Palameni Kuli Lesa
“Wa Mushilo, Wa Mushilo, Wa Mushilo Yehova”
BUSHE nga bamwebele ukulondolola ifyo Yehova Lesa aba mwi shiwi fye limo, bushe kuti mwamulondolola shani? Mu ma 700 B.C.E. kasesema Esaya alimwene icimonwa umo aumfwile bamalaika balelumbanya Yehova, ukubomfya ishiwi ililondolola bwino bwino ifyo aba, ukuti wa mushilo. Ifyo Esaya amwene no kumfwa fifwile ukutulenga ukumfwa umwenso e lyo pa nshita imo ine ukutulenga ukupalama kuli Yehova. Ilyo twakulalanda pa mashiwi yaba pali Esaya 6:1-3, mule-elenganya ukuti ni mwe mwalemona ifyalecitika.
Finshi Esaya amwene? Atile: “Namwene Yehova, naikala pa cipuna cakwe ica bufumu icasumbuka kabili icasansulwa.” (Icikomo 1) Kwena, te Shikulu Mulopwe Yehova uo Esaya amwene. Abantu te kuti bamone Yehova nelyo bamalaika. Baibolo yalilanda fye apabuuta tuutu ukuti: “Takwaba umuntu nangu umo uwatala amona Lesa.” (Yohane 1:18) Ico Esaya amwene, cimonwa fye.a Na lyo line, ifyo amwene fyalimoneke bwino bwino ica kuti Esaya alipapile nga nshi kwati ni Yehova fye alemona.
Lyena, Esaya amwene ico nalimo umuntunse nangu umo ashamonapo. Alembele ukuti: “Baserafi baiminine pa muulu wakwe [Yehova]. Umo umo ali na mapindo 6. Yabili alefimbilako pa menso, na yambi yabili alefimbilako ku makasa, e lyo yambi yabili alepupukilako.” (Icikomo 2) Baserafi ni bamalaika abakwata icifulo icikalamba pali bamalaika bambi. Pali bonse abalembeleko Baibolo, ni Esaya fye e walanda pali baserafi. Baserafi inshita fye iili yonse bali-ipekanya ukuya no kubomba umulimo onse uo Yehova abapeela. Balaifimba pa menso na ku makasa ku kulanga umucinshi na katiina kuli Yehova uo babombela no kulanga ukuti lishuko nga nshi ukwiminina pa ntanshi yakwe.
Esaya tatiinine fye pa mulandu wa fyo amwene lelo na pa fyo aumfwile. Baserafi, abaali ibumba baleimbila Yehova mu kupongomoka. Esaya alembele ukuti: “Baleankulana no kusosa abati: ‘Wa mushilo, wa mushilo, wa mushilo Yehova wa mabumba.’” (Icikomo 3) Ishiwi lya ciHebere ilyo bapilibula ukuti “wa mushilo” lipilibula ubusaka no kusanguluka. Ili ishiwi lipilibula no kuba no “buntungwa bwapwililika no kukanabamo ulubembu.” Mu lwimbo lwa kwankulana ulo nalimo baserafi baleimba mu kubwekeshabwekeshapo, ishiwi lya kuti “wa mushilo” balelilumbula imiku itatu kabili ici cilanga ukuti Yehova wa mushilo nga nshi. (Ukusokolola 4:8) Kanshi bumushilo, mibele iikalamba nga nshi iyo Lesa akwata. Muli fyonse fye, Yehova alisanguluka, wa busaka, kabili tamwaba ububi muli ena.
Ukwishiba ukuti Yehova wa mushilo kufwile ukutulenga ukupalamina kuli ena. Mulandu nshi? Yehova taba nga bakateka abantunse ababa ne mibele yabipa kabili abakalushi. Muli ena tamwaba lubembu. Kanshi ifi aba uwa mushilo, kuti twashininkisha ukuti lyonse fye akaba Shifwe umusuma, Kateka uwalungama, kabili Kapingula wa mulinganya. Kanshi tufwile ukucetekela ukuti Lesa uwa mushilo nga nshi takatale acita ifingatukalifya.
Amalembo ya kubelenga mu December
[Futunoti]
a Icitabo ca Insight on the Scriptures cilondolola ukuti: “Nga ca kuti umuntu alimwene icimonwa icafumine kuli Lesa ninshi alelola, cimoneka kwati ifyo amwene talefilaba nangu panono. Pa numa, uwamwene icimonwa aleibukisha no kulondolola nelyo ukulemba pa fyo amwene.”—Abalemba ici citabo ni Nte sha kwa Yehova.
[Amashiwi pe bula 26]
Ukwishiba ukuti Yehova wa mushilo kufwile ukutulenga ukupalamina kuli ena