Lintu Akabanga Kakumanya Amasamba
“YANGU, Akabanga Kabanga, na Masamba Masamba, kabili ifi fibili tafyakatale afikumana.” Aya mashiwi ya kwa kalemba wa mishikakulo umwina Britain Rudyard Kipling yatucinkulako ulwa kupusana kwashika ukwa mu ntambi ukwayakanya umutundu wa muntu, uko kusangwila ku kupatana kwa mikowa, ukwa mushobo, no kwa buluko ukulepuulika ukutushinguluka ilelo. Abengi bepusho kuti, Bushe Lesa te kuti acitepo cimo pa lwa iyi mibele? Ee, kuti acitapo cimo! Kabili nangu fye ni nomba line alecitapo cimo! Ilongo lyakonkapo ilya mashiwi aya mushikakulo wa kwa Kipling lyalilosesheko kuli ici. Butali bwaba shani Akabanga na Masamba fili no kuba ifyayakanikana? Kalemba wa mishikakulo atile: “Ukufikila lintu Isonde no Muulu fikeminina mu kwangufyanya pa Cipuna cikalamba ica Bupingushi ica kwa Lesa.”
Lesa alipeela icishingamo ca kupingula ku Mwana wakwe, Yesu Kristu. (Yohane 5:22-24, 30) Lelo ni lilali lintu iyo nshita ya bupingushi itendeka? Ni bani bapingulwa, kabili mu kuba na ca kufumamo nshi? Aali ni Yesu e walondolwele mu busesemo inkondo sha calo no kushikitika ukwendela pamo na sho ifyatendeke ukucusha umutundu wa muntu mu mwaka wa 1914. Alondolwele ukuti ifi fipanga “iciishibilo ca kubapo” kwakwe ukwa kukanamoneka “ne ca kusondwelela kwa micitile ya fintu.”—Mateo 24:3-8, NW.
Pa kalume ka ubu busesemo bukalamba, Yesu aishibisha inshita yesu iilipo pamo nga imo iya bupingushi, ukulanda ulwa mwine wine ukuti: “Ilyo Umwana wa muntu akesa mu bukata bwakwe, na bamalaika bonse pamo nankwe, e lyo akekala pa cipuna ca bukata bwakwe, ne nko shonse shikalonganikwa ku cinso cakwe; kabili akabapaatukanya, ifyo umucemi apaatukanye mpaanga ku mbushi, no kubike mpaanga ku kulyo ne mbushi ku kuso.” Mu mampalanya, abantu na bantu bonse aba pe sonde nomba balelonganikwa pa ntanshi ya kwa Kapingula kabili bakalubulula ku nshila bankwilako ku bukombe bwakwe ubwe pusukilo. Lintu ubupingushi bwaputunkanishiwa mu kwangufyanya pa bucushi bukalamba, abantu babulwe cumfwila abapale mbushi “bakafumapo, bakaya ku kulimunwa kwa muyayaya; lelo abalungami [aba cumfwila bapale mpaanga] bakaya ku mweo wa muyayaya.”—Mateo 25:31-33, 46; Ukusokolola 16:14-16.
‘Ukufumo Kutula Akasuba no Kufumo Kuwa Akasuba’
Ubupingushi bwa ici calo mu cituntulu bwatendeke mu kati ka myaka ya nkuuka iya Nkondo ya Calo iya I. Pali ilya nshita, bashibutotelo ba Kristendomu bapeele ukwafwilisha kwa mutima onse ku mbali shalelwishanya. Ici cabeshibishe ngo lubali lwa calo cabola icawaminwa “icipyu ca kwa Lesa.” (Yohane 3:36) Lelo ni shani ku Bena Kristu batemwo mutende ababeeleshe icitetekelo muli Lesa? Ukutendeka mu mwaka wa 1919, aba batendeke ukulonganikwa ku lubali lwa Mfumu, Kristu Yesu.
Balisa ukufuma ku mbali shonse isha cibulungwa, intanshi abashalapo ba mu basubwa aba muli ba 144,000, abasoobolwa ukupulinkana imyanda ya myaka iya nshita ya Bwina Kristu. Aba bali no kuba “impyani shinankwe sha kwa Kristu” mu Bufumu bwakwe ubwa mu muulu. (Abena Roma 8:17) Kuli aba kasesema wa kwa Lesa atila: “Witiina, pantu ndi na iwe; nkaleto bufyashi bobe ukufumo kutula akasuba, no kukulonganya ukufumo kuwa akasuba, nkatila ku kapinda ka ku kuso, Peela, na ku kapinda ka ku kulyo, Witana, no kuleta abana bandi abaume ukutulo kutali, na bana bandi abanakashi ukutula ku mpela sha pano isonde, onse uwainikwe shina lyandi, uo nalengeele ubukata bwandi, uo nabumbile, cene, nalimucitile.”—Esaya 43:5-7.
Lelo te ico ceka! Maka maka ukutendeka muli ba1930, ibumba likalamba, abafikile nomba mu mamilioni, balitendeke ukulonganikwa. Aba e “mpaanga” shintu Yesu alosesheko pali Mateo 25:31-46. Ukupala abashalapo basubwa ababatangilile, aba besa ku ‘kutetekela’ Umo uubilisho kuti: ‘Ni mwe nte shandi, na ine nine Lesa.’ (Esaya 43:10-12) Ukulonganika ili bumba likalamba na ko kuleya ku ntanshi ‘ukufumo kutula akasuba no kuwa akasuba, ukufuma ku kapinda ka ku kuso na ku kapinda ka ku kulyo, no kufuma ku mpela sha pano isonde.’
Ishi mpaanga shatemwo mutende shilelundanishiwa muli bumunyina bumo ubwa pa kati ka nko. Balanda indimi shingi shalekanalekana isha mu fyalo 231 umo bekala. Lelo balikatana lwa ku mupashi mu kusambililo “lulimi lwine lwine” ulwa bukombe bwa Bufumu ubwa mu Baibolo, “ukuti bonse bene balilile kwi shina lya kwa Yehova, no kumubombela no mutima umo.” (Sefania 3:9) Buumo bwabo ubwa cisumino, imifwaile, ne ncitilo bupayanya ubunte bwa kusungusha ubwa kuti Akabanga mu cine cine kalikumanya Amasamba, na bantu na bantu ukufuma mu tupinda tonse utwa cibulungwa, ku mulimo ne lumbo lya kwa Shikulu Mulopwe Yehova.
Mu fyalo fimo uku kulonganika kulecitika pe samba lya mibele yamonekesha, nga fintu amalipoti yakonkelepo yalalangilila.