinso ca shamfumu. (Amapinda 22:29) Pa numa ya kukanshiwa imyeshi isano, abana be sukulu balipangashiwe bwino ukuyaimininako Ishamfumu shikalamba, Yehova Lesa na Kristu Yesu.

David Olson uwa ku Dipartimenti wa Mulimo e wakonkelepo ukulanda ilyashi ilyaleti “Afwilisheni Ukulenga Umutima wa kwa Yehova Ukusamwa.” Aipwishe ati: “Cinshi abantunse bashapwililika bengacita ku kulenga umutima wa kwa Lesa ukusamwa?” Ayaswike shani? Kuti bamubombela mu busumino, muli bucishinka, na mu buseko. Yehova afwaya abantu bakwe baleipakisha ilyo balemubombela. Lintu twacita ukufwaya kwa kwa Lesa mu buseko, tulenga umutima wakwe ukusamwa. (Amapinda 27:11) Munyina Olson abelengele kalata wa bamishonari babili abaupana abapitile mu kalasi lyalenga 104 ilya Gileadi. Bushe balaipakisho mulimo wabo uupya? Pa lwa cilonganino babamo balembele abati: “Mwaliba bakasabankanya 140, avareji wa basangwa ku kulongana ni 250 ukufika kuli 300. Umulimo wa mwi bala e lubali lwacilapo ukuwama. Cila muntu twakwata amasambililo yane, kabili yamo aya yene yalitendeka ukulongana.”

Lyman Swingle, uwa mwi Bumba Litungulula, alandile pa “Inshita ya Kupemwina no Kupenda Amapaalo Yenu.” Ukukansha kwa Gileadi kwalileta amapaalo ayengi. Kwalyafwile abana be sukulu ukulundako ukwishiba, ukukula mu kutesekesho kuteyanya kwa kwa Yehova, no kulundulula imibele yakatama, pamo ngo kuicefya. Munyina Swingle atile: “Ukwisa kuno no kupoose nshita ukukutika lintu mulekanshiwa fintu ifimulenga ukuicefya.” Alundilepo ati: “Mwalafuma pano namuipangasha ku kusansabika Yehova.”

Daniel Sydlik, na o uwa mwi Bumba Litungulula alandile ilyashi ilyaleti “Mwalikwata Ubuseko Bukalamba—Nomba Mulandu Nshi Musakamikilwa?” Acincishe ukuti lintu amafya yaimako, fwayeni ubutungulushi ukufuma mu Malembo. Munyina Sydlik abomfeshe ifikomo fyasoobolwamo mu cipandwa 6 ica kwa Mateo, pa kulangilila ifyo ici cingacitwa. Ukubulwe citetekelo kuti kwalenga tulesakamikwa pa fintu fya pano nse, pamo nge fya kulya ne fya kufwala. Nangu cibe fyo, Yehova alishiba ifyo tukabila. (Mateo 6:25, 30) Ukusakamikwa kulundapo fye amafya ayo ubushiku bumo buletako. (Mateo 6:34) Lubali lumbi, ukupekanishisha libela kulakabilwa. (Linganyeniko Luka 14:28.) Munyina Sydlik alondolwele ati: “Yesu talekaanya ukutontonkanyapo bwino pa fya ku ntanshi, lelo alekaanya ukucishamo ukusakamikwa pa lwa fyene. Ukucitapo cimo e muti usuma uwingaposha ukusakamikwa. Lintu twasakamikwa, caliwamapo ukulanda pa lwa cine.”

Ukufunda kwa Kulekelesha Ukufuma Kuli Bakafundisha

Amalyashi yakonkelepo yalandilwe na bakafundisha batatu aba pa Gileadi. Karl Adams e wabalilepo, alandile ilyashi ilyaleti “Ndebwesesha cinshi kuli Yehova?” Ilyashi lyakwe lyashimpilwe pa Amalumbo 116, ayo Yesu nalimo aimbile pa bushiku ilyo ashilafwa. (Mateo 26:30, utulembo twa pe samba, NW) Cinshi Yesu aletontonkanyapo ilyo aimbile amashiwi yatila: “Ndebwesesha cinshi kuli Yehova pa fya kutetesa fyakwe fyonse pali ine”? (Amalumbo 116:12) Nalimo aletontonkanya pa mubili wakwe uwapwililika uo Yehova amupekanishe. (AbaHebere 10:5) Ubushiku bwakonkelepo, ali no kutuula uyo mubili nge lambo, ukushininkisho kuti alikwete ukutemwa kwashika. Abana be sukulu aba mu kalasi lyalenga 105 basondele ubusuma bwa kwa Yehova pa myeshi isano iyapitilepo. Nomba bali no kulangisha ukuti balitemwa Lesa ukupitila mu kubombesha muli bumishonari.

Mark Noumair, kafundisha wa cibili uwa pa Gileadi e wakonkelepo, apandile amano abana be sukulu “Ukutwalilila Ukucite Calungama.” Ilyo Yosefe bamushitishe mu busha mu Egupti, ashipikishe imyaka 13 iya lufyengo. Bushe ifilubo fya bambi fyalengele ukuti aleke ukubombela Lesa? Awe, talekele ukucite calungama. Lyene pa nshita ya kwa Lesa iyalingwa, Yosefe alilubwilwe ku mesho yakwe. Mu kupumikisha, afumine mu cifungo no kutendeka ukwikala mwi sano. (Ukutendeka, ifipandwa 37-50) Kafundisha aipwishe abasambi bakwe ati: “Nga ca kuti amasubilo yenu tayafikilishiwe muli bumishonari, bushe mukaleka? Bushe mukatompoka? Nelyo bushe mukashipikisha, nge fyacitile Yosefe?”

Mu kulekelesha, kalemba we Sukulu lya Gileadi, Wallace Liverance, mu kucincimuka alanshenye na bana be sukulu pe lyashi ilyaleti “Sabankanyeni Imfumu no Bufumu.” Bamo abana be sukulu bashimike ifyo bakumenye ilyo baleshimikila ku ng’anda ne ng’anda, mu mashitolo, na mu misebo. Bambi bashimike ifyo baleshimikila abantu abalanda indimi shimbi. Na bambi balangilile ifya kushimikila ku bantu aba mipepele yapusanapusana. Abana be sukulu bonse abalepwisha balefuluka ukubombesha mu butumikishi bwa mwi bala lya bumishonari.

Bamishonari Abakokole Aba Nsansa

Ilyashi lyakonkelepo, ilyaleti “Ubuseko Ubufuma Muli Bumishonari,” lyalandilwe na Robert Wallen kabili lyali lya kulanshanya kwa kwipusha bamunyina bane ababomba pa maofeshi yakalamba abo nomba line babishenye na bamishonari babelesha. Abo bamishonari balisumine ukuti calibakosele ukusambilila ululimi lupya, ukubelesha intambi shimbi, nelyo ukubelesha imiceele imbi. Lyene balipitile mu bwafya bwa kufuluka ku mwabo. Inshita shimo, balelwala. Lelo muli ifi fyonse, aba bamishonari tabatompweke, kabili balipaalilwe pa kuba aba mukoosha. Bamo balilenga abengi ukwishiba Yehova. Bambi balyafwilishe mu nshila ishingi ku kulundululo mulimo wa Bufumu mu fyalo babomba.

Carey Barber, uwa mwi Bumba Litungulula e walekelesheko ukulanda. Apitulwike mu fishinka fikalamba ifya programu we bungano lya “Imikalile ya Bukapepa.” Aipwishe ibumba ati: “Bushe programu we bungano ayambukile shani ukwampana kwenu na Yehova?” Kalanda alandile pa mapaalo ayafuma mu kukonka imikalile ya bukapepa e lyo na kayofi akaponena abakonke mikalile ya calo. Pa kulanda pa lubembu lwa kwa Mose pa Meriba, asokele ati: “Umuntu nangu engabomba mu busumino pa myaka iingi, Yehova tasuulako fye nga atoba panono amafunde Yakwe ayalungama.” (Impendwa 20:2-13) Shi ababomfi ba kwa Lesa bonse bekatishe amashuko yabo aya mulimo ayacindama!

Yalifikile inshita ya kuti abana be sukulu bapokelele amadiploma yabo. Lyene, umwana we sukulu uwalandileko abanankwe abelengele kalata wa kutasha pa fyo bakanshiwe. Pa numa ya lwimbo lwa kusondwelela ne pepo lya kufuma ku mutima, programu wa kupwishe isukulu alipwile. Lelo, kuli bamishonari abapya aba mu kalasi lyalenga 105, iyi yali fye ni ntendekelo, pantu bali no “kutendeka umulimo ukalamba.”

[Akabokoshi pe bula 23]

Ukulondolola Ikalasi

Ifyalo bafumineko: 9

Ifyalo baleyako: 17

Abasambi bonse: 48

Abaupana: 24

Avareji wa myaka ya bukulu: 33

Avareji wa myaka mu cine: 16

Avareji wa myaka mu butumikishi bwa nshita yonse: 12

[Akabokoshi pe bula 24]

Basalile Umulimo wa Nshita Yonse

Ben, uwapwile sukulu mu kalasi lyalenga 105, atila: “Ilyo nali umwaice, nshalefwaya ukubombako bupainiya. Namwene kwati aba lupikwe lwaibela na bakwata imibele yayana e bengabombako bupainiya epela. Lelo nalisambilile ukutemwa umulimo wa mwi bala. Lyene bushiku bumo naishilemona ukuti ukuba painiya cipilibula ukubombesha mu butumikishi. E lintu naishibe ukuti na ine kuti naba painiya.”

Lusia ashimiko kuti: “Ababomfi ba nshita yonse balicindikwe sana mu lupwa lwesu.” Mu nsansa ebukisha ifyo bamunyina balecincimushiwa ilyo bamishonari baletandalila icilonganino. Asoso kuti: “Lintu nalekula, naishilemono kuti mfwile ukusanshamo umulimo wa nshita yonse mu mapange yandi.”

Banyina kwa Theodis bafwile lintu ali ne myaka 15. Theodis asoso kuti: “Pali iyo nshita, icilonganino calingafwile sana, e ico naliipwishe nati, ‘Cinshi ningacita pa kutasha?’” Ici calengele atendeke umulimo wa nshita yonse kabili nomba ni mishonari.

[Icikope pe bula 25]

Ikalasi Lyalenga 105 Ilyalepwisha Isukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.